អ្នកនាំពាក្យ ថា មានអ្នកជាប់កាតព្វកិច្ច៧រូបមិនទាន់មកប្រកាសទ្រព្យសម្បត្តិ និងបំណុល

អ្នកជាប់កាតព្វកិច្ចចំនួន៧រូប មិនទាន់បានមកដាក់ឯកសារប្រកាសទ្រព្យសម្បត្តិ និងបំណុល តាមរបប០២ឆ្នាំ ខណៈការទទួលឯកសារ បានបិទបញ្ចប់តាំងពីថ្ងៃទី៣១ ខែមករា ឆ្នាំ២០២៥។ នេះបើតាមការបញ្ជាក់ឱ្យដឹងដោយអ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្រ។

បើតាមអ្នកនាំពាក្យ គិតត្រឹមថ្ងៃទី៣១ ខែមករា ឆ្នាំ២០២៥ ដែលជាកាលបរិច្ឆេទចុងក្រោយនៃការទទួលឯកសារប្រកាសទ្រព្យសម្បត្តិ និងបំណុល តាមរបប០២ឆ្នាំ ឆ្នាំ២០២៥ គឺក្រុមការងារ ទទួលបានឯកសារសរុបចំនួន ២២ ៧៦៩រូប ស្មើនឹង ៩៩.៩៦% នៃចំនួនបុគ្គលត្រូវប្រកាសសរុប ២២ ៧៧៦រូប​ ខណៈសល់០៧​រូបទៀត​ មិនទាន់ដាក់ឯកសារប្រកាស ដែលអង្គភាពទាក់ទងមិនទាន់បាន ហើយសង្ស័យកំពុងនៅក្រៅប្រទេស។

លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានប្រាប់ «កម្ពុជាថ្មី» នៅរសៀលថ្ងៃទី០៥ ខែមករា ឆ្នាំ២០២៥ ថា​«ក្រុមការងារកំពុងព្យាយាមទំនាក់ទំនងពួកគាត់​ អាចពួកគាត់កំពុងស្ថិតនៅក្រៅប្រទេស»។​ តែយ៉ាងណា លោក សយ ច័ន្ទវិចិត្រ សុំមិនបញ្ជាក់ពីអត្តសញ្ញាណរបស់អ្នកទាំង០៧រូបពេលនេះបានឡើយ ដោយទុកពេលពិនិត្យឱ្យច្បាស់ជាមុនសិន។ ​

ការប្រកាសទ្រព្យសម្បត្តិ និងបំណុល បានធ្វើរយៈពេលពេញមួយខែ ចាប់ពីថ្ងៃទី០១ ដល់ថ្ងៃទី៣១ ខែមករា ឆ្នាំ២០២៥ ដែលអ្នកជាប់កាតព្វកិច្ចប្រកាសទ្រព្យសម្បត្តិ និងបំណុល អាចមកដាក់ឯកសារប្រកាសនៅអង្គភាពប្រឆាំងអំពើពុករលួយបាន។ តែគិតមកដល់ពេលនេះ បានផុតរយៈពេល ៥ថ្ងៃទៅហើយ។

ត្រង់ចំណុចនេះ អ្នកនាំពាក្យ ក៏បានលើកឡើងពីបទពិសោធន៍កន្លងមក ដែលមានករណីអង្គភាពមិនទាន់បានទទួល គឺដោយសារអ្នកនៅបរទេសខ្លះគាត់បានដាក់ផ្ញើតាមប្រៃសណីយ៍ ប៉ុន្តែឯកសារមិនទាន់មកដល់អង្គភាព។ ដូច្នេះ បើមានឯកសារ ក្រុមការងាររបស់អង្គភាពប្រឆាំងអំពើពុករលួយ នឹងពិនិត្យមើលថ្ងៃខែ ដែលគាត់ផ្ញើមក។  

ដោយឡែក បុគ្គលដែលមានកាតព្វកិច្ចប្រកាស​ ហើយអង្គភាពជូនដំណឹងដល់គាត់ឱ្យមកប្រកាសទ្រព្យសម្បត្តិ និងបំណុល​ ប៉ុន្តែបែរជាមិនព្រមមកប្រកាសនោះ អង្គភាពប្រឆាំងអំពើពុករលួយ នឹងចាត់វិធានការតាមច្បាប់ជាធរមាន។​ នេះជាការបញ្ជាក់បន្ថែមរបស់អ្នកនាំពាក្យរូបនេះ។​

យោងតាមមាត្រា ៣៨ នៃច្បាប់ស្ដីពីការប្រឆាំងអំពើពុករលួយ បុគ្គលណាដែលមិនបានប្រកាសទ្រព្យសម្បត្តិ និងបំណុល ឬប្រកាសមិនបានត្រឹមត្រូវតាមច្បាប់ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាទឹកប្រាក់ពី ១សែនរៀល ដល់២លានរៀល និងត្រូវបង្ខំឱ្យប្រកាសទ្រព្យសម្បត្តិជូនអង្គភាពប្រឆាំងអំពើពុករលួយ។ បើក្នុងករណីមិនព្រមប្រកាសទៀត នឹងត្រូវទទួលទោសទ្វេដង។

មាត្រា១៧ នៃច្បាប់ដដែល បុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុល រួមមាន៖ សមាជិកព្រឹទ្ធសភា រដ្ឋសភា រាជរដ្ឋាភិបាល មន្រ្តី​សាធារណៈ​ដែល​មាន​អាណត្តិ​ជ្រើស​តាំង សមាជិក​ក្រុម​ប្រឹក្សា​ជាតិ​ប្រឆាំង​អំពើ​ពុក​រលួយ ​ប្រធាន ​អនុប្រធាន និង​មន្រ្តី​ទាំងអស់​នៃ​អង្គភាព​ប្រឆាំង​អំពើ​ពុក​រលួយ។

រីឯ មន្រ្តី​រាជការ​ស៊ីវិល​ មន្ត្រីយោធា​ នគរបាល​ជាតិ មន្ត្រី​រាជការ​សាធារណៈ​ដែល​តែងតាំង​ដោយ​ព្រះរាជ​ក្រឹត្យ ឬ​អនុក្រឹត្យ និងមន្រ្តី​ផ្សេង​ទៀត​ដែល​តែងតាំង​ដោយ​ប្រកាស ​ហើយ​ត្រូវ​បាន​កំណត់​ឱ្យ​ប្រកាស​ទ្រព្យ​សម្បត្តិ និង​បំណុល ​តាម​បញ្ជី​​រៀបចំ​ឡើង​ដោយ​អង្គភាព​ប្រឆាំង​អំពើ​ពុករលួយ ​ក៏ជាប់កាតព្វកិច្ចប្រកាសទ្រព្យសម្បត្តិ និងបំណុល ខណៈថ្នាក់​ដឹកនាំ​​សង្គម​ស៊ីវិល រួមទាំងមន្ត្រីតុលាការ ជាអាទិ៍ ចៅក្រម​ ​អយ្យការ ​សាការី​ ក្រឡាបញ្ជី និង​អាជ្ញាសាលា ជាដើម ក៏ជាប់កាតព្វកិច្ចនេះដែរ៕

ដោយ៖ ធឿន វ៉ាន់សុង