ACU អំពាវនាវអ្នកពុំទាន់ប្រកាសទ្រព្យសម្បត្តិ និងបំណុល រួសរាន់ឱ្យទាន់ពេល សល់តែ៤ថ្ងៃប៉ុណ្ណោះ

នៅសល់៤ថ្ងៃទៀតប៉ុណ្ណោះ ការប្រកាសទ្រព្យសម្បត្តិ និងបំណុល តាមរបប២ឆ្នាំ ឆ្នាំ២០២៥ នឹងត្រូវបិទបញ្ចប់ ខណៈអ្នកជាប់កាតព្វកិច្ចប្រកាសទ្រព្យសម្បត្តិ និងបំណុល ប្រមាណជិត ៩៨%ហើយ បានដាក់ឯកសារប្រកាសរួចរាល់។

ការប្រកាសទ្រព្យសម្បត្តិ និងបំណុល ធ្វើឡើងរយៈពេលពេញមួយខែ ចាប់ពីថ្ងៃទី០១ ដល់ថ្ងៃទី៣១ ខែមករា ឆ្នាំ២០២៥ ដែលអ្នកជាប់កាតព្វកិច្ចប្រកាសទ្រព្យសម្បត្តិ និងបំណុល អាចមកដាក់ឯកសារប្រកាសទ្រព្យសម្បត្តិ និងបំណុល នៅអង្គភាពប្រឆាំងអំពើពុករលួយបាន នៅថ្ងៃណាក៏បាន រៀងរាល់ថ្ងៃចន្ទ ដល់ថ្ងៃអាទិត្យ និងថ្ងៃបុណ្យ ចាប់ពីម៉ោង ៨ព្រឹក ដល់ម៉ោង ៥ល្ងាច។

តាមទិន្នន័យពីអង្គភាពប្រឆាំងអំពើពុករលួយ ការប្រកាសទ្រព្យសម្បត្តិ និងបំណុល គិតចាប់ពីថ្ងៃទី០១ ដល់ថ្ងៃទី២៧ ខែមករានេះ នាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ ទទួលបានឯកសារពីអ្នកជាប់កាតព្វកិច្ចត្រូវប្រកាសចំនួន ២២ ២៩២រូប ស្មើនឹង ៩៧,៨៧% នៃចំនួនបុគ្គលជាប់កាតព្វកិច្ចសរុប ២២​ ៧៧៦រូប។

តែយ៉ាងណា នៅតែ៤ថ្ងៃទៀតប៉ុណ្ណោះ ការប្រកាសតាមរបប ២ឆ្នាំ ឆ្នាំ២០២៥ នឹងត្រូវបញ្ចប់ ហើយក្រុមការងារនាយកដ្ឋានប្រកាសទ្រព្យសម្បត្តិ និងបំណុល បានអំពាវនាវអ្នកជាប់កាតព្វកិច្ចរួសរាន់ ដោយក្រុមការងារនៅបន្តរង់ចាំទទួលឯកសារប្រកាសរហូតដល់ថ្ងៃទី៣១ ខែមករា ឆ្នាំ២០២៥៕