ការប្រកាសទ្រព្យសម្បត្តិ និងបំណុល សម្រេចបានជិត៩៧%ហើយ ខណៈបាំង១សប្ដាហ៍ទៀតនឹងផុតកំណត់  

អ្នកជាប់កាតព្វកិច្ចប្រមាណជាង២ម៉ឺននាក់ហើយ បានមកដាក់ឯកសារប្រកាសទ្រព្យសម្បត្តិ និងបំណុល មកកាន់អង្គភាពប្រឆាំងអំពើពុករលួយ (ACU) តាមរបប ២ឆ្នាំម្ដង សម្រាប់ឆ្នាំ២០២៥នេះ ខណៈបាំងតែមួយសប្ដាហ៍ទៀត ការទទួលឯកសារប្រកាសទ្រព្យសម្បត្តិ និងបំណុល នឹងត្រូវផុតកំណត់។

តាមទិន្នន័យពីអង្គភាពប្រឆាំងអំពើពុករលួយ ការប្រកាសទ្រព្យសម្បត្តិ និងបំណុល គិតចាប់ពីថ្ងៃទី០១ ដល់ថ្ងៃទី២៤ ខែមករា គឺក្រុមការងារបានទទួលឯកសារពីអ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ចំនួន ២២ ០៣៣រូប ស្មើនឹង ៩៦.៧៣% នៃចំនួនបុគ្គលជាប់កាតព្វកិច្ចសរុប ២២ ៧៧៦រូប។

អង្គភាពប្រឆាំងអំពើពុករលួយ ថា ការសម្រេចបានវឌ្ឍនភាពនេះ ក្រោមកិច្ចសហការល្អពីក្រុមជនបង្គោលនៃការប្រកាសទ្រព្យ និងបំណុលតាមក្រសួង-ស្ថាប័ន និងរាជធានី-ខេត្ត។ តែយ៉ាងណា នៅតែមួយសប្ដាហ៍ទៀតប៉ុណ្ណោះ ការប្រកាសតាមរបប ២ឆ្នាំ ឆ្នាំ២០២៥ នឹងត្រូវបញ្ចប់។ ក្រុមការងារនាយកដ្ឋានប្រកាសទ្រព្យសម្បត្តិ និងបំណុល បានអំពាវនាវអ្នកជាប់កាតព្វកិច្ចរួសរាន់ ដោយក្រុមការងារនៅបន្តរង់ចាំទទួលឯកសារប្រកាស ០៧ថ្ងៃក្នុងមួយសប្តាហ៍ រហូតដល់ថ្ងៃទី៣១ ខែមករា ឆ្នាំ២០២៥ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ។

យោងតាមមាត្រា៣៨ នៃច្បាប់ស្ដីពីការប្រឆាំងអំពើពុករលួយ បុគ្គលណាដែលមិនបានប្រកាសទ្រព្យសម្បត្តិ និងបំណុល ឬប្រកាសមិនបានត្រឹមត្រូវតាមច្បាប់ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាទឹកប្រាក់ពី ១សែនរៀល ដល់២លានរៀល និងត្រូវបង្ខំឱ្យប្រកាសទ្រព្យសម្បត្តិ បើក្នុងករណីមិនព្រមប្រកាសទ្រព្យសម្បត្តិ និងបំណុលទៀត នឹងត្រូវទទួលទោសទ្វេដង។

មាត្រា១៧ នៃច្បាប់នេះ បានកំណត់ថា សមាសភាពបុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុល មាន សមាជិកព្រឹទ្ធសភា រដ្ឋសភា រាជរដ្ឋាភិបាល មន្រ្តី​សាធារណៈ​ដែល​មាន​អាណត្តិ​ជ្រើស​តាំង សមាជិក​ក្រុម​ប្រឹក្សា​ជាតិ​ប្រឆាំង​អំពើ​ពុក​រលួយ ​ប្រធាន ​អនុប្រធាន និង​មន្រ្តី​ទាំងអស់​នៃ​អង្គភាព​ប្រឆាំង​អំពើ​ពុក​រលួយ។

រីឯមន្រ្តី​រាជការ​ស៊ីវិល​ មន្ត្រីយោធា​ នគរបាល​ជាតិ មន្ត្រី​រាជការ​សាធារណៈ​ដែល​តែងតាំង​ដោយ​ព្រះរាជ​ក្រឹត្យ ឬ​អនុក្រឹត្យ និងមន្រ្តី​ផ្សេង​ទៀត​ ដែល​តែងតាំង​ដោយ​ប្រកាស ​ហើយ​ត្រូវ​បាន​កំណត់​ឱ្យ​ប្រកាស​ទ្រព្យ​សម្បត្តិ និង​បំណុល ​តាម​បញ្ជី​​រៀបចំ​ឡើង​ដោយ​អង្គភាព​ប្រឆាំង​អំពើ​ពុករលួយ ​ក៏ជាប់កាតព្វកិច្ចប្រកាសទ្រព្យសម្បត្តិ និងបំណុល ខណៈថ្នាក់​ដឹកនាំ​​សង្គម​ស៊ីវិល រួមទាំងមន្ត្រីតុលាការ ជាអាទិ៍ ចៅក្រម​ ​អយ្យការ ​សាការី​ ក្រឡាបញ្ជី និង​អាជ្ញាសាលា ជាប់កាតព្វកិច្ចនេះដែរ៕

ដោយ៖ ធឿន វ៉ាន់សុង