១ថ្ងៃទៀតប៉ុណ្ណោះ ការប្រកាសទ្រព្យសម្បត្តិ និងបំណុល តាមរបប២ឆ្នាំ នឹងត្រូវបញ្ចប់

នៅសល់តែ១ថ្ងៃទៀតប៉ុណ្ណោះ ការប្រកាសទ្រព្យសម្បត្តិ និងបំណុល តាមរបប២ឆ្នាំ ឆ្នាំ២០២៥ នឹងត្រូវបិទបញ្ចប់។ តាមការបញ្ជាក់របស់អង្គភាពប្រឆាំងអំពើពុករលួយ បុគ្គលជាប់កាតព្វកិច្ចប្រមាណជាង៩៩%ហើយ បានដាក់ឯកសារប្រកាសទ្រព្យសម្បត្តិ និងបំណុលរួចរាល់ នៅសល់តិចតូចប៉ុណ្ណោះ។

ក្រុមការងារនាយកដ្ឋានប្រកាសទ្រព្យសម្បត្តិ និងបំណុល នៃអង្គភាពប្រឆាំងអំពើពុករលួយ បានឱ្យដឹងថា គិតត្រឹមម៉ោង ១២ថ្ងៃត្រង់ ថ្ងៃទី៣០ ខែមករា ឆ្នាំ២០២៥នេះ មានក្រសួងចំនួន២ និងខេត្តចំនួន១ បន្ថែមទៀត បានបញ្ចប់ការប្រកាសទាំងស្រុង ១០០% ដែលនាំឱ្យវឌ្ឍនភាពការងារនៃការមកប្រកាសទ្រព្យសម្បត្តិ និងបំណុល នៅទូទាំងប្រទេស សម្រេចបានចំនួន ២២ ៥៩៩រូប ស្មើនឹង ៩៩,២២% នៃចំនួនត្រូវប្រកាសសរុប ២២ ៧៧៦រូប។

ក្រសួង និងខេត្ត ដែលបានដាក់ឯកសារប្រកាសរួចរាល់ទាំងស្រុង នាព្រឹកថ្ងៃនេះ រួមមាន ក្រសួងបរិស្ថាន ក្រសួងសង្គមកិច្ច អតីតយុទ្ធជន និងយុវនីតិសម្បទា និងខេត្តព្រះវិហារ។

តែយ៉ាងណា អង្គភាពប្រឆាំងអំពើពុករលួយ ទទូចបុគ្គលជាប់កាតព្វកិច្ចប្រកាសទ្រព្យសម្បត្តិ និងបំណុល តាមរបប២ឆ្នាំ ឆ្នាំ២០២៥ រួសរាន់ នៅសល់១ថ្ងៃទៀតប៉ុណ្ណោះ ត្រឹមថ្ងៃទី៣១ ខែមករា ឆ្នាំ២០២៥ ស្អែកនេះ ការទទួលឯកសារប្រកាស នឹងនៅបន្តរង់ចាំរហូតដល់ម៉ោង ១២:០០នាទីយប់។ ដូច្នេះ បុគ្គលពុំទាន់បានមកបំពេញកាតព្វកិច្ចប្រកាស រួសរាន់ឱ្យបានទាន់ពេលវេលា និងច្បាប់កំណត់ និងមិនឱ្យហួសថ្ងៃទី៣១ ខែមករា ឆ្នាំ២០២៥ឡើយ៕