ព័ត៌មានជាតិ

ពលរដ្ឋភូមិសុវណ្ណាបៃតង ទទួលបានការវាស់វែង និងចុះបញ្ជីដីធ្លីមានលក្ខណៈជាប្រព័ន្ធ

បានផុស

៣ years មុន

នៅ

ថ្ងៃអង្គារ ១៤ កុម្ភៈ ២០២៣

ដោយ

ប្រជាពលរដ្ឋដែលកំពុងរស់នៅក្នុងភូមិសុវណ្ណាបៃតង ឃុំកណ្តោល ស្រុកបូទូមសាគរ ត្រូវបានអាជ្ញាធរខេត្ត និងមន្ត្រីជំនាញ ផ្ដើមចុះវាស់វែង និងចុះបញ្ជីដីធ្លីមានលក្ខណៈជាប្រព័ន្ធ ដើម្បីផ្ដល់ភាពកក់ក្ដៅផ្នែកច្បាប់ ខណៈរង់ចាំយូរឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននឹងផ្ដើមដំណើរការចុះបញ្ជីដីធ្លីមានលក្ខណៈជាប្រព័ន្ធនេះដែរ អាជ្ញាធរ ក៏ស្នើសុំដល់ប្រជាពលរដ្ឋដែលរស់នៅអាស្រ័យលើដីជាក់ស្ដែង គប្បីចូលរួមសហការយ៉ាងជិតស្និទ្ធបំផុតជាមួយអាជ្ញាធរមូលដ្ឋាន និងក្រុមការងារជំនាញ។

កិច្ចប្រជុំផ្សព្វផ្សាយសេចក្ដីពីការកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋភូមិសុវណ្ណាបៃតង ឃុំកណ្តោល ស្រុកបូទុមសាគរ កាលពីព្រឹកថ្ងៃទី ១៤ ខែកុម្ភៈ ឆ្នាំ ២០២៣ លោក សុខ សុទ្ធី អភិបាលរងខេត្តកោះកុង លើកឡើងថា ដំណាក់កាលដំបូង ពលរដ្ឋជាម្ចាស់ដីធ្លីម្នាក់ៗ ត្រូវបង្ហាញទីតាំងដី ព្រំប្រទល់ដីជាក់ស្ដែង និងបំពេញឯកសារពាក់ព័ន្ធនានាតាមតែមន្ទីរជំនាញតម្រូវ។

លោកអភិបាលរងខេត្ត បន្ថែមថា ការវាស់វែង និងចុះបញ្ជីដីធ្លីនេះដែរ មិនធ្វើតែចំពោះប្រជាពលរដ្ឋនោះទេ ពោលគឺដីដែលជាកម្មសិទ្ធិរដ្ឋ រួមមាន ៖ សាលារៀន មណ្ឌលសុខភាព សាលាឃុំ និងស្នាក់ការសហគមន៍ ក៏ត្រូវតែអនុវត្តជាកញ្ចប់រួមគ្នាផងដែរ។

លោកជឿជាក់ថា ដំណើរការវាស់វែង និងចុះបញ្ជីក្បាលដីប្រព្រឹត្តទៅដោយភាពរលូន ហើយថែមទាំងឆាប់ទទួលវិញ្ញាបនបត្រសម្គាល់ម្ចាស់អចលនវត្ថុ។ ប្រសិនមានការកិច្ចសហការល្អ។ សម្រាប់មូលដ្ឋានភូមិសុវណ្ណាបៃតង អាចចំណាយពេលវេលា ២ ខែ សម្រាប់ការវាស់វែង និងចុះបញ្ជីដីធ្លីជូនប្រជាពលរដ្ឋលើផ្ទៃប្រមាណជាង ៥០០ ហិកតា។

លោក ហ៊ាង ប៊ុណ្ណា អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង ក៏បានឲ្យដឹងដែរថា ការផ្ដើមវាស់វែង និងចុះបញ្ជីដីធ្លីជូនពលរដ្ឋ គឺតបតាមអនុក្រឹត្យលេខ ៤៦ ស្តីពីនីតិវិធី នៃការកសាងប្លង់ សុរិយោដី និងសៀវភៅគោលបញ្ជីដីធ្លី។

បើតាមលោក ហ៊ាង ប៊ុណ្ណា បច្ចុប្បន្ន ក្រុមការងារចុះវាស់វែង និងចុះបញ្ជីដីធ្លីនៅក្នុងខេត្តកោះកុង បែងចែកជា ៤ ក្រុមធំ រួមមាន ៖

ក្រុមទី១-ទើបតែបញ្ចប់ការវាស់វែងនៅភូមិស្មាច់មានជ័យ និងភូមិបឹងឃុនឆាង សង្កាត់ស្មាច់មានជ័យ ក្រុងខេមភូមិន្ទ។

ក្រុមទី២-អនុវត្តការងារនៅភូមិថ្មី ឃុំជ្រោយប្រស់ ស្រុកកោះកុង។

ក្រុមទី៣-អនុវត្តការងារភូមិជីមាល ឃុំអណ្តូងទឹក ស្រុកបូទូមសាគរ និងក្រុមទី៤-អនុវត្តការងារនៅភូមិវាលត្បូង ឃុំស្រែអំបិល ស្រុកស្រែអំបិល។

មន្ត្រីជំនាញ បញ្ជាក់ថា ការងារចុះបញ្ជីដីធ្លីមានលក្ខណៈជាប្រព័ន្ធដែលជាកម្មវិធីថ្មីមានលក្ខណៈហ្មត់ចត់ ច្បាស់លាស់ និងបច្ចេកទេសទំនើប ដើម្បីឲ្យកម្មវិធីនេះអនុវត្តទៅសម្រេចបានផែនការជោគជ័យលុះត្រាតែមានការប្រឹងប្រែងពីមន្ត្រីជំនាញ អាជ្ញាធររដ្ឋបាលដែនដីមូលដ្ឋាន ជាពិសេសប្រជាពលរដ្ឋម្ចាស់ដីធ្លីតែម្ដង។

គិតចាប់តាំងពីខែឧសភា ឆ្នាំ ២០១៤ មកដល់បច្ចុប្បន្ន មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង បានវាស់វែងក្បាលដីជូនអ្នកពាក់ព័ន្ធសរុបជិត ៣ ម៉ឺនក្បាលដី បញ្ចូលទិន្នន័យបាន ២ ម៉ឺន ៨ ពាន់នាក់ និងចេញបណ្ណសម្គាល់ម្ចាស់អចលនវត្ថុសរុប ១ ម៉ឺន ១ ពាន់បណ្ណ៕

អត្ថបទ ៖ សិរីវឌ្ឍនៈ

Related Topics:ខេត្តកោះកុង

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា