តើស្ថានីយបញ្ចូលរថយន្តអគ្គិសនីរបស់ក្រសួងសាធារណការ មាននៅកន្លែងណាខ្លះ?

សព្វថ្ងៃនេះ ក្រសួងសារធារណការ និងដឹកជញ្ជូនមានស្ថានីយបញ្ចូលថាមពលយានយន្តអគ្គិសនី (EV Charging Station) ចំនួន៣ទីតាំងរួចមកហើយ ចំណែក១ទីតាំងទៀត ក៏នឹងត្រៀមបើកសម្ពោធដាក់ឱ្យដំណើរការក្នុងពេលឆាប់ៗនេះដែរ។ នេះបើតាមការផ្សាយរបស់ក្រសួងសាធារណការ និងដឹកជញ្ជូន។

កន្លែងដែលសម្រាប់បញ្ចូលថាមពលរថយន្តអគ្គិសនីរបស់ក្រសួងមាននៅរាជធានីភ្នំពេញ ខេត្តសៀមរាប និងខេត្តព្រះសីហនុ។ ចំណែក ស្ថាយនីយនៅខេត្តបាត់ដំបង មិនទាន់បើកឱ្យមានដំណើរការនៅឡើយទេ ប៉ុន្តែ នឹងត្រូវ​បើក​សម្ពោធក្នុងពេលឆាប់ៗនេះផងដែរ។

សរុបទាំងអស់ គឺមាន៤ ស្ថានីយ តែមានម៉ាស៊ីនបញ្ជូលថាមពលអគ្គិសនីចំនួន៧។ សម្រាប់ស្ថានីយទី១ ដែលមាននៅរាជធានីភ្នំពេញ គឺមានទីតាំងស្ថិតនៅក្នុងទីស្ដីការក្រសួងសាធារណការ និងដឹកជញ្ជូន ដែលមានទីតាំងផ្លូវលេខ ៥៩៨ (ផ្លូវ ឯកឧត្តម ជា សុផារ៉ា) សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ។

រីឯ ទីតាំងទី២នៅខេត្តសៀមរាប គឺស្ថិតនៅក្នុងក្រុងសៀមរាប ដែលមានទីតាំងនៅភូមិបឹងដូនប៉ា សង្កាត់ស្លក្រាម ផ្លូវមាត់ស្ទឹង។ ទីតាំងទី៣ ខេត្តព្រះសីហនុ ស្ថិតនៅផ្សារទំនើប ហ្វូរី ថាម សឃ្វែរ ម៉ល ខាងត្បូងវិមានឯករាជ្យ វិថីឯករាជ្យ។ ទីតាំងទី៤ ដែលត្រៀមនឹងបើកដំណើរការនៅខេត្តបាត់ដំបងមាននៅក្រុងបាត់ដំបងតែម្តង។ នេះបើតាមការបង្ហាញរបស់ក្រសួង។

ចំពោះម៉ាស៊ីនទាំង៧វិញនោះ មាន៤ម៉ាស៊ីនស្ថិតនៅក្នុងទីស្ដីការក្រសួងសាធារណការ និងដឹកជញ្ជូន។ ចំណែក ៣​ម៉ាស៊ីន​ទៀត ស្ថិតនៅទីតាំងស្ថានីយទាំង៣ខេត្តខាងលើ។ យ៉ាងណាមិញ ក្រសួងក៏មានគម្រោងដំឡើងបន្ថែមទៀតសម្រាប់ខេត្តនានាក្នុងប្រទេសកម្ពុជាផងដែរ ដើម្បីបម្រើដល់ពលរដ្ឋដែលបានប្រើប្រាស់យានយន្តបញ្ចូលថាមពលអគ្គិសនីនេះ៕