សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដាំផ្ញើដល់តារាច​ម្រៀង និងពិធីករ-ពិធីការនី សូមកុំផឹកភេសជ្ជៈផ្អែមច្រើនពេក ដែលអាចមានបញ្ហាសុខភាពទៅថ្ងៃក្រោយ។ ការផ្ដាំផ្ញើបែបនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីភាព ក្នុងពិធីបិទសន្និបាតបូកសរុបការងាររបស់ក្រសួងសុខាភិបាល នារសៀលថ្ងៃទី ៧ ខែមីនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ខ្ញុំព្រួយបារម្ភទៅលើអ្នកចម្រៀង និងពិធីករ-ពិធីការនីរបស់យើង ទឹកនោមផ្អែម ម៉េចបានទឹកនោមផ្អែម ឥឡូវអ្នកចម្រៀងដដែលនេះ ថ្ងៃនេះចម្រៀងឲ្យខារ៉ាបាវ ទៅភ្លុក​​អាខារ៉ាបាវទៅ ស្អែកទៅអាបាកាស ទៅភ្លុកអាបាកាសហ្នឹងទៅ ខានស្អែកច្រៀងអីអ៊ីឈីតាន គ្រប់»។

ជាមួយគ្នានេះ សម្ដេចតេជោ ហ៊ុន សែន បានផ្ញាំផ្ញើទៅតារាចម្រៀង និងពិធីករ-ពិធីការនី សូមកុំផឹកភេសជ្ជៈផ្អែមច្រើនពេក ដែលអាចមានបញ្ហាសុខភាពទៅថ្ងៃក្រោយ។ សម្ដេចតេជោ ហ៊ុន សែន លើកឡើងបែបនេះថា «សូមផ្ដាំទៅក្មួយៗអ្នកចម្រៀង ក៏ដូចជាពិធីករ-ពិធីការនី ព្រោះត្រូវតែភ្លុកឲ្យគេ ប៉ុន្តែគ្រាន់តែលើកអញ្ចឹងទៅបានហើយ ធ្វើដូចជាលេបអញ្ចឹង ក្មួយកុំទៅលេបអីច្រើនមុខណាស់ មិនដឹងថា ថ្ងៃក្រោយកើតអីទេ ថាមិនស្រួលច្រៀងអត់កើតទៀត»៕