ព័ត៌មានជាតិ

កសិករដាំក្រូចពោធិ៍សាត់លើផ្ទៃដីជាង ២ ម៉ឺនហិកតាក្នុងខេត្តពោធិ៍សាត់

បានផុស

១ year មុន

នៅ

ថ្ងៃចន្ទ ១៣ មីនា ២០២៣

ដោយ

Dy Bunnara

ក្រៅពីដំណាំស្រូវជាដំណាំយុទ្ធសាស្រ្តចម្បង ប្រជាជនក្នុងខេត្តពោធិ៍សាត់ក៏បានដាំដុះដំណាំក្រូចពោធិ៍សាត់លើផ្ទៃដីរាប់ម៉ឺនហិកតា។

លោក ខូយ រីដា អភិបាលនៃគណៈអភិបាលខេត្តពោធិ៍សាត់បញ្ជាក់នៅក្នុងសន្និសីទជោគជ័យ ៥ ឆ្នាំរបស់រដ្ឋបាលខេត្តថា ក្រូចពោធិ៍សាត់ជាដំណាំសំខាន់មួយរបស់ខេត្តពោធិ៍សាត់ ហើយក៏ជាដំណាំដែលមានប្រវត្តិកើតចេញពីខេត្តសំបូរថ្មកែវនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា បច្ចុប្បន្នក្រូចពោធិ៍សាត់ត្រូវបានពលរដ្ឋដាំដុះលើផ្ទៃដីជាង ២ ម៉ឺនហិកតា ហើយកំពុងពង្រីកការដាំដុះបន្ថែមទៀត។

ក្រៅពីក្រូចក៏ដំណាំយុទ្ធសាស្រ្តជាច្រើនទៀត ហើយរដ្ឋបាលខេត្តពោធិ៍សាត់ក៏បានជំរុញពលរដ្ឋផលិតដំណាំបន្លែសុវត្ថិភាព សម្រាប់ផ្គត់ផ្គង់ក្នុងស្រុកនិងនាំចេញទៅលក់នៅតាមបណ្តាខេត្តជិតខាង។

បើតាមលោកអភិបាលខេត្ត ក្នុងមួយថ្ងៃៗបន្លែសុវត្ថិភាពដែលផលិតដោយកសិករក្នុងខេត្តអាចផ្គត់ផ្គង់ទីផ្សារបានចំនួនពី ១០ តោន ទៅ ១៥ តោន ដើម្បីធានាបានសន្តិសុខស្បៀងអាហាររូបត្ថម្ភ និងបង្កើនប្រាក់ចំណូលនៅតាមតំបន់ជនបទ។

រូបសំណាកក្រូចពោធិ៍សាត់ក្នុងស្រុកភ្នំក្រវាញខេត្តពោធិ៍សាត់

យ៉ាងណាមិញដំណាំម្រេចដែលកន្លងទៅពលរដ្ឋខេត្តពោធិ៍សាត់បានសាកល្បងដាំបានមួយចំនួន ប៉ុន្តែបានបរាជ័យដោយសារខ្វះទីផ្សារនិងមិនសូវបានផល។ បើតាមលោកអភិបាលខេត្ត ស្ថានភាពដីក្នុងខេត្តពោធិ៍សាត់មិនសមស្របការដាំដំណាំម្រេច ហើយណាមួយដោយសារខ្វះទីផ្សារ ពលរដ្ឋក៏បានបោះបង់ដាំដំណាំម្រេចដោយបង្វែរទៅដាំដំណាំផ្សេងទៀត។

ខេត្តពោធិ៍សាត់មានសហគមន៍កសិកម្មចំនួន ៦០ សហគមន៍ និងក្រុមបណ្តុំកសិករធ្វើអាជីកម្មកសិកម្មចំនួន ៧៤ បណ្តុំ បានកំពុងផលិតផលិតផលកសិកម្មសុវត្ថិភាពសម្រាប់ផ្គត់ផ្គង់ទីផ្សារក្នុងខេត្តនិងក្រៅខេត្ត។

បើតាមរបាយការណ៍របស់មន្ទីរកសិកម្ម ខេត្តពោធិ៍សាត់មានផ្ទៃដីផលិតកម្មដំណាំស្រូវសរុបប្រមាណ ១៧៤.៤៨៥ ហិកតា ដោយទទួលបានទិន្នផលជាមធ្យមប្រមាណ ៤ តោនក្នុងមួយហិកតា។ ក្រៅពីដំណាំស្រូវ ក៏មានដំណាំរួមផ្សំ និងដំណាំកសិ-ឧស្សាហកម្មនិងដំណាំរកប្រាក់ចំណូលផ្សេងៗដូចជាដំណាំពោតក្រហម ដំឡូងមី សណ្តែកបាយ សណ្តែកសៀង អំពៅ ល្ង ម្រេច កៅស៊ូ ទុរេន ស្វាយ ស្វាយចន្ទីជាដើម៕