តើត្រូវមានលក្ខខណ្ឌអ្វីខ្លះចំពោះជនបរទេស ដើម្បីទទួលបានសញ្ជាតិខ្មែរ?

កាលពីថ្ងៃទី១១ ខែមេសា ឆ្នាំ​២០២៣ កីឡាករ​ប្រដាល់ជនជាតិ​ប្រេស៊ីល Thiago Teixeira ​ត្រូវបានព្រះមហាក្សត្រកម្ពុជា ត្រាស់បង្គាប់ផ្តល់​សញ្ជាតិ​ខ្មែរ​ជា​ផ្លូវការ។​ ការទទួល​បាន​សញ្ជាតិ​ខ្មែរ​នេះ គឺបន្ទាប់​ពីកីឡាករ Thiago បាន​ចូលរួម​ចំណែក​​ក្នុង​ការ​ផ្សព្វផ្សាយ និង​លើក​កម្ពស់​គុន​ខ្មែរ ព្រម​ទាំង​​​ទទួល​បាន​ក្តី​ស្រឡាញ់​ខ្លាំង​ពី​ប្រជា​ជន​កម្ពុជា។

មែនទែនទៅ នេះ មិនមែនជាលើកទី១ឡើយដែលកម្ពុជាបានសម្រេចផ្ដល់សញ្ជាតិខ្មែរដល់ជនបរទេស។ ជាក់ស្ដែង នៅពេលកន្លងមក កម្ពុជាបានផ្ដល់សញ្ជាតិខ្មែរដល់បុគ្គលបរទេសល្បីៗមួយចំនួន ដែលរួមមាន តារាហូលីវូដ អ្នកនាង អ៊ែន​ជេ​លីណា ចូលី ក្រុមគ្រួសារលោក ដាវិស បេន យ៉ូសែប ដែលបានចំណាយពេលជិត៣០ឆ្នាំរស់នៅកម្ពុជា ព្រមទាំងជនបរទេសជាច្រើនទៀតផងដែរ។ ដូច្នេះ ដើម្បីអាចទទួលបានសញ្ជាតិខ្មែរ តើជនបរទេសទាំងអស់ ត្រូវមានលក្ខខណ្ឌអ្វីខ្លះ?

ច្បាប់ស្ដីពីសញ្ជាតិ ឆ្នាំ២០១៨ បានកំណត់ថា ការទទួលបានសញ្ជាតិខ្មែរ ត្រូវធ្វើឡើងតាមរយៈ៤បែប គឺទី១. ការទទួលសញ្ជាតិខ្មែរពីកំណើត ទី២. ដោយការស្មុំកូន ទី៣. ដោយចំណងអាពាហ៍ពិពាហ៍ និងទី៤. ដោយសញ្ជាតូបនីយកម្ម។ តែក្នុងនោះ ចំពោះជនបរទេស គឺច្បាប់ស្ដីពីសញ្ជាតិ បានអនុញ្ញាតឲ្យជនបរទេសភាគច្រើនអាចស្នើសុំសញ្ជាតិខ្មែរបានតាមរយៈបែបបទទី៣ និងទី៤ ពោល គឺការទទួលបានសញ្ជាតិខ្មែរដោយអាពាហ៍ពិពាហ៍ និងការទទួលបានសញ្ជាតិខ្មែរដោយសញ្ជាតូបនីយកម្ម។

ទាក់ទិននឹងការទទួលបានសញ្ជាតិខ្មែរដោយអាពាហ៍ពិពាហ៍ គឺលុះត្រាណាដែលជនបរទេសបានរៀបអាពាហ៍ពិពាហ៍ត្រឹមត្រូវជាប្តី ឬប្រពន្ធជាមួយពលរដ្ឋខ្មែរ និងបានរស់នៅជាមួយគ្នារយៈពេល៣ឆ្នាំ ក្រោយចុះបញ្ជីអាពាហ៍ពិពាហ៍ ហើយបានស្នាក់នៅយ៉ាងហោចរយៈពេល១២ខែក្នុងប្រទេសកម្ពុជា។ រីឯ ការទទួលបានសញ្ជាតិខ្មែរដោយសញ្ជាតូបនីយកម្ម គឺសំដៅដល់ការផ្ដល់សញ្ជាតិខ្មែរតាមរយៈការស្នើសុំរបស់ជនបរទេស ដោយផ្អែកលើលក្ខខណ្ឌកំណត់របស់កម្ពុជា។

ក្នុងនោះ ជនបរទេសដែលបានអនុញ្ញាតឲ្យវិនិយោគត្រឹមត្រូវតាមច្បាប់ ជនបរទេសដែលបានធ្វើអំណោយជាសាច់ប្រាក់ដល់ជាតិ និងជនបរទេសដែលមានគុណសម្បត្តិជាប្រយោជន៍ដល់កម្ពុជា ហើយបានទទួលស្គាល់ដោយរាជរដ្ឋាភិបាលកម្ពុជា នោះអាចដាក់ពាក្យស្នើសុំចូលសញ្ជាតិសញ្ជាតូបនីយកម្មបាន។ លក្ខខណ្ឌដែលជនបរទេសទាំងនោះត្រូវបំពេញ ដើម្បីសុំសញ្ជាតូបនីយកម្មបាន គឺត្រូវមានគំនិត មារយាទ សីលធម៌ល្អ ពុំដែលមានទោសឧក្រិដ្ឋ ឬបទមជ្ឈិមណាមួយ មានទីលំនៅក្នុងប្រទេសកម្ពុជា ហើយស្នាក់នៅជាប់ចំនួន ៧ឆ្នាំ ដោយបានទទួលបណ្ណស្នាក់នៅដែលចេញឲ្យក្នុងក្របខណ្ឌនៃច្បាប់ស្ដីពីអន្តោប្រវេសន៍។

ទន្ទឹមនេះ ត្រូវចេះនិយាយភាសាខ្មែរ ចេះអក្សរខ្មែរ និងយល់ដឹងប្រវត្តិសាស្ត្រខ្មែរខ្លះៗ ហើយបង្ហាញភស្តុតាងថា ខ្លួនអាចរស់នៅក្នុងសង្គមខ្មែរបានដោយសុខដុម ព្រមទាំងទទួលបានទំនៀមទម្លាប់ និងប្រពៃណីល្អរបស់ខ្មែរ។ បែបបទ និងនីតិវិធីនៃការសុំចូលសញ្ជាតិខ្មែរដោយសញ្ជាតូបនីយកម្ម ត្រូវកំណត់ដោយអនុក្រឹត្យ ហើយការសម្រេចផ្ដល់សញ្ជាតិខ្មែរដោយសញ្ជាតូបនីយកម្ម ត្រូវធ្វើឡើងតាមរយៈព្រះរាជក្រឹត្យ៕

ដោយ៖ ធឿន វ៉ាន់សុង