អ្នកសារព័ត៌មានជាតិ-អន្តរជាតិ ១០៤នាក់ហើយ ត្រូវបាន គ.ជ.ប ទទួលស្គាល់សម្រាប់ការយកព័ត៌មានអំពីដំណើរការបោះឆ្នោត

មន្ត្រីជាន់ខ្ពស់ គ.ជ.ប បានឲ្យដឹងថា ក្នុងរយៈពេល ១៨ថ្ងៃកន្លងមកនេះ គ.ជ.ប បានទទួលស្គាល់អ្នកសារព័ត៌មានជាតិ-អន្តរជាតិ ចំនួន ១០៤នាក់ហើយ សម្រាប់ចូលរួមការយកព័ត៌មានអំពីដំណើរការបោះឆ្នោតជ្រើសតាំងតំណាងរាស្រ្ត នីតិកាលទី ​៧។

កាលពីថ្ងៃទី ១ ខែមេសា ឆ្នាំ ២០២៣កន្លងទៅនេះ គ.ជ.ប បានប្រកាសចាប់ផ្ដើមទទួលពាក្យសុំចុះឈ្មោះអ្នកសារព័ត៌ មានជាតិ-អន្តរជាតិ ដើម្បីចូលរួមយកព័ត៌មានក្នុងដំណើរការ នៃការរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី ៧។  

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ១៨ ខែមេសានេះថា ចាប់ពីថ្ងៃទី ១ ដល់ថ្ងៃទី ១៨ ខែមេសា ឆ្នាំ ២០២៣នេះ គ.ជ.ប បានសម្រេចទទួលស្គាល់អ្នកសារព័ត៌មានជាតិមកពី ៥អង្គភាពចំនួន ៩៥នាក់។ ចំណែកអ្នកសារព័ត៌មានអន្តរជាតិមកពី ៦អង្គភាព ដូចជា៖ Thomsonreuters, EPA, NHK និង The Asahi Shimbun ជាដើម ចំនួន ៩នាក់ ក៏ត្រូវបាន គ.ជ.ប បានសម្រេចទទួលស្គាល់រួចហើយដែរ។

លោកថា​ មកដល់ថ្ងៃទី ១៨ ខែមេសានេះ គ.ជ.ប បានសម្រេចទទួលស្គាល់អ្នកសារព័ត៌មានជាតិ-អន្តរជាតិសរុបចំនួន ១០៤នាក់ហើយ។ ជាមួយគ្នានេះ គ.ជ.ប បាននិងកំពុងពិនិត្យសំណើសុំចុះឈ្មោះ របស់ស្ថាប័នព័ត៌មានជាតិ-អន្តរជាតិមួយចំនួនទៀត។

បើតាម គ.ជ.ប ការចូលរួមយកព័ត៌មាន អំពីដំណើរការបោះឆ្នោតជ្រើសតាំងតំណាងរាស្រ្ត នីតិកាលទី ​៧  ឆ្នាំ ២០២៣ អ្នកសារព័ត៌មានទាំងអស់ ត្រូវមានបណ្ណសម្គាល់ខ្លួនជាអ្នកសារព័ត៌មាន ដែលចេញដោ​យ ​គ.ជ.ប ហើយដើម្បីទទួលបានបណ្ណសម្គាល់ខ្លួន អ្នកសារព័ត៌មានត្រូវដាក់ពាក្យសុំចុះឈ្មោះជាអ្នកសារព័ត៌មានដោយផ្ទាល់នៅ គ.ជ.ប។

សូមជម្រាបថា ការទទួលពាក្យសុំចុះឈ្មោះអ្នកសារព័ត៌មានជាតិ ដើម្បីចូលរួមយកព័ត៌មានក្នុងដំណើរការ នៃការរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី ៧ ចាប់ផ្ដើម​ពី​ថ្ងៃទី ១ ខែមេសា ដល់ថ្ងៃទី ១២ ខែកក្កដា ឆ្នាំ ២០ ២៣។ ចំណែកអ្នកសារព័ត៌មានអន្តរជាតិ ចាប់​ផ្តើ​​​ម​ពី​ថ្ងៃទី ១ ខែមេសា ដល់ថ្ងៃទី ១៩ ខែកក្កដា ឆ្នាំ ២០២៣៕

អត្ថបទ៖ ឃួន សុភ័ក្រ