ព័ត៌មានជាតិ

ក្រសួងកិច្ចការនារីប្រកាសជ្រើសរើសមន្ត្រីរាជការ មាន ៣ វិញ្ញាសាដាក់ឲ្យប្រឡង

បានផុស

១១ ខែ មុន

នៅ

ថ្ងៃព្រហស្បតិ៍ ១៨ ឧសភា ២០២៣

ដោយ

សម្រាប់អ្នកដែលចង់ចូលបម្រើការងាររដ្ឋឬនៅក្នុងក្រសួងនានា ពេលនេះឱកាសបានមកដល់ហើយ ព្រោះក្រសួងកិច្ចការនារី ត្រូវការជ្រើសរើសនិស្សិត និងមន្ត្រីរាជការស៊ីវិល ឱ្យចូលបម្រើការងារ ប្រភេទក្របខណ្ឌ «ក» ចំនួន ៧ កន្លែង សម្រាប់ឆ្នាំ២០២៣ ដែលតម្រូវឱ្យមានកម្រិតបណ្ដុះបណ្ដាលចាប់ពីថ្នាក់បរិញ្ញាបត្រឡើងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីជូនដំណឹងរបស់ក្រសួងកិច្ចការនារី បានឱ្យដឹងថា សម្រាប់ការជ្រើសរើសនិស្សិត និងមន្ត្រីរាជការស៊ីវិល ឱ្យចូលបម្រើការងារក្នុងក្រសួងកិច្ចការនារី សម្រាប់ឆ្នំា២០២៣នេះ ទៅតាមទីតាំងទាំង ៧កន្លែង ដែលមានបែងចែកដូចខាងក្រោម៖

ក. ទីស្តីការក្រសួងកិច្ចការនារី ជ្រើសរើស

១.នាយកដ្ឋានសហប្រតិបត្តិការអន្តរជាតិ

២.នាយកដ្ឋានអភិវឌ្ឍន៍សេដ្ឋកិច្ច

៣.នាយកដ្ឋានការពារផ្លូវច្បាប់

៤.នាយកដ្ឋានស្ត្រី និងសុខភាព

ខ. មន្ទីរកិច្ចការនារីរាជធានី–ខេត្ត ជ្រើសរើស

១.រាជធានីភ្នំពេញ

២.ខេត្តស្វាយរៀង

៣.ខេត្តបាត់ដំបង

លក្ខណនៃការជ្រើសរើសមានដូចជា៖

បេក្ខជនត្រូវមានសញ្ជាតិខ្មែរ
បេក្ខជនត្រូវមានអាយុយ៉ាងតិច ១៨ ឆ្នាំ
បេក្ខជនជាមន្ត្រីរាជការស៊ីវិល ត្រូវបានលើកលែងលក្ខខណ្ឌអាយុ
មិនប្រាសចាកសិទ្ធិខាងផ្លូវរដ្ឋប្បវេណី សិទ្ធិពលរដ្ឋ និងសិទ្ធិខាងនយោបាយ
បេក្ខជនមានពិការភាព បេក្ខជនជានារី អ្នករស់នៅតំបន់ដាច់ស្រយាល ជនជាតិដើមភាគតិច និងមន្ត្រីជាប់កិច្ចសន្យា ក្រសួងកិច្ចការនារី ត្រូវបានផ្ដល់អាទិភាព និងលើកទឹកចិត្ត
សញ្ញាប័ត្រ ឬលិខិតបញ្ជាក់ការសិក្សាគ្រប់កម្រិតបណ្ដុះបណ្ដាលនិងជំនាញ ត្រូវបានកំណត់ប៉ុន្តែក្នុងករណីរកឃើញមានការក្លែងបន្លំសញ្ញាប័ត្រ ឬលិខិតស្នាមផ្សេងៗ បេក្ខជននឹងត្រូវលុបឈ្មោះចេញជាស្វ័យប្រវត្តិ ទោះបីជាបេក្ខជននោះប្រឡងជាប់ស្ថាពរក៏ដោយ។ ម្យ៉ាងវិញទៀត ចំពោះសញ្ញាប័ត្រដែលបានបញ្ចប់ការសិក្សាពីបរទេសត្រូវយកទៅបញ្ជាក់ពីក្រសួងអប់រំ យុវជន និងកីឡា និងសញ្ញាប័ត្រជាភាសាបរទេស(ក្នុងប្រទេស) ត្រូវបញ្ជាក់ជាភាសាខ្មែរពីគ្រឹះស្ថានឧត្ដមសិក្សាសាធារណៈសាមី
បន្ទាប់ពីប្រឡងជាប់ស្ថាពរ បេក្ខជនត្រូវបម្រើការងារនៅតាមអង្គភាពដែលបានដាក់ពាក្យសុំសិទ្ធិប្រឡង ព្រមទាំងរក្សាស្ថានភាពបម្រើការងារនៅអង្គភាពនោះរយៈពេល ៥ ឆ្នាំយ៉ាងតិច ទើបមានសិទ្ធិដាក់ពាក្យស្នើសុំផ្លាស់ប្តូរកន្លែងបម្រើការងារ និងស្នើសុំឱ្យស្ថិតនៅក្នុងភាពទំនេរគ្មានបៀវត្ស
បេក្ខជនសមណ (ជាបព្វជិត ឬព្រះសង្ឃ) ឬមានមុខតំណែងក្នុងរចនាសម្ព័ន្ធគ្រប់គ្រងនៅអគ្គលេខាធិការដ្ឋានពុទ្ធិកសិក្សា នៃក្រសួងធម្មការ និងសាសនា នៅពេលប្រឡងជាប់ស្ថាពរ គឺតម្រូវឱ្យលាចាកសិក្ខាបទ និងមិនរក្សាបានមុខតំណែងឡើយ
បេក្ខជនអាចដាក់ពាក្យសុំសិទ្ធិប្រឡងប្រជែងនៅមន្ទីរកិច្ចការនារីខេត្តបាន ត្រូវមានទីលំនៅពិតប្រាកដក្នុងខេត្ត ឬ មានសហព័ន្ធរស់នៅក្នុងខេត្តនោះ លើកលែងតែបេក្ខជនដាក់ពាក្យសុំសិទ្ធិប្រឡងប្រជែងនៅទីស្ដីការក្រសួង និង មន្ទីរកិច្ចការនារីរាជធានីភ្នំពេញ

ជាមួយគ្នានេះ ពាក់ព័ន្ធនឹងកាលបរិច្ឆេទនិងទីកន្លែងដាក់ពាក្យ ទទួលពាក្យសុំសិទ្ធិប្រឡងប្រជែងនិស្សិត និងមន្ត្រីរាជការស៊ីវិល អាចទាញពាក្យស្នើសុំសិទ្ធិប្រឡងតាមគេហទំព័រក្រសួងកិច្ចការនារី www.mowa.gov.kh & Page Facebook.com/mowa.gov.kh (Ministry of Women’s Affairs of Cambodia) ឬឆាណែលតេឡេក្រាម https://t.me/MoWACambodia។

ក្រសួងចាប់ផ្តើមទទួលពាក្យចាប់ពីថ្ងៃទី១៥ ខែឧសភា ឆ្នាំ២០២៣នេះ រហូតដល់ថ្ងៃទី១៦ ខែមិថុនា ឆ្នាំ២០២៣ ដោយបេក្ខជនជានិស្សិត និងមន្ត្រីរាជការស៊ីវិល ត្រូវមកដាក់ពាក្យសុំសិទ្ធិប្រឡងដោយខ្លួនឯង នៅនាយកដ្ឋាន រដ្ឋបាល បុគ្គលិកនៃទីស្ដីការក្រសួងកិច្ចការនារី។ បន្ថែមពីនេះ បេក្ខជន ក៏ត្រូវភ្ជាប់មកជាមួយឯកសារតម្រូវដូចជា សេចក្ដីចម្លងសញ្ញាប័ត្រច្បាប់ដើម, ថតចម្លងសញ្ញាប័ត្រទុតិយភូមិ, សេចក្ដីចម្លងអត្តសញ្ញាណប័ណ្ណសញ្ជាតិ ខ្មែរ, ថតចម្លងសំបុត្រកំណើត, សៀវភៅគ្រួសារ (ចម្លង ឬច្បាប់ដើម) ហើយករណីមន្ត្រីរាជការស៊ីវិលត្រូវមានលិខិតអនុញ្ញាតឱ្យចូលរួមប្រឡងប្រជែង ព្រមទាំងត្រូវបង់ថ្លៃសុំសិទ្ធិប្រឡងចំនួន ៤០,០០០រៀលផងដែរ។

គួរបញ្ជាក់ដែរថា ក្រសួងកិច្ចការនារី នឹងប្រឡងនៅថ្ងៃទី២៥ ខែមិថុនា ឆ្នាំ២០២៣ខាងមុខនេះ ផ្តើតលើវិញ្ញាសារតែ ៣ប៉ុណ្នោះ ដូចជា ចំណេះដឹងទូទៅ, វិស័យកិច្ចការនារី និងភាសាអង់គ្លេស។ ដោយឡែក សម្រាប់មណ្ឌលប្រឡង ក្រសួង នឹងជូនដំណឹងជាថ្មីម្តងទៀត ដូច្នេះបេក្ខជនប្រឡងគួរតាមដានព័ត៌មាននៅលើគេហទំព័ររបស់ក្រសួងកិច្ចការនារី៕

Related Topics:ក្រសួងកិច្ចការនារី