លោក ប្រាក់ សុខុន៖ ទំនាក់ទំនងកម្ពុជា និងជប៉ុន បានឈានដល់កម្រិតខ្ពស់បំផុត

លោក ប្រាក់ សុខុន រដ្ឋមន្រ្តីការបរទេសកម្ពុជា បានថ្លែងថា ទំនាក់ទំនងទ្វេភាគីកម្ពុជា និងជប៉ុន បានឈានដល់កម្រិតខ្ពស់បំផុត ខណៈប្រទេសទាំងពីរកំពុងអបអរសាទរខួបអនុស្សាវរីយ៍លើកទី៧០នៃការបង្កើតទំនាក់ទំនងការទូត។ លោក ប្រាក់ សុខុន ថ្លែងបែបនេះនៅក្នុងពិធីចុះហត្ថលេខា​លើឯកសារ​នៃការផ្តល់ជំនួយអភិវឌ្ឍន៍របស់ជប៉ុនដល់កម្ពុជា នៅថ្ងៃទី២៤ ខែឧសភានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំងពីរ បានចុះហត្ថលេខាលើឯកសារផ្ដល់ជំនួយជាឥណទានសម្បទានប្រាក់យ៉េន និងហិរញ្ញប្បទានឥតសំណង  ដែលមានទឹកប្រាក់សរុបចំនួន៧ ៥៧១លានយ៉េន ស្មើប្រមាណ​៥៥,២៧លានដុល្លារអាមេរិកសម្រាប់អនុវត្តលើគម្រោងចំនួន​២។ គម្រោងទី១ គឺគម្រោងកែលម្អផ្លូវជាតិលេខ៥ (កំណាត់ផ្លូវពីព្រែកក្តាម-ធ្លាម្អម ដំណាក់កាលទី៤)មានទឹកប្រាក់ចំនួន៧ ២០៥យ៉េន) ឬប្រមាណ៥២,៦លានដុល្លារ។ កញ្ចប់ថវិកានេះ ជាកញ្ចប់ទី៤ សម្រាប់គម្រោងកែលម្អកំណាត់ផ្លូវជាតិលេខ៥ ពីព្រែកក្តាម-ធ្លាម្អម ដែលបានចំណាយថវិកាជាបន្តបន្ទាប់ប្រមាណ៣១៧,៤២ លានដុល្លារអាមេរិក។        

រីឯគម្រោងទី២ គឺគម្រោងអាហារូបករណ៍សម្រាប់ការអភិវឌ្ឍធនធានមនុស្ស ដែលមានទឹកប្រាក់ចំនួន៣៦៦លានយ៉េន ឬប្រមាណ២,៦៧លានដុល្លារអាមេរិក។ ហិរញ្ញប្បទានឥតសំណងនេះ នឹងផ្តល់អាហារូបករណ៍ពេញលេញជូនដល់មន្ត្រីរាជរដ្ឋាភិបាលកម្ពុជាចំនួន២៦កន្លែងមកពីស្ថាប័នផ្សេងៗ ទៅបន្តការសិក្សានៅសាកលវិទ្យាល័យល្បីៗក្នុងប្រទេសជប៉ុន ក្នុងនោះរួមមាន ២៤កន្លែងសម្រាប់ថ្នាក់អនុបណ្ឌិត និង២កន្លែងសម្រាប់ថ្នាក់បណ្ឌិត។

ឆ្លៀតក្នុងឱកាសនោះ តាងនាមរាជរដ្ឋាភិបាល និងប្រជាជនកម្ពុជា  លោក ប្រាក់ សុខុន ប្រមុខការទូតកម្ពុជា បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ដែលបានផ្ដល់ជំនួយជាបន្តបន្ទាប់មកកម្ពុជា។ បើតាម ប្រមុខការទូតរូបនេះ ភាគីជប៉ុនបានជួយកម្ពុជាទាំងតាមរយៈជំនួយ និងកិច្ចសហប្រតិបត្តិការជាច្រើនដែលបានរួមចំណែកដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍសេដ្ឋកិច្ច-សង្គមរបស់ខ្លួន ជាអាទិ៍ ការអភិវឌ្ឍហេដ្ឋារចនាសម្ពន្ធ័វិស័យសុខាភិបាល  អប់រំ, ការផ្គត់ផ្គង់ទឹក, សន្តិសុខ-ការពារជាតិ ប្រតិបត្តិការរក្សាសន្តិភាព និងការតភ្ជាប់រវាងប្រជាជន និងប្រជាជន និងការដោះមីន ជាដើម។

លោក ប្រាក់ សុខុន ក៏បានរំលឹកអំពីការប្តេជ្ញាចិត្តរបស់លោកផ្ទាល់ និងលោក ហាយ៉ាហ្ស៊ី យ៉ូហ្ស៊ីម៉ាសា រដ្ឋមន្រ្តីការបរទេសជប៉ុន នាឱកាសនៃដំណើរទស្សនកិច្ចផ្លូវការរបស់លោកទៅកាន់ប្រទេសជប៉ុនកាលពីដើមឆ្នាំនេះ ក្នុងការពង្រឹងបន្ថែមទៀតនូវទំនាក់ទំនងទ្វេភាគីក្រោមក្របខណ្ឌភាពជា​ដៃគូយុទ្ធសាស្ត្រ​គ្រប់​ជ្រុងជ្រោយ​​​ ដែល​ទើបត្រូវបានដំឡើងកាលពីពេលថ្មីៗនេះ។

ក្នុងឱកាសនោះ កម្ពុជា និងជប៉ុន បានសម្រេចដំឡើងកម្រិតយន្តការពិគ្រោះយោបល់ទ្វេភាគីរបស់ក្រសួងការបរទេសនៃប្រទេសទាំងពីរ និងពង្រីកកិច្ចសហប្រតិបតិ្តការត្រីភាគីស្តីពីការដោះមីនដល់ប្រទេសទីបីផ្សេងទៀត ដោយផ្អែកលើមូល ដ្ឋានមនុស្សធម៌ និងចាប់ផ្តើមឡើងវិញនូវកម្មវិធីស្វែងយល់ពីដំណើរការលទ្ធិប្រជាធិបតេយ្យពហុបក្សនៅប្រទេសជប៉ុនសម្រាប់អ្នកនយោបាយវ័យក្មេងកម្ពុជា​ ក៏ដូចជាឯ​កភាពគ្នា​ពង្រឹងបន្ថែមទៀតភាពជាដៃគូ និង​កិច្ច​សហប្រតិបតិ្តការ​ ក្នុង​ក្របខណ្ឌ​​អង្គការ​សហប្រជាជាតិ និង​ក្របខណ្ឌ​ពាក់ព័ន្ធ​អាស៊ានផងដែរ៕