ខេត្តកែបឈានទៅជាខេត្តទី ៦ បញ្ចប់ការបន្ទោរ​បង់​ពាសវាលពាសកាល

គិតត្រឹមខែ ឧសភា ឆ្នាំ២០២៣ ខេត្តកែបនៅមានខ្នងផ្ទះពលរដ្ឋចំនួន ១៩៨ ខ្នងផ្ទះទៀត ដែលគ្មានបង្គន់សម្រាប់ប្រើប្រាស់ ឬស្មើនឹង ២%នៃចំនួនខ្នងផ្ទះដែលមានបង្គន់ប្រើប្រាស់រហូត ៩៨% ទូទាំងខេត្ត។ តាមផែនការត្រឹមពាក់កណ្តាល​ខែមិថុនា ឆ្នាំ២០២៣ ខាងមុខនេះ ខេត្តកែបនឹងបញ្ចប់ទាំងស្រុងនូវការបន្ទោរបង់ពាសវាលពាសកាល។ 

លោក ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទបានលើកឡើងថា ដោយមានការជំរុញពីថ្នាក់ដឹកនាំនៃក្រសួងអភិវឌ្ឍន៍ជនបទ និងថ្នាក់ដឹកនាំខេត្ត នឹងខិតខំគ្រប់មធ្យោបាយឱ្យខ្នងផ្ទះដែលនៅខ្វះបង្គន់ទាំងអស់មានបង្គន់ប្រើប្រាស់ ១០០% ដើម្បីឈានទៅសម្រេចនូវគោលដៅដែលដាក់ខេត្តកែបជាខេត្តលេខរៀងទី ៦ ក្នុងការបញ្ចប់ការបន្ទោរ​បង់​ពាសវាល​ពាសកាលក្នុងឆ្នាំ២០២៣។ 

យោងរបាយការណ៍សិក្សា​បានរកឃើញថា ខ្នងផ្ទះដែលគ្មានបង្គន់ទាំង ១៩៨ ខ្នងផ្ទះចែកជា ៣ ប្រភេទ ក្នុងនោះទី១. មាន ១៥ ខ្នងផ្ទះគឺជាគ្រួសារមានលទ្ធភាពតែមិនព្រមសាងសង់ ទី២. គឺ ៧៦ ខ្នងផ្ទះគឺជាគ្រួសារខ្វះលទ្ធភាព (ក្រីក្រ) និងទី៣.គឺ ៨៥ខ្នងផ្ទះទៀត គឺស្ថិតក្នុងតំបន់មិនរៀបរយ (សំណង់អាណាធិបតេយ្យ)។ 

លោក សោម ពិសិដ្ឋ អភិបាលខេត្តកែបបានបញ្ជាក់ថា ក្នុងចំណោម ១៨ ភូមិទូទាំងខេត្តកែប ក្នុងនោះមាន ២ ទៅ ៣ ភូមិស្ថិតក្នុងភូមិសាស្រ្តស្រុកនិងបណ្តាតំបន់សំណង់​មិនរៀបរយ។ ខ្លះនៃភូមិសាស្រ្តក្រុងនៅមិនទាន់មានបង្គន់ប្រើប្រាស់ ភាគច្រើនគឺនៅឃុំអង្កោល ស្រុកដំណាក់ចង្អើរ និងសង្កាត់អូរក្រសារ ក្រុងកែប។ តែយ៉ាងណារដ្ឋបាល​នឹង​សហការយ៉ាងយកចិត្តទុក ដើម្បីឈានទៅប្រកាសខេត្តកែបក្លាយជាខេត្តបញ្ចប់ការបន្ទោរបង់ពាសវាលពាសកាលនៅក្នុងអាណត្តិទី ៦ នេះ៕

អត្ថបទ៖ សឹង រ៉ាត់