ព័ត៌មានជាតិ
ពលរដ្ឋឃុំថ្មស កាន់តែទទួលបានសុវត្ថិភាព ក្រោយមានអគារសម្រាកប្រកបដោយផាសុកភាព
ក្រុមប្រជាពលរដ្ឋ ពិសេសស្ត្រីរស់នៅក្នុងឃុំថ្មស ស្រុកបូទុមសាគរ នឹងកាន់តែទទួលបានសុខសុវត្ថិភាពទ្វេដង បន្ទាប់ពីមានអគារថ្មីសម្រាកមុន និងក្រោយសម្រាល ប្រកបដោយផាសុកភាព។
ថ្លែងក្នុងពិធីសម្ពោធឲ្យប្រើប្រាស់សមិទ្ធផលថ្មីមានជាអគារសម្រាកមុន និងក្រោយពេលសម្រាលផ្ទៃពោះ លោក អ៊ួន សារុន ប្រធានមណ្ឌលសុខភាពថ្មស បានឲ្យដឹងថា អគារដែលជាសមិទ្ធផលថ្មីនៅក្នុងឃុំថ្មស មានចំនួន ៤ បន្ទប់ បែងចែកជាបន្ទប់សម្រាកត្រៀមសម្រាលកូន ,បន្ទប់ស្ត្រីសម្រាកសម្រាលកូន ,បន្ទប់ពលរដ្ឋសម្រាកថែទាំជំងឺរយៈពេលខ្លី ,និងបន្ទប់សង្គ្រោះបឋម និងវះកាត់តូច ត្រូវបានដាក់បញ្ចូលទៅក្នុងផែនការរំកិល ៥ ឆ្នាំ របស់ឃុំ ជាអាទិភាពទៅក្នុងផែនការអភិវឌ្ឍន៍ប្រចាំឆ្នាំនីមួយៗ។
លោក អ៊ួន សារុន គូសបញ្ជាក់ទៀតថា បើធៀបនឹងអគារចាស់សង់ពីឈើប្រក់ស័ង្កសីមាន ២ បន្ទប់ និងមានសំយាកសម្រាប់ចង្ក្រានដាំស្ល កន្លងមកដោយមានការពុកផុយ និងបាក់បែកជាបណ្តើរៗ។ ហើយការស្នើសុំនេះ ជិត ១០ ឆ្នាំ ទើបតែនៅដើមឆ្នាំ ២០២២ សមាជិកក្រុមប្រឹក្សាឃុំថ្មស ទាំងអស់ បានយល់ព្រមឯកភាពរួមគ្នា ដាក់ការសាងសង់អគារស្នាក់នៅមុន និងក្រោយសម្រាល ចូលក្នុងផែនការអភិវឌ្ឍន៍ឃុំសង្កាត់សម្រាប់ឆ្នាំ ២០២២ (អាទិភាពទី ១)។
តែទោះយ៉ាងណា ចាប់ពីថ្ងៃនេះទៅ លោកប្រធានមណ្ឌលសុខភាពថ្មស រំពឹងថា ស្ត្រីនៅក្នុងមូលដ្ឋាន នឹងលែងព្រួយបារម្ភពីការមកទទួលសេវាសម្រាកសម្រាលកូនទៀតហើយ ខណៈមានអគារថ្មីត្រៀមចាំបម្រើសេវាគ្រប់ពេលវេលា។
មណ្ឌលសុខភាពថ្មស មានការប្រចាំការ ២៤ ម៉ោង និងបម្រើសេវា ៧ ថ្ងៃ ក្នុង ១ សប្ដាហ៍។ បើគិតជាមធ្យម ក្នុង ១ ខែៗ មណ្ឌលសុខភាពបានផ្ដល់សេវាពិគ្រោះពិនិត្យជំងឺក្រៅចន្លោះពី ៣៥០ នាក់-៤៥០ នាក់។ ការពិនិត្យផ្ទៃពោះសរុប ចន្លោះពី ៤០-៥០ នាក់។ ចាក់វ៉ាក់សាំងដល់កុមារក្រោម ២ ឆ្នាំ ចន្លោះពី ៥០ នាក់-៦០ នាក់។ សម្រាលកូន ជាមធ្យមចំនួន ៨-១០ នាក់។ ការពន្យារកំណើតស្ត្រីវ័យបន្តពូជ បន្ត(មានប្ដី) ជិត ៩០០ នាក់។ និងប្រព័ន្ធបញ្ជូនទៅមន្ទីរពេទ្យបង្អែកចន្លោះពី ៣-៥ ជើង។
លោក ក្រូច បូរីសីហា អភិបាលស្រុកបូទុមសាគរ បានចាត់ទុកសមិទ្ធផលថ្មីនេះជាអាទិភាពលើវិស័យសុខាភិបាលក្នុងមូលដ្ឋានដែលមានមណ្ឌលសុខភាពលក្ខណៈស្តង់ដារល្អប្រណិតមួយ ដើម្បីបង្កលក្ខណៈងាយស្រួលដល់ប្រជាពលរដ្ឋមកទទួលសេវាពិនិត្យ និងព្យាបាល មិនចាំបាច់ទៅកន្លែងផ្សេងឆ្ងាយ និងចំណាយថវិកាច្រើននោះទេ។
លោកអភិបាលស្រុកបូទុមសាគរ ក៏គាំទ្រពេញទំហឹងនូវសកម្មភាពចូលរួមរបស់សប្បុរសជន និងអាជ្ញាធរមូលដ្ឋាន ដែលប្រឹងប្រែងកៀរគរថវិកាមកអភិវឌ្ឍន៍ឲ្យចេញជារូបរាងនូវអគារថ្មីសន្លាងនេះឡើង ព្រមទាំងជាសក្ខីភាពផ្ដល់ទំនុកចិត្តពីមហាជនលើកិច្ចការលើកកម្ពស់វិស័យសុខាភិបាលកាន់តែល្អប្រសើរ។
មណ្ឌលសុខភាពថ្មស ចាប់ផ្ដើមសាងសង់ថ្មីក្នុងឆ្នាំ ២០០៥ និងដាក់ឲ្យមានដំណើរការបម្រើសេវាសុខភាពពេញលេញជូនប្រជាពលរដ្ឋ នៅថ្ងៃទី ១២ ខែមករា ឆ្នាំ ២០០៦ ដោយមានការគិតគូរពីសុខុមាលភាពប្រជាពលរដ្ឋ មន្ទីរសុខាភិបាលខេត្តកោះកុង បានប្រគល់ឡានពេទ្យ ១ គ្រឿង ក្នុងឆ្នាំ ២០១៤ ដើម្បីងាយស្រួលក្នុងការបញ្ជូនទៅមន្ទីរពេទ្យបង្អែកស្រុក។
មណ្ឌលសុខភាពថ្មស សព្វថ្ងៃ មានបុគ្គលិកបម្រើការងារប្រុស-ស្រី ចំនួន ១០ នាក់ ក្នុងនោះមានឆ្មប ៣ នាក់ វេជ្ជបណ្ឌិត ១ នាក់ គិលានុបដ្ឋាក ៥ នាក់ និងកម្មករ ១ នាក់។ ក្រៅពីសេវាពិនិត្យជំងឺទូទៅ មណ្ឌលសុខភាព ក៏ត្រួតពិនិត្យមាត់ស្បូនដើម្បីស្រាវជ្រាវរកមហារីកស្បូនលើស្ត្រី និងមានចាក់វ៉ាក់សាំងការពារមហារីកមាត់ស្បូនលើកុមារីក្នុងអាយុ ៩ ឆ្នាំ ក្នុងខែសីហា ក្រោយនេះ។ ផ្ដល់សេវាស្រាវជ្រាវរកមេរោគ ដើម្បីព្យាបាលជំងឺឆ្លង ដូចជាគ្រុនចាញ់ និងរបេងជាដើម(ដោយមិនគិតថវិកា) និងតាមដានជំងឺមិនឆ្លងក្នុងសហគមន៍ ដូចជាជំងឺទឹកនោមផ្អែម និងលើសសំពាធឈាម ពិសេសប្រជាជនដែលមានអាយុលើស ៥០ ឆ្នាំ។
បច្ចុប្បន្នមណ្ឌលសុខភាពគ្របដណ្ដប់ប្រជាជនចំនួន ៩ ៩៩៤ នាក់ មាន ១ ឃុំ និង ៥ ភូមិ ជារៀងរាល់ខែ បុគ្គលិក ២ រូប ធ្វើការចុះផ្ដល់សេវាសុខភាពដល់មូលដ្ឋានចំនួន ៣ នៃភូមិឆ្ងាយជាងគេ មានភូមិចំការលើ ភូមិស្រែថ្មី និងភូមិចំលងគោ៕
អត្ថបទ ៖ សិរីវឌ្ឍនៈ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ