ជាង២ទសវត្ស ប.ស.ស បានរក្សាជំហរយ៉ាងរឹងមាំសម្រាប់បម្រើផលប្រយោជន៍ពលរដ្ឋ

រយៈពេលជាង២ទសវត្សដែលរបបសន្ដិសុខសង្គម (ប.ស.ស) បានងើបឈរឡើងវិញ និងរក្សាជំហរយ៉ាងរឹងមាំសម្រាប់បម្រើផលប្រយោជន៍ជូនប្រជាពលរដ្ឋកម្ពុជា។ នេះបើការថ្លែងឲ្យដឹងរបស់លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម។

ក្នុងបាឋកថា ក្រោមប្រធានបទស្តីពី«គោលការណ៍គ្រឹះនៃប្រព័ន្ធសន្តិសុខសង្គម» លោក អ៊ុក សមវិទ្យា បានថ្លែងថា គិតរហូតមកដល់សព្វថ្ងៃនេះ របបសន្ដិសុខសង្គមកម្ពុជា មានអាយុកាលជាង២ទសវត្សមកហើយ ដែលបានវិវត្តន៍ខ្លួនបន្ដិចម្ដងៗ ហើយដើម្បីរួមគ្នាបន្ដរក្សាជំហរការពារនូវផលប្រយោជន៍របស់ប្រជាពលរដ្ឋ ក្នុងការអនុវត្តរបបសន្ដិសុខសង្គមនៅកម្ពុជា។ លោក បានបន្តថា ថ្នាក់ដឹកនាំគ្រប់លំដាប់ថ្នាក់ ក៏ដូចជាបុគ្គលិកទាំងអស់នៃបេឡាជាតិសន្តិសុខសង្គម ត្រូវតែខិតខំឈ្វេងយល់ និងដឹងឱ្យបានកាន់តែច្បាស់ពីគោលការណ៍គ្រឹះនៃប្រព័ន្ធសន្តិសុខសង្គម។

បើតាមលោក អ៊ុក សមវិទ្យា ស្ទើរតែពេញមួយជីវិតដែលលោកបានខិតខំប្រឹងប្រែងយ៉ាងខ្លាំងក្នុងការចូលរួមអភិវឌ្ឍន៍ របបសន្ដិសុខសង្គមមួយនេះ រហូតទទួលបានភាពរីកចម្រើន និងជោគជ័យជាបន្ដបន្ទាប់។ ដូច្នេះ លោកថា វគ្គបណ្តុះបណ្តាលនាពេលនេះ គឺជាពេលវេលាដ៏មានសារៈសំខាន់បំផុតសម្រាប់ថ្នាក់ដឹកនាំ ប.ស.ស. គ្រប់លំដាប់ថ្នាក់ ត្រូវតែយកចិត្តទុកដាក់ស្តាប់ ដើម្បីជាចំណេះដឹងមូលដ្ឋាន អាចយកទៅវិភាគហានិភ័យសង្គម ក៏ដូចជាការរៀបចំនូវលិខិតបទដ្ឋាន ធ្វើយ៉ាងណាឱ្យមានសន្តិសុខសេដ្ឋកិច្ចសម្រាប់បុគ្គលគ្រប់រូប។

លោកសង្ឃឹមយ៉ាងមុតមាំថា បន្ទាប់ពីបញ្ចប់វគ្គបណ្តុះបណ្តាលនេះ សិក្ខាកាមដែលជាថ្នាក់ដឹកនាំ ប.ស.ស. គ្រប់ៗរូប នឹងយកចំណេះដឹងទាំងអស់នេះ ទៅពង្រឹងលើសមត្ថភាពរបស់ខ្លួនដែលមានស្រាប់ ដើម្បីបន្ដអនុវត្តរបបសន្តិសុខសង្គមមួយនេះឱ្យកាន់តែមានប្រសិទ្ធភាពរីកចម្រើនបន្ថែមទៀត ជាពិសេសជួយលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង ក៏ដូចជាជួយដល់សង្គមជាតិទាំងមូលផងដែរ៕