ព័ត៌មានជាតិ

ភ្ញៀវទេសចរជាតិចំណាយម្នាក់ៗ ជាមធ្យម ៥០ ដុល្លារ លើការស្នាក់នៅ ៣ ថ្ងៃ ២ យប់

បានផុស

៣ years មុន

នៅ

ថ្ងៃព្រហស្បតិ៍ ២២ មិថុនា ២០២៣

ដោយ

រយៈពេលស្នាក់នៅមធ្យម ៣ ថ្ងៃ ២ យប់ និងការចំណាយរបស់ភ្ញៀវទេសចរជាតិម្នាក់ៗ ជាមធ្យមគឺ ៥០ ដុល្លារ ដែលជាការកត់សម្គាល់នាឆ្នាំ ២០២២ កន្លងទៅនេះ។ នេះបើយោងតាមរបាយការណ៍របស់ក្រសួងទេសចរណ៍ ដែលទើបចេញជាផ្លូវការថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសសន្និបាតបូកសរុបការងារទេសចរណ៍ ការបូកសរុបផែនការស្ដារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩ ឆមាសទី ២ ឆ្នាំ ២០២២ ឆមាសទី ១ ឆ្នាំ ២០២៣ និងលើកទិសដៅអនុវត្តបន្តឆ្នាំ ២០២៣-២០២៤ កាលពីថ្ងៃទី ២១ ខែមិថុនា ឆ្នាំ ២០២៣ នៅសណ្ឋាគារសុខារ៉េស៊ីដង់ភ្នំពេញ បើតាមរបាយការណ៍ក្រសួងទេសចរណ៍ បានអះអាងថា រយៈពេលស្នាក់នៅមធ្យម ៣ ថ្ងៃ ២ យប់ និងចំណាយរបស់ភ្ញៀវទេសចរជាតិម្នាក់ៗ ជាមធ្យម ៥០ ដុល្លារ។ ហើយនៅឆ្នាំ ២០២២ វិស័យទេសចរណ៍ ក៏បានបង្កើតមុខរបរ និងការងារដល់ប្រជាជនប្រមាណ ៣២ ម៉ឺននាក់ផងដែរ។

របាយការណ៍បានបញ្ជាក់ថា ពេញមួយឆ្នាំ ២០២២ កន្លងទៅ កម្ពុជា ទទួលបានចំណូលពីភ្ញៀវទេសចរអន្តរជាតិប្រមាណ ១,៤១៥ លានដុល្លារអាមេរិក និងទទួលបានពីភ្ញៀវទេសចរជាតិប្រមាណ ៦៥០ លានដុល្លារអាមេរិក ដោយបានរួមចំណែកជាមួយផលិតផលក្នុងស្រុកសរុប (GDP) ប្រមាណ ៣.៦% នៃផលិតផលក្នុងស្រុកសរុប។

របាយការណ៍ដដែលបានបន្តថា នៅឆ្នាំ ២០២២ កន្លងទៅ កម្ពុជា ទទួលបានភ្ញៀវទេសចរអន្តរជាតិប្រមាណ ២.២៨ លាននាក់ កើនឡើង ១០៥៨.៦% និងភ្ញៀវទេសចរជាតិ ១៣.៩៣ លាននាក់ កើនឡើង ១៩៨.៨%។ ចំណែកឯភ្ញៀវទេសចរជាតិដែលចេញក្រៅប្រទេសមានចំនួនប្រមាណ ៩៧ ម៉ឺននាក់ កើនឡើង ៣០៧៩.៥%។

គួរជម្រាបថា រយៈពេល ៥ ខែ ដើមឆ្នាំ ២០២៣ កម្ពុជា ទទួលបានភ្ញៀវទេសចរអន្តរជាតិជាង ២.១៦ លាននាក់ កើនឡើង ១,០៥៩% ធៀបនឹងឆ្នាំ ២០២១ និងកើនលើសចំនួនមុនពេលវិបត្តិជំងឺកូវីដ-១៩។

ក្រសួងទេសចរណ៍ ក៏រំពឹងទុកថា ពេញមួយឆ្នាំ ២០២៣ នេះ នឹងទទួលទេសចរអន្តរជាតិប្រមាណ ៤.៥ លាននាក់ និងទេសចរក្នុងស្រុកប្រមាណ ១៦ លាននាក់៕

អត្ថបទ ៖ ពិសី