អភិបាលខេត្តកែប ណែនាំ​មន្រ្តីសុរិយោដី ៣ ចំណុច មុនចុះទៅអនុវត្តវាស់វែងដីជូនពលរដ្ឋ

នៅក្នុងពិធីប្រកាសតំបន់វិនិច្ឆ័យចុះបញ្ជីដីធ្លី​មានលក្ខណៈជាប្រព័ន្ធជូនបងប្អូនប្រជាពលរដ្ឋ ដែលរស់នៅក្នុងភូមិចំការ ៣ ឃុំពងទឹក ស្រុកដំណាក់ចង្អើរ លោក សោម ពិសិដ្ឋ អភិបាលខេត្តកែបបានលើក​ឡើង​ ៣ ចំណុច សម្រាប់ក្រុមការងារបច្ចេកទេសសុរិយាដី​យកទៅអនុវត្តក្នុងដំណើរការ ចុះបញ្ជីដីធ្លីមានលក្ខណៈជា​ប្រព័ន្ធ ទី១-មិនអាចចេញប័ណ្ណកម្មសិទ្ធិដោយ​គ្មានឯកសារបញ្ជាក់នោះទេ ២-ដីព្រៃលិចទឹក ដីគម្របព្រៃឈើមិនអាចវាស់វែងបានទេ ៣-ក្នុងការវាស់វែងដីត្រូវទុកផ្លូវ​ចាប់ពី ៨ ម៉ែត្រឡើងទៅ។

លោក សោម ពិសិដ្ឋ អភិបាលខេត្តកែបបាន​បន្ត​ថា ក្រោយពីការចុះបញ្ជីដីធ្លីនេះរួច ប្រជាពលរដ្ឋដែលជាម្ចាស់ក្បាលដី នឹង​ក្លាយជាម្ចាស់ដីពិតប្រាកដ មានសិទ្ធិស្របច្បាប់ក្នុងការកាន់កាប់ប្រើប្រាស់អាស្រ័យផល។ មិនត្រឹមតែប៉ុណ្ណោះបណ្ណកម្មសិទ្ធិ​នេះ គឺជាឯកសារគតិ​យុត្តសម្រាប់ជាការសំអាង នៅពេលមានបញ្ហាផ្សេងៗកើតឡើង បញ្ជាក់ថាខ្លួនជាម្ចាស់ដីធ្លីពិតប្រាកដ។

ជាមួយគ្នានោះដែរ លោក​អភិបាលខេត្តកែបចេញការ​ព្រមាន​ធ្ងន់ៗ បើមានមន្រ្តីសុរិយោដីមួយណាបឬរូបណា ដែលទាមទារយកលុយកាក់ពីប្រជាពលរដ្ឋដើម្បីចុះវាស់វែងដីធ្លីជូនបងប្អូន ត្រូវរាយការណ៍មកជាបន្ទាន់ឬមកកាន់អាជ្ញាធរ ឬមកកាន់រូបលោកជាអធិបាលខេត្តផ្ទាល់ ដើម្បីលោកមានវិធានការជាមួយមន្រ្តីរូបនោះតែម្តង។

បើយោងតាមរបាយការណ៍របស់ លោក ឈុំ ម៉ានី ប្រធានស្តីទីនៃមន្ទីររៀបចំដែនដីនគរូបនីយ កម្មសំណង់ និងសុរិយោ​ដីខេត្តកែបបានឲ្យដឹងថា ការចុះអនុវត្តន៍បញ្ជីដីធ្លីលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លីខេត្តសរុបបានចំនួន ១៨ ភូមិ និងបានចែកប័ណ្ណកម្មសិទ្ធិជូនប្រជាពលរដ្ឋបានចំនួន ១៣ ភូមិ នៅ ៤ ភូមិ ទៀតដែលបានរៀបចំបិទផ្សាយ និង ០១ ភូមិគឺភូមិចំការបីកំពុងប្រកាសតំបន់វិនិច្ឆ័យចុះរបស់វែងដែលជាភូមិចុងក្រោយគេផងដែរ៕

អត្ថបទ៖ សឹង រ៉ាត់