ព្រឹកស្អែក នាយករដ្ឋមន្ត្រីកម្ពុជា នឹងអញ្ជើញចុះសួរសុខ ទុក្ខ កម្មករ កម្មការនី ជិត២ម៉ឺននាក់ នៅក្រុងតាខ្មៅ

នៅព្រឹកស្អែក ថ្ងៃទី០១ ខែកញ្ញា នាយករដ្ឋមន្ត្រីកម្ពុជា ឯកឧត្ដម ហ៊ុ​ន ម៉ាណែត នឹងអញ្ជើញចុះសួរសុខទុក្ខកម្មករ កម្មការនី ចំនួន ១៨ ២៨៩នាក់ នៅក្នុងភូមិសាស្ត្រក្រុងតាខ្មៅ ខេត្តកណ្ដាល។

នេះ គឺជាដំណើរចុះសួរសុខទុក្ខកម្មករ កម្មការនី ជាលើកទី២ហើយ បន្ទាប់ពីឯកឧត្ដមកិត្តិទេសាភិបាលបណ្ឌិត ហ៊ុ​ន ម៉ាណែត ចូលកាន់តំណែងជានាយករដ្ឋមន្ត្រីកម្ពុជា ជាផ្លូរការកាលពីថ្ងៃទី ២២ខែសីហា ឆ្នាំ ២០២៣ កន្លងទៅ។ ដំណើរចុះសួរសុខទុក្ខកម្មករកម្មការនីជាលើកទី២នេះ នាយករដ្ឋមន្រ្តីកម្ពុជា ត្រូវចុះជួបកម្មករ កម្មការនីចំនួន ១៨ ២៨៩ នាក់ ដែលក្នុងនោះ មានស្ត្រីមានផ្ទៃពោះចំនួន ៦២៦ នាក់។

ក្នុងចំណោមកម្មករ កម្មការនីជិត២នាក់នេះ គឺមកពីរោងចក្រសហគ្រាសចំនួន១៤ ក្នុងនោះ រោងចក្រកាត់ដេរចំនួន ៨រោងចក្រ រោងចក្របោកគក់សម្លៀកបំពាក់ចំនួន៣ រោងចក្រតម្បាញចំនួន២ និងរោងចក្រស្បែកជើងចំនួន១រោងចក្រ។

សូមបញ្ជាក់ថា មុនជំនួបជាមួយកម្មករ កម្មការិនីនៅព្រឹកស្អែកនេះ ឯកឧត្ដមបណ្ឌិត ហ៊ុន ម៉ាណែត បានចុះជួបកម្មករ កម្មការនី ក្នុងនាមជានាយករដ្ឋមន្ត្រីកម្ពុជាម្តងរួចមកហើយ គឺកាលពីថ្ងៃទី២៩ ខែសីហា ឆ្នាំ២០២៣ នៅតំបន់ព្រៃស្ពឺ ខណ្ឌ ពោធិ៍សែនជ័យ រាជធានីភ្នំពេញ ចំនួន១៨ ០០០នាក់ មកពីរោងចក្រសហគ្រាសចំនួន ១៣៕

អត្ថបទដោយ៖ ង៉ិល ណារ៉ាត់