សម្តេចធិបតី ហ៊ុន ម៉ាណែត ផ្តាំផ្ញើដល់អង្គគណៈរដ្ឋមន្ត្រីថា ពេលនេះជាពេលដែលត្រូវធ្វើសកម្មភាពឲ្យបានសម្រេចលទ្ធផលជាក់ស្តែង  

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានផ្តាំផ្ញើសមាជិក-សមាជិកាគណៈរដ្ឋមន្ត្រី ថា ពេលនេះជាពេលដែលត្រូវធ្វើសកម្មភាព ឲ្យបានសម្រេចលទ្ធផលជាក់ស្តែង តាមការសន្យា។ នេះបើតាមការឲ្យដឹងពីលោក ប៉ែន បូណា អ្នកនាំពាក្យរាជរដ្ឋាភិបាល។

លោក ប៉ែន បូណា បានបង្ហោះសារនៅលើគណនីហ្វេសប៊ុករបស់លោក នារសៀលថ្ងៃទី ២០ ខែកញ្ញា ឆ្នាំ ២០២៣ នេះថា កាលពីកិច្ចប្រជុំគណៈរដ្ឋមន្ត្រីលើកដំបូង នៅថ្ងៃទី ២៤ សីហា ឆ្នាំ ២០២៣ សម្តេចមហាបវរធិបតី ហ៊ុន ម៉ាណែត បានប្រកាសដាក់ចេញយុទ្ធសាស្ត្របញ្ចកោណ ដែលជាគោលនយោ​បាយលើកស្ទួយសង្គមសេដ្ឋកិច្ចនៅកម្ពុជា។ ក្នុងនោះ មានអាទិភាព ៦ យ៉ាងដែលសម្តេចធិបតីនាយករដ្ឋមន្ត្រីប្រកាសថា នឹងដាក់ឲ្យអនុវត្តភ្លាមៗចាប់ពីឆ្នាំ ២០២៣ នេះតទៅ។

អ្នកនាំពាក្យរាជរដ្ឋាភិបាល បានសរសេរបន្តថា នៅក្នុងកិច្ចប្រជុំគណៈរដ្ឋមន្ត្រីលើកទី ២ នាព្រឹកថ្ងៃទី ២០ កញ្ញា ឆ្នាំ ២០២៣នេះ ពោលគឺមិនទាន់បានមួយខែផង គណៈរដ្ឋមន្ត្រី បានពិភាក្សា និងអនុម័តរបាយការណ៍វឌ្ឍភាព នៃការរៀបចំយន្តការអនុវត្តគោលនយោបាយ អាទិភាពទាំង ៦ សម្រាប់ប្រកាសអនុវត្តមុនដំណាច់ឆ្នាំ ២០២៣។

បន្ថែមពីលើនេះទៀត សេចក្តីព្រាងយុទ្ធសាស្ត្រជាតិ ស្តីពី អភិវឌ្ឍសេដ្ឋកិច្ចក្រៅប្រព័ន្ធ (ឆ្នាំ ២០២៣-២០២៨) ដែលមានចែងក្នុងយុទ្ធសាស្ត្របញ្ចកោណដែរនោះ ក៏ត្រូវបានកិច្ចប្រជុំពេញអង្គគណៈរដ្ឋមន្ត្រីលើកទី ២លើក យកមកពិភាក្សា និងអនុម័ត។

រីឯសេចក្តីព្រាងព្រះរាជក្រឹត្យ ស្តីពី ការរៀបចំ និងការប្រព្រឹត្តទៅ នៃគណៈកម្មាធិការកែទម្រង់រដ្ឋបាលសាធារណៈ និងសេចក្តីព្រាងអនុក្រឹត្យ ស្តីពី ការរៀបចំនិងការប្រព្រឹត្តទៅ នៃក្រសួងមុខងារសាធារណៈដែលជាស្នូលនៃកំណែទម្រង់ នៅក្នុងយុទ្ធសាស្ត្របញ្ចកោណ ក៏ត្រូវបានពិភាក្សា និងអនុម័តរួចរាល់ដែរ។

លោក ប៉ែន បូណា អ្នកនាំពាក្យរាជរដ្ឋាភិបាល បានបន្ថែមបែបនេះថា «សម្តេចមហាបវរធិបតីនាយករដ្ឋមន្ត្រីបានផ្តាំផ្ញើដល់អង្គគណៈរដ្ឋមន្ត្រីថា ពេលនេះជាពេលដែលយើងទាំងអស់គ្នា ត្រូវធ្វើសកម្មភាពឲ្យបានសម្រេចលទ្ធផលជាក់ស្តែងតាមការសន្យា ពោលគឺមិនមែននិយាយហើយ តែធ្វើមិនបាននោះឡើយ»។

បើតាមអ្នកនាំពាក្យដដែល គឺរាជរដ្ឋាភិបាល នីតិកាលទី ៧ នៃរដ្ឋសភាដឹកនាំដោយសម្តេចធិបតី ហ៊ុន ម៉ាណែត គឺជារាជរដ្ឋាភិបាលកំណែទម្រង់ និងជារាជរដ្ឋាភិបាល ដែលធ្វើសកម្មភាពភ្លាមៗ លឿនរហ័ស ដោយផ្តោតសំខាន់លើការលើកកម្ពស់ជីវភាពប្រជាពលរដ្ឋ គាំពារប្រជាពលរដ្ឋ យកចិត្តទុកដាក់ចំពោះប្រជាពលរដ្ឋ ជាពិសេសប្រជាពលរដ្ឋក្រីក្រ និងងាយរងគ្រោះ ដែលទទួលបានផលមុនគេ៕