ការផ្តល់សេវាសាធារណៈក្នុងវិស័យដឹកជញ្ជូន ផ្លូវគោក អនុវត្តតាមទីតាំងផ្តល់សេវា​កំណត់ដោយក្រសួងសាធារណការ

នៅថ្ងៃទី១៨ ខែតុលា ឆ្នាំ២០២៣ នេះ ក្រសួងសាធារណការ និងដឹកជញ្ជូន បានពិនិត្យឃើញមានការចុះផ្សាយព័ត៌មានលើការផ្តល់សេវាសាធារណៈនៅលើបណ្តាញសង្គមដែលអះអាងថាជាអ្នកបម្រើសេវាសាធារណៈរបស់ក្រសួងរួមមាន ៖ សេវាប្រឡងយកបណ្ណបើកបរយានយន្ត សេវាធ្វើបណ្ណបើកបរយានយន្ត សេវាធ្វើបណ្ណសម្គាល់យានយន្ត សេវាធ្វើលិខិតអនុញ្ញាតឱ្យយានយន្តធ្វើអាជីវកម្មដឹកជញ្ជូនអ្នកដំណើរ/ទំនិញ និងសេវា ធ្វើវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ដោយពុំចាំបាច់យកយានយន្តមកត្រួតពិនិត្យនៅកន្លែងផ្តល់សេវាឡើយ ការណ៍នេះ ផ្ទុយពីការពិត បង្កឱ្យមានការភាន់ច្រឡំដល់ប្រជាពលរដ្ឋលើការផ្តល់សេវាសាធារណៈរបស់ក្រសួងសាធារណការ និងដឹកជញ្ជូន។

ជាមួយនោះ ក្រសួងសាធារណការ និងដឹកជញ្ជូន សូមជម្រាបជូនប្រជាពលរដ្ឋទាំងអស់ ប្រើប្រាស់សេវាសាធារណៈរបស់ក្រសួង មេត្តាជ្រាបថា ការផ្តល់សេវាសាធារណៈក្នុងវិស័យដឹកជញ្ជូន ផ្លូវគោក គឺអនុវត្តនៅតាមទីតាំងផ្តល់សេវាដែលកំណត់ដោយក្រសួងសាធារណការ និងដឹកជញ្ជូន និងទីតាំងផ្តល់សេវា នៃអង្គភាព ឬការិយាល័យច្រកចេញចូលតែមួយរបស់រដ្ឋបាលថ្នាក់ក្រោមជាតិ ឬតាមប្រព័ន្ធស្វ័យប្រវត្តិកម្មផ្លូវការរបស់ក្រសួង (https://transportlicense.mpwt.gov.kh /, https://vehicle.mpwt.gov.kh/ , https://driverlicense.mpwt.gov.kh/, https://techinspection.mpwt.gov.kh/) និងអនុវត្តតាមនីតិវិធី​ដូចមានចែងក្នុងលិខិតបទដ្ឋានគតិយុត្ត ហើយការបង់កម្រៃសេវាសាធារណៈខាងលើនេះ ត្រូវអនុលោមតាមប្រកាស អន្តរក្រសួងលេខ១៤៦០ សហវ.ប្រក ចុះថ្ងៃទី៣១ ខែធ្នូ ឆ្នាំ២០១៩ ស្ដីពីការផ្តល់សេវាសាធារណៈដោយក្រសួងសាធារណការ និងដឹកជញ្ជូន។

ក្រសួងសាធារណការ និងដឹកជញ្ជូន ក៏បានអំពាវនាវដល់ប្រជាពលរដ្ឋទាំងអស់ សូមមេត្តាប្រើប្រាស់សេវាសាធារណៈរបស់ក្រសួងនៅតាមបណ្ដាទីតាំងផ្តល់សេវាដូចមានកំណត់ជូនខាងលើ ដោយត្រូវចៀសវាងដាច់ខាតការប្រើប្រាស់សេវាក្រៅផ្លូវការ ដែលនាំឱ្យខាតបង់ទាំងថវិកា ពេលវេលា និងទទួលបានឯកសារក្លែងបន្លំពីជនខិលខូច។

ជាចុងក្រោយ ក្រសួងសាធារណការ និងដឹកជញ្ជូន សង្ឃឹមយ៉ាងមុតមាំថា ប្រជាពលរដ្ឋទាំងអស់នឹងចូលរួមសហការអនុវត្តប្រកបដោយស្មារតីទទួលខុសត្រូវខ្ពស់៕

អត្ថបទ ៖ សួស សិត