កម្ពុជា ជំរុញសេដ្ឋកិច្ចតាមមូលដ្ឋាន​ឱ្យមានកំណើន​ ដើម្បីពលរដ្ឋ​មានចំណូលខ្ពស់

រាជរដ្ឋាភិបាល បាននិងកំពុងជំរុញសេដ្ឋកិច្ចតាមមូលដ្ឋានឱ្យមានកំណើនគ្រប់វិស័យទាំងអស់ តាមរយៈ​បង្កើត​ការងារបង្កើន​ប្រាក់ចំណូលខ្ពស់ជូនពលរដ្ឋ ជាពិសេសអ្នកដែលកំពុងមានជីវភាពខ្វះខាត។ នេះជាការបញ្ជាក់របស់សម្តេច ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងជំនួបសំណេះសំណាលជាមួយកម្មករ និយោជិត​ ចំនួនជិត ២ម៉ឺននាក់ មកពីបណ្តារោងចក្រ សហគ្រាស ដែលមានមូលដ្ឋានក្នុងខណ្ឌកំបូល រាជធានីភ្នំពេញ ថ្ងៃទី ២១ វិច្ឆិកា ឆ្នាំ ២០២៣។

សម្តេច បានគូសបញ្ជាក់ថា ក្នុងអាណត្តិទី៧នេះ រាជរដ្ឋាភិបាល បានដាក់ចេញសូចនាករគោលដៅធំៗចំនួន៥ រួមមាន៖ កំណើនសេដ្ឋកិច្ច ការងារ សមធម៌ ប្រសិទ្ធភាព និងចីរភាព។ សម្តេច ហ៊ុន ម៉ាណែត បានបន្តថា រយៈពេល៥​ឆ្នាំនៃអាណត្តិនេះ ជាគោលដៅធំដែលត្រូវធ្វើសម្រាប់គោលនយោបាយបញ្ចកោណដំណាក់កាលទី១ និងដំណាក់​កាលបន្តទៀត ដើម្បីជំរុញកម្ពុជា ឱ្យក្លាយជាប្រទេសដែលមានប្រាក់ចំណូលខ្ពស់ នៅឆ្នាំ ២០៥០។  

សម្តេចថ្លែងដូច្នេះថា«ប្រទេសដែលមានចំណូលខ្ពស់ គេមិនគិតថា រដ្ឋមានលុយប៉ុន្មានទេ គេគិតថាប្រជាជន​ម្នាក់ៗជាមធ្យមមានប្រាក់ចំណូលប៉ុន្មាន…នេះហើយជាគោលដៅរបស់រាជរដ្ឋាភិបាល»។

«យើងដើរមកដល់ពេលនេះ ចំណូលប្រជាជនបានកើនហើយ យើងសប្បាយរីករាយណាស់ តាំងពីប្រទេស​បែកបាក់ចេញមកដៃទទេមកដល់ម៉ោងនេះ តែមិនទាន់ចប់ទេមហិច្ឆតារបស់យើង ធ្វើយ៉ាងណា ឱ្យប្រជាពលរដ្ឋ​យើងកាន់តែមានបានផលលាភទៅដល់កូនចៅប្រជាពលរដ្ឋ»។ នេះជាការបន្ថែមរបស់សម្តេច ហ៊ុន ម៉ាណែត។

បើតាមសម្តេចនាយករដ្ឋមន្រ្តី រាជរដ្ឋាភិបាល នឹងជំរុញការអភិវឌ្ឍឱ្យកាន់តែរីកចម្រើនពីមួយជំនាន់ទៅមួយជំនាន់ ដើម្បីទទួលបានប្រាក់ចំណូលកាន់តែខ្ពស់ប្រសើរជាងបច្ចុប្បន្ននេះថែមទៀត៕