ព័ត៌មានជាតិ

សម្ដេចធិបតីប្រាប់ Bloomberg ថា «យើងនឹងធ្វើឱ្យកម្ពុជាក្លាយជាដែនដីមួយដែលមិនងាយស្រួលទេសម្រាប់ពួកឆបោកអនឡាញ»

បានផុស

១ ម៉ោង មុន

នៅ

ថ្ងៃសុក្រ ២៤ កក្កដា ២០២៦

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត មានប្រសាសន៍ថារដ្ឋាភិបាលនឹងធ្វើឱ្យទឹកដីកម្ពុជាជាទឹកដីមួយដែលមិនងាយស្រួលទេសម្រាប់ពួកឆបោកអនឡាញ ហើយនេះជាអ្វីដែលការប្ដេជ្ញាចិត្តរបស់រដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងបទសម្ភាសន៍ជាមួយ Bloomberg នឹងចាក់ផ្សាយនៅព្រឹកថ្ងៃទី២៤ ខែកក្កដា នេះ សម្ដេចធិបតី បានបញ្ជាក់ថា រដ្ឋាភិបាលបានចេញនូវវិធានការជាបន្តបន្ទាប់ដើម្បីដោះស្រាយនូវបញ្ហាឆបោកអនឡាញដែលមានមូលដ្ឋាននៅកម្ពុជា និងឈានដល់ការចាប់ខ្លួនមន្ត្រីជាន់ខ្ពស់ជាច្រើននាក់ដែលពាក់ព័ន្ធនឹងការឆបោកនេះ ព្រមទាំងបន្តស៊ើបអង្កេតបន្ថែមទៀតផងដែរ។

សម្ដេចថា៖ «យើងនឹងធ្វើឱ្យកម្ពុជាក្លាយជាតំបន់ដែលមិនងាយស្រួល និងរស់នៅស្រួលសម្រាប់ការឆបោកអនឡាញទេ ហើយនេះជាការប្ដេជ្ញាចិត្តរបស់យើង។ ហើយយើងនឹងបន្តធ្វើបន្តទៀត»។

ជាមួយគ្នានេះសម្ដេចក៏បានបញ្ជាក់ផងដែរថាកម្ពុជានឹងរៀបចំសន្និសីទអន្តរជាតិស្ដីពីការប្រយុទ្ធប្រឆាំងការឆបោកតាមអនឡាញដែលនឹងមានការចូលរួមពីសមត្ថកិច្ចចិន និង FBI អាមេរិកផងដែរ។ ដោយថានេះជាកិច្ចសហប្រតិបត្តិការដើម្បីដោះស្រាយបញ្ហារួមដែលលើពីបញ្ហាភូមិសាស្ត្រនយោបាយ។

កម្ពុជាមានគម្រោងក្នុងការធ្វើជាម្ចាស់ផ្ទះសន្និសីទអន្តរជាតិស្ដីពីការប្រឆាំអការឆបោកអនឡាញ ដែលជាការបង្ហាញនូវឆន្ទៈខ្ពស់របស់រាជរដ្ឋាភិបាលក្នុងការប្រឆាំងឧក្រិដ្ឋកម្មនេះ ខណៈរដ្ឋាភិបាលបានចាត់វិធានការក្ដីបង្ក្រាបបទល្មើសនេះឱ្យអស់ពីកម្ពុជាបន្ទាប់ពីបញ្ហានេះបានញាំញីអស់ជាច្រើនឆ្នាំមកហើយ។

គិតពីខែកក្កដា ឆ្នាំ២០២៥ ដល់ចុងខែឧសភាឆ្នាំ២០២៦ សមត្ថកិច្ចកម្ពុជាបង្ក្រាបបានបទល្មើសឆបោកអនឡាញចំនួនជាង៤០០ករណី ដកហូតអាជ្ញាបណ្ណកាស៊ីណូចំនួន២៥ទីតាំង និងបញ្ចូនជនសង្ស័យជាង១៤០០នាក់ ក្នុងសំណុំរឿង១៤៣ករណី ទៅកាន់តុលាការ៕

អត្ថបទដោយ ហ៊ុន សិរីវឌ្ឍន៍