ឧបនាយករដ្ឋមន្ដ្រី នេត សាវឿន ជំរុញឱ្យអាជ្ញាធរគ្រឿងញៀន​សិក្សាយុទ្ធសាស្ត្រថ្មីអប់រំពលរដ្ឋ​

លោកឧបនាយករដ្ឋមន្ត្រី នេត សាវឿន និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន​បានធ្វើ​ការក្រើនរម្លឹកជាថ្មី ដល់មន្ដ្រីទាំងអស់របស់អគ្គលេខាធិការដ្ឋាន នៃអាជ្ញាធរជាតិប្រយុទ្ធ​ប្រឆាំង​គ្រឿងញៀន ត្រូវបង្កើនការសិក្សា ស្រាវជ្រាវ ណែនាំដល់អាជ្ញាធរថ្នាក់ក្រោមជាតិ និងដឹកនាំ​អនុវត្តការងារផ្សព្វផ្សាយ និងអនុវត្តច្បាប់ ដើម្បីប្រយុទ្ធប្រឆាំងគ្រឿងញៀន។

ក្នុងឱកាសអញ្ជើញជាអធិបតីភាពក្នុងពិធីសំណេះសំណាលជាមួយថ្នាក់ដឹកនាំ និងមន្ដ្រីគ្រប់ជាន់​ថ្នាក់ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀននៅព្រឹក​ថ្ងៃទី ០៧ ខែធ្នូ ឆ្នាំ​២០២៣នេះ លោកឧបនាយករដ្ឋមន្ដ្រី នេត សាវឿន បានប្រៀបប្រដូចការប្រយុទ្ធប្រឆាំង​បទល្មើស​គ្រឿងញៀននៅក្នុងប្រទេសកម្ពុជា ដូចគ្នាទៅនឹងការប្រយុទ្ធក្នុងសមរភូមិសង្គ្រាម ហើយលោក​បានផ្ដល់អាទិភាពខ្ពស់លើការងារផ្សព្វផ្សាយអប់រំទៅកាន់គ្រប់មជ្ឈដ្ឋាន។

​លោកឧបនាយករដ្ឋមន្ដ្រី បានលើកឡើងថា ការផ្សព្វផ្សាយ អប់រំឲ្យប្រជាពលរដ្ឋបានយល់ដឹង​ពីផល​ប៉ះពាល់ និងគ្រោះថ្នាក់នៃគ្រឿងញៀន និងល្បិចកលរបស់ក្រុមឧក្រិដ្ឋជនគឺជាការងារសំខាន់ចាំ​បាច់​បំផុត​ក្នុងនោះគឺត្រូវធ្វើការកែទម្រង់យន្ដការផ្សព្វផ្សាយ អប់រំមួយចំនួន ដែលមិនទាន់មាន​ប្រសិទ្ធ​ភាព​​ខ្ពស់ ដោយត្រូវប្រើប្រាស់នូវយន្ដការថ្មីៗ ធ្វើបែបណាឲ្យមហាជនទូទៅឆាប់ចាប់អារម្មណ៍ ទទួល​យកបាន ពិសេសក្នុងចង្កោមយុវជន ដែលជាមុខសញ្ញាងាយរងគ្រោះ។ ​

ឧបនាយករដ្ឋមន្ដ្រី នេត សាវឿន បានថ្លែងយ៉ាងដូច្នេះថា «ខ្ញុំឃើញអាទិភាពទី១ គឺកិច្ចការផ្សព្វផ្សាយ​អប់រំដោយត្រូវរួមសហការគ្នាធ្វើយ៉ាងណាឲ្យមានគុណភាពប្រជាពលរដ្ឋយើងយល់ដឹង។ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន នាយកដ្ឋានជំនាញ ត្រូវសិក្សាពី​ផែនការ ខ្លឹមសារ រកវិធីសាស្ដ្រថ្មីដែលពេញនិយមងាយស្រួលប្រជាពលរដ្ឋតាមដាន»។

លោកឧបនាយករដ្ឋមន្ដ្រី នេត សាវឿន បានបន្ដទៀតថា ការងារផ្សព្វផ្សាយអប់រំត្រូវរកបុគ្គលល្បីៗ មានឥទ្ធិពល ជាទីចាប់អារម្មណ៍របស់មហាជនទូទៅ ដើម្បីថ្លែងពីបញ្ហាគ្រឿងញៀនទៅកាន់ពួកគាត់​ដើម្បីឆាប់ទទួលបានការយល់ដឹង ក្នុងនោះមាន៖ តារាចម្រៀង តារាសម្ដែង ព្រះសង្ឃ អ្នកនិពន្ធទាំង​កំណាព្យ និងចម្រៀងជាដើម។

​បើតាមលោកឧបនាយករដ្ឋមន្ត្រីនៅពេលអាជ្ញាធរទៅអានសុន្ទរកថា ដើម្បីពន្យល់ ឬកោះហៅប្រ​ជា​ពលរដ្ឋ​មកអប់រំណែនាំនោះប្រសិទ្ធភាពនៅមានកម្រិត ប៉ុន្តែបើអាចឆ្លៀតបញ្ចូលក្នុងកម្មវិធីសម្ដែង ឬការប្រគំតន្រ្តីណាមួយ ដែលមានតារាចម្រៀង ឬតារាងកំប្លែងល្បីៗចូលរួម យើងអាចឱ្យគាត់​ជួយ​បញ្ជូនសារអបរំពីបញ្ហាគ្រឿងញៀនទៅកាន់មហាជន ទើបមានប្រសិទ្ធភាពកាន់តែខ្ពស់បន្ថែមទៀត។ លើសពីនេះ ក៏ត្រូវសហការជាមួយប្រព័ន្ធផ្សព្វផ្សាយនានាដែលមាននៅក្នុងប្រទេសផងដែរ។

ក្រៅពីការងារផ្សព្វផ្សាយអប់រំ ការងារអនុវត្តច្បាប់ ក៏ត្រូវបានឧបនាយករដ្ឋមន្ដ្រី នេត សាវឿន ចាត់ទុកជាការងារមួយសំខាន់ផងដែរ ដោយត្រូវតាមដានការអនុវត្តរបស់គ្រប់អង្គភាពទាំងអស់ បូកសរុប និងចងក្រងទុកពីល្បិចកលរបស់ក្រុមជនល្មើសកែច្នៃផលិត, ល្បិចលួចលាក់ដឹកជញ្ជូនឆ្លងកាត់ ជួញដូរដែលវិវឌ្ឍថ្មីៗ ដើម្បីប្រសិទ្ធភាពការតាមដាន ទប់ស្កាត់ បង្ការ និងឈានដល់ការបង្ក្រាប។

ជាមួយគ្នានេះ ឧបនាយករដ្ឋមន្ដ្រី នេត សាវឿន បានជំរុញឲ្យបង្កើនកិច្ចសហប្រតិបត្តិការទាំងទ្វេភាគី ទាំងតំបន់ និងអន្ដរជាតិ ដើម្បីស្វែងរកនូវជំនួយលើការបណ្ដុះបណ្ដាលពង្រឹងសមត្ថភាពមន្រ្តី តាមរយៈការផ្លាស់ប្ដូរបទពិសោធន៍។

សម្រាប់ការងារព្យាបាល និងស្ដារនីតិសម្បទាវិញ ត្រូវកំណត់ឲ្យច្បាស់អំពីសមត្ថភាព ទីតាំងសម្រាប់ព្យាបាលស្ដារនីតិសម្បទាអ្នកញៀនគ្រឿងញៀន ដោយសហការជាមួយក្រសួងជំនាញនិងត្រូវផ្ដល់ឱកាសឲ្យវិស័យឯកជនចូលរួមផងដែរ។ ទន្ទឹមនឹងនេះក៏ត្រូវ ស្រង់ទិន្នន័យអ្នកកំពុងទទួលការថែទាំបន្សាប និងអ្នកដែលបានធ្វើសមាហរណកម្មចេញពីមណ្ឌលទៅរស់នៅក្នុងសហគមន៍វិញ ដើម្បីងាយស្រួលក្នុងការតាមដានបន្ដ។

លោកឧបនាយករដ្ឋមន្ត្រី ក៏បានណែនាំឲ្យពង្រឹងបន្ថែមទៀត លើការងារគ្រប់គ្រងសារធាតុគីមីផ្សំ ត្រូវគ្រប់គ្រងឲ្យបាននូវការនាំចូល ប្រើប្រាស់ និងចែកចាយ ប៉ុន្ដែធ្វើយ៉ាងណាឲ្យមានយន្ដការមួយច្បាស់លាស់ ជៀសវាងបង្កនូវការរំខានដល់ក្រសួងសាមី ដែលជាអ្នកអនុញ្ញាតឲ្យនាំចូលសារធាតុគីមី៕