ឡាវទទួលភ្ញៀវទេសចរបរទេស ២,៥ លាននាក់ កើនឡើងជិត ១០% នៅឆមាសទី១

ប្រទេសឡាវបានទទួលភ្ញៀវទេសចរបរទេសចំនួនជាង ២,៥ លាននាក់ ក្នុងរយៈពេល ៦ ខែដំបូងនៃឆ្នាំ ២០២៦ ដែលកើនឡើង ៩,៨៧% បើធៀបនឹងរយៈពេលដូចគ្នាកាលពីឆ្នាំ ២០២៥។ នេះបើតាមការចុះផ្សាយរបស់សារព័ត៌មាន Xinhua។

​របាយការណ៍ចុងក្រោយរបស់ក្រសួងវប្បធម៌ និងទេសចរណ៍ឡាវ បានឱ្យដឹងថា ចាប់ពីខែមករា ដល់ខែមិថុនា ឆ្នាំ ២០២៦ (ឆមាសទី១) ប្រទេសនេះបានស្វាគម​ភ្ញៀវទេសចរអន្តរជាតិសរុប ២​,៥៩​ នាក់។

ក្នុងចំណោមទីផ្សារទេសចរណ៍សំខាន់ៗ ​ថៃនៅតែជាប្រភពភ្ញៀវទេសចរធំបំផុតរបស់ឡាវ ដោយមានចំនួនជាង ៨៣៣ ០០០ នាក់ ​បន្ទាប់មកគឺ​ចិនជាង​ ៦៧៥ ០០០ នាក់ និង​វៀតណាម​ជាង ៥៨៦ ០០០ នាក់។

ការកើនឡើងជាបន្តបន្ទាប់នៃចំនួនភ្ញៀវទេសចរអន្តរជាតិ បានក្លាយជាកត្តាជំរុញដ៏សំខាន់សម្រាប់វិស័យសេវាកម្មរបស់ឡាវ និងជួយគាំទ្រដល់កំណើនសេដ្ឋកិច្ចរបស់ប្រទេស។

នៅឆមាសទី១ ឆ្នាំ ២០២៥ ឡាវទទួលបានភ្ញៀវទេសចរបរទេសត្រឹមតែ ២,៣៥ លាននាក់ប៉ុណ្ណោះ។ ​

រដ្ឋាភិបាលឡាវបានបន្តចាត់ទុកវិស័យទេសចរណ៍ជាសសរស្តម្ភសំខាន់មួយសម្រាប់ការអភិវឌ្ឍប្រកបដោយចីរភាពផ្នែកសេដ្ឋកិច្ច និងសង្គម តាមរយៈការលើកកម្ពស់បេតិកភណ្ឌវប្បធម៌ ទេសភាពធម្មជាតិ និងជីវចម្រុះដ៏សម្បូរបែបរបស់ប្រទេស។

កាលពីថ្ងៃទី២៣ ខែកក្កដា ឆ្នាំ២០២៦ ឡាវបានរៀបចំវេទិកាទេសចរណ៍ជីវចម្រុះឡាវ នៅខេត្ត Oudomxay ភាគខាងជើងប្រទេស ដើម្បីពិភាក្សាអំពីការអភិវឌ្ឍទេសចរណ៍ដែលផ្អែកលើជីវចម្រុះ។ កិច្ចប្រជុំនេះបានបង្ហាញថា ប្រព័ន្ធអេកូឡូស៊ីដែលមានសុខភាពល្អ និងធនធានជីវចម្រុះ គឺជាទ្រព្យសម្បត្តិទេសចរណ៍ដ៏មានតម្លៃ ដែលអាចទាក់ទាញភ្ញៀវទេសចរពីជុំវិញពិភពលោក ខណៈពេលជួយគាំទ្រដល់ការអភិរក្សធនធានធម្មជាតិរយៈពេលវែង។

ឡាវបានកំណត់គោលដៅទាក់ទាញភ្ញៀវទេសចរជាង ៤៣ លាននាក់ ក្នុងអំឡុងឆ្នាំ ២០២៦ ដល់ឆ្នាំ ២០៣០ ដែលក្នុងនោះរួមមានភ្ញៀវអន្តរជាតិ ២២ លាននាក់ និងភ្ញៀវទេសចរក្នុងស្រុក ២១ លាននាក់។

ដើម្បីសម្រេចគោលដៅនេះ រដ្ឋាភិបាលគ្រោងនឹងពង្រឹងហេដ្ឋារចនាសម្ព័ន្ធនៅតំបន់ទេសចរណ៍សំខាន់ៗ លើកកម្ពស់គុណភាពសេវាកម្ម និងបង្កើនជំនាញរបស់បុគ្គលិកក្នុងវិស័យទេសចរណ៍។

ក្នុងឆ្នាំ ២០២៥ ឡាវបានទទួលភ្ញៀវទេសចរបរទេសជាង ៤,៥ លាននាក់ កើនឡើង ១១% ពីឆ្នាំ ២០២៤ និងលើសពីគោលដៅដែលរដ្ឋាភិបាលបានកំណត់។ ​ថៃ ចិន និងវៀតណាម ​គឺទីផ្សារទេសចរណ៍ធំៗសម្រាប់ឡាវ៕