សម្ដេចធិបតី៖ តំបន់រុនតាឯក និងតំបន់ពាក់ស្នែង ជានិមិត្តរូបនៃការអភិវឌ្ឍ ដើម្បីអភិរក្ស

តំបន់អភិវឌ្ឍន៍ថ្មីរុនតាឯក និងតំបន់ពាក់ស្នែង គឺជានិមិត្តរូបនៃការអភិវឌ្ឍ ដើម្បីការអភិរក្ស។ នេះជាការថ្លែងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋរស់នៅក្នុងតំបន់រុនតាឯក ស្ថិតនៅក្នុងស្រុកបន្ទាយស្រី ខេត្តសៀមរាប នៅព្រឹកថ្ងៃទី៨​ ខែធ្នូ ឆ្នាំ២០២៣នេះ។

សម្ដេចធិបតី ហ៊ុន ម៉ាណែត បានថ្លែងដូច្នេះថា៖ «បើនិយាយនៅទីនេះ កំពុងអភិវឌ្ឍន៍ថ្មី និងតំបន់ពាក់ស្នែង ដែលកំពុងអភិវឌ្ឍ តែមិនទាន់រៀបរយ មិនទាន់មានពលរដ្ឋចូលទេ គឺជានិមិត្តរូបនៃការអភិវឌ្ឍ ដើម្បីអភិរក្ស»។ ក្នុងន័យនេះ សម្ដេចធិបតី ចង់គូសបញ្ជាក់ដូច្នេះថា រាជរដ្ឋាភិបាលរួមគ្នាអភិវឌ្ឍន៍ជាតិជាប្រយោជន៍ដល់ប្រជាពលរដ្ឋនៅក្នុងសម័យបច្ចុប្បន្ន និងទៅអនាគត ប៉ុន្តែក៏មិនអាចភ្លេចបានឡើយនូវបុព្វហេតុក្នុងការអភិរក្សនូវកេរដំណែលរបស់ដូនតា។

សម្ដេចធិបតី បានសង្កត់ធ្ងន់ថា រាជរដ្ឋាភិបាល មិនអាចជ្រើសរើសជម្រើសណាមួយ ហើយបោះចោលជម្រើសណាមួយឡើយ ផ្ទុយទៅវិញ រាជរដ្ឋាភិបាល បានគិតទាំងការអភិវឌ្ឍ និងទាំងការអភិរក្ស ដែលត្រូវដើរទន្ទឹមគ្នាជានិច្ច។

ក្នុងឱកាសនោះ សម្ដេចធិបតី ក៏បានថ្លែងអំណរគុណដល់ប្រជាពលរដ្ឋដែលបានស្ម័គ្រចិត្តរើសទីលំនៅមកនៅក្នុងតំបន់អភិវឌ្ឍន៍ធម្មជាតិរុនតាឯក នាពេលនេះ៕