រដ្ឋមន្រ្តីការពារជាតិកម្ពុជា ឡាវ និងវៀតណាម ជួបគ្នាជាមិត្តភាពលើកិច្ចការពារព្រំដែន

រដ្ឋមន្រ្តីក្រសួងការពារជាតិកម្ពុជា ឡាវ និងវៀតណាម បានជួបគ្នាជាមិត្តភាពលើកិច្ចការពារព្រំដែនរវាងប្រទេសទាំងបី ស្ថិត​នៅ​តំបន់​មរកតកន្ទុយនាគ។ កិច្ចជំនួបរវាងរដ្ឋមន្ត្រីការពារជាតិនៃប្រទេសទាំងបីនេះ បានធ្វើឡើងនៅថ្ងៃទី១៤ ខែធ្នូ ឆ្នាំ២០២៣ នៅចំណុចបង្គោលព្រំដែនជាប់ប្រទេសទាំងបី។

ការរៀបចំជំនួបប្រាស្រ័យមិត្តភាពគ្នានៅចំណុចបង្គោលព្រំដែនជាប់ប្រទេសទាំងបី ​នៅ​តំបន់​មរកតកន្ទុយនាគនេះ គឺដោយសារបង្គោលស្ថិតនៅក្នុងតំបន់នេះ គឺជាការបង្ហាញ​នូវ​ចំណង​មិត្ត​ភាព​រវាង​ប្រទេសទាំងបីឱ្យកាន់តែប្រសើរបន្ថែមទៀតក្នុងកិច្ចការពារចំណុចព្រំដែនប្រទេសទាំងបី។

កិច្ចជំនួបប្រាស្រ័យមិត្តភាពនៃក្របខណ្ឌរដ្ឋមន្រ្តីការពារជាតិ លើកទី១នេះ មានការគោរព​បង្គោល​ព្រំដែន​អធិបតេយ្យ ​ការលាបពណ៌បង្គោល ការធ្វើជាសក្ខីភាពក្នុងការល្បាតរួមរវាងឆ្មាំការពារព្រំដែនប្រទេស​ទាំងបី និងធ្វើពិធីដាំដើមឈើជានិមិត្តរូប ជាដើម។

បន្ថែមពីនេះ រដ្ឋមន្រ្តីការពារជាតិទាំងបីប្រទេស ក៏បានអញ្ជើញ​ពិ​និត្យមើលលំហាត់សមយុទ្ធផ្នែកសុខាភិបាលរបស់កងទ័ពទាំងបី ស្ដីពីការសង្រ្គោះ​គ្រោះ​ម​ហន្តរាយ និងផ្នែកសុខាភិបាល នៅក្បែរតំបន់មរតកតកន្ទុយនាគ និងការចូលរួម​ពិធី​កាត់​ខ្សែ​បូរ​សម្ពោធ​អគារ​វប្បធម៌ផងដែរ៕