ព័ត៌មានជាតិ

ប្រទេសមួយនៅទ្វីបអាហ្រ្វិកមានភ្ញៀវទេសចរមកទស្សនាកម្ពុជាច្រើនជាងគេក្នុងឆ្នាំ ២០២៣

បានផុស

២ years មុន

នៅ

ថ្ងៃអង្គារ ២៣ មករា ២០២៤

ដោយ

យោងតាមរបាយការណ៍ពីក្រសួងទេសចរណ៍ ក្នុងឆ្នាំ ២០២៣ កម្ពុជាទទួលបានភ្ញៀវទេសចរបរទេសសរុបជាង ៥ លាននាក់ ខណៈប្រទេសថៃឈរលើគេមានចំនួនជិត ២ លាននាក់។

ជាមួយគ្នានេះ បើតាមរបាយការណ៍ក្រសួងក៏បានបង្ហាញទិន្នន័យភ្ញៀវទេសចរមកពីទ្វីបអាហ្រ្វិកដែលមកទស្សនាប្រទេសកម្ពុជាក្នុងឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអាហ្រ្វិកខាងត្បូងឈរលើគេក្នុងចំណោមប្រទេសនៅទ្វីបអាហ្រ្វិកដែលមកទស្សនាកម្ពុជាមានចំនួន ៤ ៨៨៣ នាក់។

ទ្វីបអាហ្រ្វិកមិនសូវជាគោលដៅទេសចរណ៍របស់ប្រទេសកម្ពុជា ខណៈតួលេខពេញមួយឆ្នាំ ២០២៣ កម្ពុជាទទួលបានទេសចរពីប្រទេសនៅទ្វីបអាហ្រ្វិកសរុបមានចំនួនត្រឹមតែ ១១ ០៨៥ នាក់។

បើតាមរបាយការណ៍ផ្លូវការបស់ក្រសួងទេសចរណ៍ ក្នុងឆ្នាំ ២០២៣ កម្ពុជាទទួលបានទេសចរបរទេសសរុប ៥ លាន ៤ សែននាក់ ខណៈដែលថៃឈរលំដាប់ទីមួយមានចំនួន ១,៨២០,៤៦០ នាក់ និងវៀតណាមឈរលំដាប់ទីពីរមានចំនួន ១,០១៩,៨១២ នាក់។

ដោយឡែកចិនឈរលំដាប់ទី ៣ មានចំនួន ៥៤៧,៧៩៨នាក់ ឡាវឈរលំដាប់ទី ៤ មានចំនួន ៣៧២,២៨៥នាក់ អាមេរិកឈរលំដាប់ទី ៥ មានចំនួន ១៨៤,៨៧០ នាក់។

ប្រទេសកូរ៉េខាងត្បូងឈរនៅលំដាប់ទី ៦ មានចំនួន ១៧០,១៧១នាក់ ឥណ្ឌូណេស៊ីឈរលំដាប់ទី ៧ មានចំនួន ១២៧,១៧៨នាក់ លំដាប់ទី ៨ គឺប្រទេសបារាំងមានចំនួន ១០៦,៦២៥ នាក់ លំដាប់ទី ៩ ចក្រភពអង់គ្លេសមានចំនួន ៩៦,៩៧៣ នាក់ និងម៉ាឡេស៊ីឈរលំដាប់ទី ១០ មានចំនួន ៨៧,៨២៥ នាក់។

ទេសចរបរទេសដែលចូលមកទស្សនាប្រទេសកម្ពុជា ក្នុងនោះតាមជើងហោះហើរមានចំនួន ១,៨៦៦,២៣១ នាក់ តាមផ្លូវគោកចំនួន ៣,៥២០,៧៣០ នាក់ និងមកតាមផ្លូវទឹកចំនួន ៦៦,២៧០ នាក់។

ក្រៅពីទេសចរបរទេសដែលចូលមកទស្សនាប្រទេសកម្ពុជា បើតាមរបាយការណ៍ពីក្រសួងទេសចរណ៍មានពលរដ្ឋកម្ពុជាប្រមាណ ១ លាន ៨ សែននាក់ បានចេញទៅកម្សាន្តនៅក្រៅប្រទេសក្នុងឆ្នាំ ២០២៣៕