ប្រមុខរាជរដ្ឋាភិបាល បានបញ្ជាក់ថា មិនមានការអន្តរាគមន៍ណាមួយមានចរិតជាអចិន្ត្រៃយ៍ទេ

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការអន្តរាគមន៍របស់រាជរដ្ឋាភិបាល គឺមិនមានការអន្តរាគមន៍ណាមួយមានចរិតជាអចិន្ត្រៃយ៍ទេ។

ការបញ្ជាក់នេះ ធ្វើឡើងក្នុងពិធីបិទសន្និបាតបូកសរុបការងារឆ្នាំ ២០២៣ និងលើកទិសដៅការងារសម្រាប់ឆ្នាំ ២០២៤ ក្រសួងសង្គមកិច្ច អតីតយុទ្ធជន និងយុវនីតិសម្បទា នាព្រឹកថ្ងៃទី ៦ ខែកុម្ភៈ ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត​ បានថ្លែងថា «​ចំពោះសំណួរដែលថា ចុះរដ្ឋាភិបាល មិនព្រួយបារម្ភទៅលើការជំនួយសង្គមរបស់យើង ដែលថា បង្កើតវប្បធម៌ពឹងផ្អែក មិនឲ្យមានវប្បធម៌ម្ចាស់ការ សូមពិនិត្យមើលនូវការអន្តរាគមន៍ របស់រាជរដ្ឋាភិបាលរបស់យើង គឺអត់មានអន្តរាគមន៍ណាមានចរិតជាអចិន្ត្រៃយ៍ទេ គឺអន្តរាគមន៍ភាគច្រើនគឺផ្អែកទៅលើគ្រាមានអាសន្ន និងការលំបាក»។

ប្រមុខរាជរដ្ឋាភិបាល បានប​ន្ថែមថា រាជរដ្ឋាភិបាល បង្កើតកម្មវិធីគាំពារ និងជំនួយសង្គម នៅពេលដែលប្រជាពលរដ្ឋជួបគ្រាអាសន្ន ឬជួបការលំបាកណាមួយ តែនៅពេលពួកគាត់មានភាពល្អប្រសើរហើយ គឺរាជរដ្ឋាភិបាល នឹងបង្វែរថវិកាទៅជួយអ្នកផ្សេងបន្តទៀត។

សម្ដេចធិបតី ហ៊ុន​ ម៉ាណែត បានបញ្ជាក់ថា «យើងជួយពេលដែលគាត់លំបាក ពេលថ្ងៃក្រោយគាត់ជីវភាពធូរធា យើងត្រូវ…យើងមិនអាចជួយរហូតទេ ​យើងយកថវិកាទៅជួយអ្នកផ្សេងដែលលំបាក»៕