សមត្ថកិច្ចខេត្តកំពង់ស្ពឺកំពុងបន្តនីតិវិធីករណីគ្រឿងញៀនជិត១គីឡូក្រាម

កំពង់ស្ពឺ៖ សមត្ថកិច្ចជំនាញ នៃមន្ទីរប្រឆាំងបទល្មើសគ្រឿងញៀន សហការជាមួយនគរបាលខេត្តកំពង់ស្ពឺ បង្ក្រាបករណីជួញដូរគ្រឿងញៀន ចាប់ខ្លួនជនសង្ស័យ២នាក់ និងរឹបអូសគ្រឿងញៀនជិត១គីឡូក្រាម។

សមត្ថកិច្ចប្រាប់អោយដឹងថា ដោយអនុវត្តតាមបញ្ជាលោកនាយឧត្ដមសេនិយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោកនាយឧត្ដមសេនិយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ពីលោកឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន កម្លាំងជំនាញ (ក៤) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោក ឧត្តមសេនីយ៍ទោ ឃឹង សារ៉ាត់ នាយករងមន្ទីរ សហការជាមួយកម្លាំងជំនាញ នៃស្នងការដ្ឋាននគរបាលខេត្តកំពង់ស្ពឺ ក្រោមការសម្របសម្រួលពីលោកស្រី ចាត សូរស្មី ព្រះរាជអាជ្ញា ស្រាវជ្រាវបង្រ្កាបបទល្មើសគ្រឿងញៀន នៅចំណុចផ្លូវក្រោយសាលាខេត្តកំពង់ស្ពឺ ស្ថិតក្នុងភូមិទួលគោក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ កាលពីថ្ងៃទី១៥ ខែកុម្ភៈ ឆ្នាំ២០២១ វេលាម៉ោង ១៦ និង៣០នាទី ដោយឃាត់ខ្លួនជនសង្ស័យ២នាក់។

ជនសង្ស័យទាំង ២នាក់ ១-ឈ្មោះ អ៊ិត វុទ្ធី ភេទប្រុស ឆ្នាំកំណើត ១៩៩៩ ជនជាតិ ខ្មែរ ២-ឈ្មោះ ម៉ៃ ចិន ភេទប្រុស ជនជាតិ ខ្មែរ ឆ្នាំកំណើត ២០០៥ វត្ថតាងចាប់យក មេតំហ្វេតាមីន (ICE) ១កញ្ទប់ធំ ស្មើទម្ងន់ ៩៤៨,៩១ក្រាម ម៉ូតូ ១គ្រឿង និងទូរស័ព្ទដៃ ២គ្រឿង។

ជនសង្ស័យ និងវត្ថុតាងចាប់យកខាងលើ សមត្ថកិច្ចជំនាញបានកសាងសំណុំរឿង បញ្ជូនទៅសាលាដំបូងខេត្តកំពង់ស្ពឺ បន្តតាមនីតិវិធី៕

រ៉ាវុទ្ធ

សូមអានព័ត៌មានពាក់ព័ន្ធ៖ ថ្នាំញៀន​ប្រភេទ (WY)​ ២០០០០​គ្រាប់ ​ត្រូវ​សមត្ថកិច្ច​បង្ក្រាប​ នៅ​ខេត្ត​ស្ទឹងត្រែង​