ខេត្ត៥ នាំមុខគេ មានទេសចរមកកម្សាន្តច្រើនជាងគេ ក្នុងថ្ងៃសង្ក្រាន្តឆ្នាំថ្មី

(ទិន្នន័យជំហានដំបូង) ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងគ្រិស្តសករាជ ២០២៤ ប្រជាពលរដ្ឋកម្ពុជា បានធ្វើដំណើរកម្សាន្តតាមបណ្តាខេត្តនានាទូទាំងប្រទេស ដែលក្នុងនោះ របាយការណ៍បង្ហាញថា ខេត្តចំនួន ៥ មានទេសចរជាតិ-អន្តរជាតិ ទៅកម្សាន្តច្រើនជាងគេ គឺខេត្តកំពង់ចាម បាត់ដំបង សៀមរាប កំពត និងព្រៃវែង។

បើតាមរបាយការណ៍ខេត្តនីមួយៗ នៅព្រឹកថ្ងៃទី១៧ ខែមេសានេះ បង្ហាញថា កំពង់ចាម កំពុងឈរនៅលេខរៀង១ នាំមុខខេត្តទេសចរណ៍ផ្សេងទៀត ដែលមានទេសចរមកទស្សនានៅតាមកន្លែងកម្សាន្ត និងរមណីយដ្ឋាននានា និងស្នាក់នៅក្នុងខេត្តកំពង់ចាម សរុបជិត ២លាននាក់ (១ ៩១៨ ០៧៣នាក់) ដែលក្នុងនោះ ភ្ញៀវបរទេស មានចំនួនសរុបប្រមាណតែជាង ១០០នាក់ ប៉ុណ្ណោះ ។

រីឯខេត្តបាត់ដំបង បើតាមលោក អ៊ុច អ៊ំភីនីហ្សារ៉ា ប្រធានមន្ទីរទេសចរណ៍ខេត្តបាត់ដំបង បានបញ្ជាក់ឱ្យដឹងថា នៅក្នុង​រយៈពេល​បីថ្ងៃ ពោលគឺគិតចាប់ពីថ្ងៃទី ១៣ ដល់ថ្ងៃទី ១៥ ខែមេសា ឆ្នាំ២០២៤ នៅគ្រប់តំបន់រមណីយដ្ឋាន និង​ទីកម្សាន្ដនានា នៅកណ្ដាលក្រុងបាត់ដំបង បានទទួលភ្ញៀវជាតិ និងអន្តរជាតិប្រមាណជាង ១លាននាក់ (១ ០៧៣ ៦៤៦ នាក់) ។ ដោយឡែកនៅថ្ងៃបង្ហើយចូលឆ្នាំ ត្រូវនឹងថ្ងៃទី១៦ ខែមេសា ឆ្នាំ២០២៤ គឺទទួលបានទេសចរជាតិ-អន្តរជាតិ បន្តមកកម្សាន្តសប្បាយជាង ៦០មុឺននាក់បន្ថែមទៀត។

ចំណែកខេត្តសៀមរាប បើតាមរបាយការណ៍មន្ទីរទេសចរណ៍ខេត្តសៀមរាប គិតចាប់ពីថ្ងៃទី១៣ ដល់ទី១៦ ខែមេសា ឆ្នាំ២០២៤ ទេសចរជាតិ និងអន្តរជាតិ បានចូលមកកម្សាន្តនៅខេត្តសៀមរាប សរុបជាង ១លាន ២០មុឺននាក់ (១ ២៣៩ ៨០៨ នាក់)។ ក្នុងនោះ ទេសចរជាតិសរុបប្រមាណ ៦៦មុឺននាក់ ប្រជាពលរដ្ឋក្នុងមូលដ្ឋានប្រមាណ ៥៦៣ ០០០ នាក់ និងទេសចរបរទេសសរុបប្រមាណ ១៦ ៨០៨ នាក់។

ចំពោះខេត្តព្រៃវែងវិញ យោងតាមរបាយការណ៍របស់រដ្ឋបាលខេត្ត នៅព្រឹកថ្ងៃទី១៦ ខែមេសា ឆ្នាំ២០២៤ បង្ហាញថា រយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ខេត្តព្រៃវែង ទទួលបានភ្ញៀវទេសចរជាតិ និងអន្ដរជាតិ មកលេងកម្សាន្ដ ប្រមាណជាង ១.៣លាននាក់។

ដោយឡែក ចំនួនទេសចរដែលមកកម្សាន្ត ខេត្តកំពត រយ:ពេល៤ថ្ងៃ ​នៃពិធីបុណ្យ​ចូលឆ្នាំខ្មែរ សរុបប្រមាណជាង ១លាន ៣សែននាក់ (១ ៣៩៩ ៨៩៧នាក់) ក្នុងនោះ ភ្ញៀវទេសចរបរទេស ដែលមកកម្សាន្តក្នុងខេត្ត សរុបប្រមាណ ៣១២២ នាក់ ៕