ក្រសួងសុខាភិបាល៖ បើអ្នកពាក់ព័ន្ធ គ្មានភាពស្មោះត្រង់ ការចម្លងក្នុងសហគមន៍នឹងកាន់តែធំ

ស្របពេលសមត្ថកិច្ចចម្រុះកំពុងមមាញឹករុករកអ្នកពាក់ព័ន្ធ “ព្រឹត្តិការណ៍ ២០ កុម្ភៈ” ដើម្បីធ្វើតេស្តរកមេរោគ ធ្វើចត្តាឡីស័ក ព្យាបាលឱ្យទាន់ពេលវេលា មន្ត្រីជាន់ខ្ពស់ និងជាអ្នកនាំពាក្យក្រសួងសុខាភិបាល បានអំពាវនាវអ្នកពាក់ព័ន្ធ “ព្រឹត្តិការណ៍ ២០ កុម្ភៈ” ទាំងអស់ សូមមានភាពស្មោះត្រង់ ដើម្បីកុំឱ្យមានការឆ្លងមេរោគរីករាលដាលកាន់តែធំក្នុងសហគមន៍។

លោកស្រី ឱ វណ្ណឌីន រដ្ឋលេខាធិការ  និងជាអ្នកនាំពាក្យក្រសួងសុខាភិបាល មានប្រសាសន៍ថា៖ “បងប្អូនយើងអ្នកដែលប៉ះពាល់ផ្ទាល់ទាំងអស់នេះ សូមឱ្យមានភាពស្មោះត្រង់ក្នុងការជម្រាបជូននូវព័ត៌មានផ្សេងៗដែលពាក់ព័ន្ធទៅនឹងទំនាក់ទំនងរបស់ខ្លួននេះ ដើម្បីជួយសម្រួលទៅដល់ការរុករកស្រាវជ្រាវនូវប្រភពនៃការឆ្លងនៃវីរុសកូវីដ១៩ឱ្យបានលឿន”។

រដ្ឋលេខាធិការ  និងជាអ្នកនាំពាក្យក្រសួងសុខាភិបាល បានពន្យល់បន្តថា៖ “បើកាលណាយើងទុកការរុករកនេះកាន់តែយូរ យើងក្ររកឃើញ អ៊ីចឹងលទ្ធភាពនៃការចម្លងបន្តទៅទៀតនេះ ក៏មានលក្ខណៈទ្រង់ទ្រាយធំ និងពិបាកគ្រប់គ្រងផងដែរ ដោយយើងពិបាកនឹងប៉ាន់ប្រមាណថាតើទំហំនៃការរាតត្បាត ទំហំនៃការចម្លងវានឹងមានកម្រិតប៉ុនណា?”។

គួរបញ្ជាក់ថា “ព្រឹត្តិការណ៍ ២០ កុម្ភៈ” នេះជាការផ្ទុះការឆ្លងមេរោគកូវីដ១៩ ចូលសហគមន៍ លើកទី៣ ដែលលើក១ជា “ព្រឹត្តិការណ៍ ៣ វិច្ឆិកា” ពាក់ព័ន្ធករណី មន្ត្រីហុងគ្រី លើកទី២ជា “ព្រឹត្តិការណ៍ ២៨ វិច្ឆិកា” ដែលពាក់ព័ន្ធ ភរិយាមន្ត្រីពន្ធនាគារទៅផ្សារអ៊ីអន១ ត្រូវបានគ្រប់គ្រងបាន។ ព្រឹត្តិការណ៍ទី៣នេះ មានទំហំធំ និងធ្ងន់ធ្ងរជាងលើកទី១ និងលើកទី២។

គិតមកត្រឹមថ្ងៃនេះ សមត្ថកិច្ចចម្រុះបានស្រាវជ្រាវរកអ្នកពាក់ព័ន្ធនឹង“ព្រឹត្តិការណ៍សហគមន៍ ២០ កុម្ភៈ” និងបានតេស្តរកឃើញអ្នកផ្ទុកមេរោគកូវីដ១៩ ចំនួន ២៣៤នាក់។​

គួរឱ្យដឹងដែរថា គិតត្រឹមព្រឹកថ្ងៃទី២៦ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ-១៩ សរុបចំនួន ៧៤១នាក់ ដោយបានព្យាបាលអ្នកជំងឺឱ្យជាសះស្បើយចំនួន ៤៧៧នាក់ និងអ្នកកំពុងសម្រាកព្យាបាល ចំនួន ២៦២នាក់ ដោយក្រសួងនឹងធ្វើការជូនដំណឹងបន្តទៀតនៅពេលដែលទទួលបានរបាយការណ៍សម្រាបកព្យាបាលបន្ថែម ចំនួន២នាក់ទៀត។

អត្ថបទ៖ ច័ន្ទ វីរៈ
សូមអានព័ត៌មានពាក់ព័ន្ធ៖

វិបត្តិ​កូវីដ ១៩ មិន​ថមថយ ផ្ទុះ​រាលដាល​​​ដល់​ខណ្ឌ​ចំនួន ១០ នៅ​រាជធានី​ភ្នំពេញ

១៥០០​នាក់ ជាប់ពាក់ព័ន្ធ​ និង​ ១៩​នាក់​ឆ្លង ក្នុងព្រឹត្តិការណ៍​២០កុម្ភៈ នៅ​ខេត្តកណ្ដាល