ភ្លៀងធ្លាក់ខ្លាំងច្រើនថ្ងៃនៅខេត្តព្រះវិហារ បណ្ដាលឱ្យលិចផ្ទះ និងផ្លូវមួយចំនួន

គិតត្រឹមរសៀល ថ្ងៃទី១៥ ខែកក្កដា ឆ្នាំ២០២៤នេះ មានភ្លៀងធ្លាក់ទៅគ្រប់ទិសទីក្នុងខេត្តព្រះវិហារ បណ្ដាលឱ្យជន់លិចទីតាំងមួយចំនួននៅក្នុងក្រុងព្រះវិហារ និងស្រុកឆែប ប៉ុន្តែអាជ្ញាធរអាចគ្រប់គ្រងស្ថានការណ៍បាន។

លោក ណុប វុធ្ធី អភិបាលរងខេត្តព្រះវិហារ បានឱ្យដឹងថា នាប៉ុន្មានថ្ងៃនេះខេត្តព្រះវិហារទាំងមូលមានភ្លៀងធ្លាក់ជាប់ៗគ្នា បណ្ដាលឱ្យលិចផ្លូវ និងផ្ទះសម្បែងពលរដ្ឋមួយចំនួននៅក្នុងក្រុងព្រះវិហារ និងឃុំកំពង់ស្រឡៅ១ ឃុំសង្កែ១ និងឃុំសង្កែ២ នៃស្រុកឆែប។ លោកបន្តថា ទោះជាយ៉ាងនេះក្តី​ អាជ្ញាធរមានវិធានការទប់ស្កាត់ កុំឱ្យមានការប៉ះពាល់ដល់ការរស់នៅរបស់ពលរដ្ឋ ដោយអាចនឹងបើកទ្វារទឹកទំនប់រក្សា និងជូនដំណឹងទៅអាជ្ញាធរខេត្តកំពង់ធំ ឱ្យត្រៀមការពារផងដែរ។ លោកបញ្ជាក់ថា បច្ចុប្បន្ននៅក្នុងខេត្តព្រះវិហារទាំងមូលមិនទាន់ដល់កម្រិតប្រកាសអាសន្ននៅឡើយទេ ហើយក៏មិនទាន់មានពលរដ្ឋណាម្នាក់មានបញ្ហាដោយសារជំនន់ទឹកភ្លៀងនេះដែរ។

សូមបញ្ជាក់ថា សរុបគិតជាមធ្យមប្រចាំថ្ងៃ ទទួលបានទឹកភ្លៀងកម្រិត ៨៤,៤៤ មម។   ដោយឡែកបរិមាណទឹកភ្លៀងដោយបូកយោងតាំងពីដើមរដូវ រហូតមកដល់ត្រឹមថ្ងៃទី១៥ ខែកក្កដា ឆ្នាំ ២០២៤ នៅទូទាំងខេត្តព្រះវិហារ ទទួលបានទឹកភ្លៀងសរុបគិតជាមធ្យម ៦៦៣,៧៤ មម៕

ដោយ៖ ជុន កុសល