ស្លាប់ម្នាក់ ក្អួតចង្អោរម្នាក់ ក្រោយហូបសម្លផ្សិតជាមួយគីង្គក់ តែ៤នាក់ទៀតរួចខ្លួន ព្រោះបាយមិនទាន់ឆ្អិន មិនបានហូប

បុរសម្នាក់បានបាត់បង់ជីវិតនៅឯមន្ទីរពេទ្យបង្អែកខេត្តរតនគិរី ចំណែកភរិយាមានអាការៈ ក្អួត ចង្អោរបន្តិចបន្តួច ក្រោយហូបសម្លរស្ងោផ្សិតជាមួយសត្វគីង្គក់ ចំណែកមនុស្ស៤នាក់ទៀតរួចខ្លួន មិនពុលអ្វីសោះ ព្រោះមិនទាន់បានហូបសម្លរនេះ ដោយសារតែរងចាំបាយដែលដាំមិនទាន់ឆ្អិន ទើបមិនទាន់បានហូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីសង្ស័យពុលផ្សិតលើប្ដីប្រពន្ធមួយគូរនេះបានកើតឡើង នៅវេលាម៉ោងប្រមាណ២៣និង៣០នាទី កាលពីថ្ងៃទី២៣ ខែកក្កដា ឆ្នាំ២០២៤ ស្ថិតក្នុងភូមិរ៉ក ឃុំកុកឡាក់ ស្រុកវើនសៃ ខេត្តរតនគិរី។

ប្រធានការិយាល័យជំងឺឆ្លង និងចាក់ថ្នាំបង្ការនៃមន្ទីរសុខាភិបាលខេត្ត លោកបណ្ឌិត អេង គុណវឌ្ឍ បានឲ្យកម្ពុជាថ្មី ដឹងនៅល្ងាចថ្ងៃទី២៤កក្កដានេះ ថា បុរសជាប្ដី និងប្រពន្ធបានទទួលទានសម្លរស្ងោរផ្សិតជាមួយសត្វគីង្គក់ ក្រោយពីបានទទួលទានហើយ ស្រាប់បុរសជាប្ដីក៏មានអាការៈមិនស្រួលខ្លួនឈឺពោះ វិលមុខ ឈឺក្បាល ក្អួត ចុកពោះ នៅវេលាម៉ោងប្រហែង៦ល្ងាចថ្ងៃដដែល។

លោកបណ្ឌិត អេង គុណវឌ្ឍបានបញ្ជាក់ថា ក្រោយជួបប្រទះបញ្ហាបែបនេះ នៅវេលាម៉ោង៨ថ្ងៃដដែល រហូតមកដល់ម៉ោងប្រហែល២៣និង៣០នាទី បុរសជាប្ដី និងប្រពន្ធ បានចូលសម្រាកព្យាបាលនៅមណ្ឌលសុខភាព វីរៈជ័យ ស្រុកវើនសៃ តែដោយសារស្ថានភាពធ្ងន់ធ្ងរពេក ក្រុមគ្រូពេទ្យក៏ដឹកបញ្ជូនជនរងគ្រោះមកកាន់មន្ទីរពេទ្យបង្អែកខេត្ត តែជាអកុសលបុរសរូបនោះបាត់បាត់ជីវិត នៅវេលាម៉ោង៣និង៣៤នាទីទៀបភ្លឺ ថ្ងៃទី២៤ ខែកក្កដា ឆ្នាំ២០២៤នេះ។

បុរសជាប្តីដែលបាត់បង់ជីវិតមានឈ្មោះ ប្រង កេះ ភេទប្រុស អាយុ៣០ឆ្នាំ ជនជាតិគ្រឹង។ ប្រពន្ធឈ្មោះ សេង យុគ ជនជាតិកាវ៉ែត។

ប្រធានការិយាល័យជំងឺឆ្លង និងចាក់ថ្នាំបង្ការនៃមន្ទីរសុខាភិបាលខេត្ត អះអាងថា បន្ទាប់ពីទទួលបានព័ត៌មានមន្ទីរសុខាភិបាលបានរៀបចំក្រុមការងារ សហការជាមួយការិយាល័យសុខាភិបាលស្រុកប្រតិបត្តិបរកែវ មណ្ឌលសុខភាពស្រុកវើនសៃ បានចុះធ្វើការអង្កេតសា្រវជ្រាវ ករណីនេះដល់ភូមិកើតហេតុ ដើម្បីសាកសួរព័ត៌មានបន្ថែម និងធ្វើការអប់រំសុខភាពបឋម៕

អត្ថបទ៖  វុទ្ធឦសាន