ព័ត៌មានជាតិ

មន្ត្រីជាន់ខ្ពស់ ប.ស.ស ណែនាំក្រុមការងារបច្ចេកទេសអន្តរក្រសួង ជំរុញមន្ត្រីធ្វើបណ្ណ ប.ស.ស ឱ្យបានគ្រប់ៗ គ្នា

បានផុស

១១ ខែ មុន

នៅ

ថ្ងៃសៅរ៍ ២៧ កក្កដា ២០២៤

ដោយ

មន្ត្រីជាន់ខ្ពស់ នៃបេឡាជាតិសន្តិសុខសង្គម(ប.ស.ស.) បានណែនាំឱ្យក្រុមការងារបច្ចេកទេសអន្តរក្រសួងសម្រាប់ការចុះបញ្ជីមន្ត្រីសាធារណៈមកក្នុងបេឡាជាតិសន្តិសុខសង្គមជំរុញឱ្យមន្ត្រីរាជការចុះឈ្មោះប្រើប្រាស់បណ្ណប.ស.ស. ឱ្យបានគ្រប់ៗគ្នា ដើម្បីពួកគាត់ទទួលបាននូវអត្ថប្រយោជន៍ផ្សេងៗ ពីរាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំប្រកាសសមាសភាពរបស់ក្រុមការងារបច្ចេកទេសអន្តរក្រសួងសម្រាប់ការចុះបញ្ជីមន្ត្រីសាធារណៈមកក្នុងបេឡាជាតិសន្តិសុខសង្គមនៅព្រឹកថ្ងៃទី ២៦ កក្កដានេះ លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. ជាប្រធានក្រុមការងារបច្ចេកទេស និងមានសមាសភាពសមាជិកមកពីតំណាងក្រសួងមហាផ្ទៃ ក្រសួងមុខងារសាធារណៈ ក្រសួងសង្គមកិច្ច អតីតយុទ្ធជន និងយុវនីតិសម្បទា និងបេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា រាជរដ្ឋាភិបាលកម្ពុជា បានពង្រីកការគ្របដណ្ដប់របបសន្តិសុខសង្គម ជូនដល់មន្ត្រីក្រុមប្រឹក្សារាជធានីខេត្ត/ក្រុង ស្រុក/ខណ្ឌ ឃុំ/សង្កាត់ និងភូមិ ព្រមទាំងអ្នកក្នុងបន្ទុករបស់ពួកគាត់បន្ថែមទៀត ដែលកិច្ចការមួយនេះទាមទារឱ្យក្រុមការងារបច្ចេកទេសអន្តរក្រសួងចូលរួមទាំងអស់គ្នា ក្នុងការចែករំលែកព័ត៌មាន និងត្រូវផ្ដល់ផ្លាស់ប្ដូរទិន្នន័យគ្រប់ជ្រុងជ្រោយឱ្យគ្នាទៅវិញទៅមក ដើម្បីអនុវត្តការងារដែលរាជរដ្ឋាភិបាលដាក់ចេញប្រកបដោយភាពជោគជ័យ និងមានប្រសិទ្ធភាពខ្ពស់។

ជាមួយគ្នានេះ លោកប្រធានក្រុមការងារបច្ចេកទេស បានស្នើដល់សមាជិកក្រុមការងារបច្ចេកទេសអន្តរក្រសួង ដែលជាភាគីពាក់ព័ន្ធនឹងការចុះបញ្ជីមន្ត្រីសាធារណៈ មកក្នុងបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ ត្រូវចូលរួមអនុវត្តភារកិច្ចដែលមានចែងក្នុងសេចក្ដីសម្រេចខាងលើ ដើម្បីធានាផ្តល់នូវអត្ថប្រយោជន៍របបសន្តិសុខសង្គម ជូនដល់មន្ត្រីសាធារណៈ អតីតមន្ត្រីរាជការ អតីតយុទ្ធជន និងមន្ត្រីដែលបម្រើការងារនៅថ្នាក់មូលដ្ឋាន ព្រមទាំងអ្នកនៅបន្ទុករបស់ពួកគាត់ អាចទទួលបានការគាំពារនេះគ្រប់ៗគ្នា។

គួរបញ្ជាក់ថា គិតត្រឹមឆមាសទី ១ ឆ្នាំ ២០២៤ នេះ ប.ស.ស. ផ្នែកថែទាំសុខភាពមានសមាជិកចំនួនសរុប ២ ២២៩ ៥២២ នាក់ (ស្រី ១ ២៥១ ២៣៨ នាក់) ក្នុងនោះមាន កម្មករ-និយោជិតចំនួន ១ ៥៦៥ ២៤១ នាក់ (ស្រី ៩៦៣ ៨២៦ នាក់) មន្ត្រីរាជការ អតីតមន្ត្រីរាជការ និងអតីតយុទ្ធជន មានចំនួន ៤៣៧ ៤០៧ នាក់ (ស្រី ១៤៨ ៩៥៥ នាក់) បុគ្គលស្វ័យនិយោជន៍មានចំនួន ១៧០ ២៥៤ នាក់ (ស្រី ១០៦ ០៦២ នាក់) និងអ្នកនៅក្នុងបន្ទុកសមាជិក ប.ស.ស មានចំនួន ៥៦ ៦២០ នាក់ (ស្រី ៣២ ៣៩៥ នាក់)៕

អត្ថបទ ៖ សំអឿន

Related Topics:ប.ស.ស