ក្រុមការងារសម្ដេចធិបតី បញ្ជាក់ថា ការធ្វើលិខិតថ្លែងអំណរគុណមិនតម្រូវឱ្យបង់ថវិកាបន្ថែមឡើយ

ក្រុមការងាររបស់សម្ដេចធិបតី ដែលរៀបចំធ្វើលិខិតថ្លែងអំណរគុណចំពោះសប្បុរសជនដែលចូលរួម «មូលនិធិកសាងហេដ្ឋារចនាសម្ព័ន្ធតាមព្រំដែន»ជាមួយនឹងរាជរដ្ឋាភិបាល ចេញមកបញ្ជាក់ថា ការធ្វើលិខិតថ្លែងអំណរគុណមិនតម្រូវឱ្យមានការបង់ថវិកាអ្វីទាំងអស់។

ការចេញមកបញ្ជាក់បែបនេះ បន្ទាប់ពីមានជនឆ្លៀតឱកាសបានប្រើប្រាស់រូបភាពគេងចំណេញ ដោយយកលិខិតថ្លែងអំណរគុណរបស់សម្តេចធិបតី បានផ្សព្វផ្សាយចេញជាបន្តបន្ទាប់ ទៅផ្ញើដោយសម្ងាត់ទៅសប្បុរសជនមួយចំនួន ដោយស្នើសុំជាទឹកចិត្តមួយចំនួនសម្រាប់ផ្តល់ជូនក្រុមការងារ ដោយបញ្ជាក់ថាខ្លួនជាក្រុមការងាររៀបចំលិខិតថ្លែងអំណរគុណ។ជុំវិញករណីនេះ ក្រុមការងាររបស់សម្ដេចធិបតី ដែលរៀបចំលិខិតថ្លែងអំណរគុណ បានប្រកាសបដិសេធ។

បើតាមការបញ្ជាក់របស់ក្រុមការងារ ការធ្វើលិខិតថ្លែងអំណរគុណ គឺក្រុមការងារបាននឹងកំពុងបំពេញភារកិច្ចយ៉ាងសកម្ម ហើយខិតខំធ្វើដោយយកចិត្តទុកដាក់ សហការខ្ពស់ជាមួយនឹងក្រុមការងារពាក់ព័ន្ធទាំងអស់ រួមនឹងធនាគារ ដើម្បីធ្វើឱ្យប្រាកដថាឈ្មោះត្រឹមត្រូវ​ និងតួលេខនៃការចូលរួមផងដែរ។ ក្រុមការងារទទួលបន្ទុករៀបចំបោះពុម្ភលិខិតថ្លែងអំណរគុណ និងផ្សព្វផ្សាយ គឺធ្វើដោយមិនតម្រូវឱ្យមានការបង់ប្រាក់ ឬជាថ្នូរនៃទឹកចិត្តណាមួយសម្រាប់ក្រុមការងារនោះឡើយ។

ប្រសិនបើមានការប្រព្រឹត្តដូចករណីខាងលើ ក្រុមការងារ ឱ្យរាយការណ៍មកជាបន្ទាន់ តាមរយៈផេក និង Telegram Channel ផ្លូវការរបស់សម្តេចធិបតី ដើម្បីឱ្យសមត្ថកិច្ចចាត់វិធានការយ៉ាងតឹងរឹងចំពោះជននោះ៕