កសិករដាំដុះ​ដំណាំ យក​ចូលទីផ្សារលក់​ខ្លួនឯង ចំណូល​មួយព្រឹកបានចន្លោះ​ពី​ ២០ ​ដល់ ​៣០​មុឺន​រៀល

ខណៈ​ការ​ដាំដុះ​ដំណាំ​ទទួល​បាន​ទិន្នផល ហើយត្រូវ​ឈ្មួញដើរប្រមូលទិញ​​​បន្ថោក​តម្លៃ​ ធ្វើ​ឲ្យកសិករ​មួយ​ចំនួននៅ​ស្រុក​បាណន់ ខេត្ត​បាត់ដំបង ក្រោយ​​ប្រមូលផល​​​បច្ចុប្បន្ន​បាន​ដឹក​យក​ទៅ​លក់​ដោយ​ខ្លួន​ឯងនៅ​​​ទីផ្សារ​ ដែល​ធ្វើឲ្យ​ចំណូល​កើន​ឡើង​មិនប្រឈម​មុខ​ជីវភាព​ក្នុង​គ្រួសារ។

លោក ជិន គ្រក់ ជាកសិករ នៅក្នុងឃុំចែងមាជ័យ ស្រុកបាណន់ រួមប្រជាកសិករជាច្រើនផ្សេងទៀត បានប្រាប់កម្ពុជាថ្មីនៅ ថ្ងៃទី២៩ ខែតុលា នេះថា លោកបានដាំម្ទេសដៃនាង ក្រៅពីនេះមាន ស្លឹកគ្រៃ ល្ហុង ត្រសក់ ត្រប់ នៅ​រាល់រដូវកាល​លើ​ទំហំ​ដីភូមិប្រមាណជា ២ រ៉ៃ។

កសិករ​រូបនេះ​ប្រាប់​ថា នៅរដូវកាលប្រមូលផលផ្លែម្ទេស ក្រុមឈ្មួញដើរទិញទម្លាក់តម្លៃ ក្នុងនោះផ្លែម្ទេសទុំបាន ១ គីឡូ ក្រាមត្រឹម ៣៥០០ រៀលប៉ុណ្ណោះ ស្លឹកគ្រៃ ១ គីឡូក្រាមបានចន្លោះពី ៤០០ ទៅ ៥០០ រៀលប៉ុណ្ណោះ ហើយក្នុងមួយថ្ងៃលោករកចំណូលមិនបាន ១០ មុឺនផង។ តែចាប់តាំងពីលោកបានដឹកមកលក់ឲ្យអាជីវករនៅតាមទីផ្សារក្នុងខេត្តលោករកចំណូលបានកើន​ឡើង​ ២០ មុឺនរៀលត្រឹមមួយព្រឹក តាមដឹកបានតិចឬច្រើន។

លោកបន្ត​ថា ម្ទេសទុំលោកអាច​លក់បានចន្លោះពី ៤៧០០ រៀលទៅ ៥០០០ រៀល ផ្លែខ្ចី ២៥០០ រៀក្នុង ១ គីឡូក្រាម និង គល់ស្លឹកគ្រៃ បាន ១ គីឡូក្រាម ១ ពាន់រៀល។

លោក លោក ជិន គ្រក់ បាន​កត់សម្គាល់​ថា ក្រោយ​ការដឹកលក់ដោយខ្លួនឯង ក្នុងរយះពេលជិត ១ ខែចុងក្រោយនេះ បានធ្វើឲ្យជីវភាពគ្រួសារលោកហាក់មានភាពល្អ​ប្រសើរ​ច្រើនជាងក្រុមឈ្មួញប្រមូលទិញពីលោកនៅនឹងចម្ការ។

ផលដំណាំផ្សេងៗដែលប្រជាកសិករបានដាំដុះ​តាមដីភូមិ ដើម្បីដោះបន្ទុកជីវភាពគ្រួសារប្រឈម​ទីផ្សារតាមរយះក្រុមឈ្មួញ​ដើរប្រមូលទិញ ខណះដែលបរិមាណទិន្នផល​ច្រើន តែបរិមាណចំណូល​បានតិចតួច ដែលចំណូលនេះធ្វើឲ្យកសិករតាមសហគមន៍ ស្ទើរអស់លទ្ធភាពបន្តការដាំដុះនិងធ្វើឲ្យជីវភាពគ្រួសារកសិករ​កាន់តែប្រឈមការខ្វះខាត ដោយសារ​តែរាល់ការដាំដុះត្រូវការប្រើដើមទុន ទាំងភ្ជួរដី ទាំងការដាំដុះ ទាំងចំណាយលើថ្លៃប្រើប្រាស់ថ្នាំបាញ់បង្ការសត្វល្អិត រួមទាំងការប្រើប្រាស់ជីសេរីរាង្គក្នុងការថែបំប៉នទៅលើទិន្នផលជាដើមផង។

ពលរដ្ឋ​បានឲ្យដឹងប្រហាក់ប្រហែលគ្នាថា ដោយសារកត្តាប្រឈមខាងលើនេះ ធ្វើ​ឲ្យ​ពួកគាត់ម្នាក់ៗស្ទើរតែបោះបង់ការដាំដុះ ដោយសារតែក្រុមឈ្មួកេងចំណេញហួសហេតុ ដោយមិនគិតពីជីវភាពរបស់កសិករ​ ដែលខិតខំដាំដុះនិងថែទាំ ចំណាយដើមទុនសព្វ​បែបយ៉ាងទម្រាំបានផល បែរជាដើរទម្លាក់តម្លៃតាមតែចិត្តចង់បាន និងចំណេញច្រើនហួសហេតុពេកធ្វើឲ្យប្រជាកសិករនៅតាមជនបទជាអ្នកចម្ការ ស្ទើរបោះបង់មុខរបរកសិកម្មគ្រប់គ្នា។

ប៉ុន្មានជារយះពេលចុងក្រោយ ពលរដ្ឋ​បាន​ឲ្យ​ដឹង​ថា ដោយ​មិនអស់ទឹកចិត្តដោយក្រុមឈ្មួញមួយចំនួននោះដែរ រាល់ទិន្នផលពួកគាត់ដាំបានយក​ដឹកជញ្ជូនតាមម៉ូតូ ទៅលើកឲ្យអាជីវករតាមបណ្តាទីផ្សារក្នុងខេត្តវិញដោយខ្លួនឯង និងបញ្ឈប់ការលក់ដូរឲ្យក្រុមឈ្មួញដើរប្រមូលទិញទៀត ដោយក្នុងមួយព្រឹកយ៉ាងហោច ក៏បានចំណូលចន្លោះពី២០ ទៅ៣០មុឺនរៀលដែរ តាមការដឹកបានតិចឬច្រើនប៉ុណ្ណោះ។

មន្ត្រីកសិកម្មខេត្ត​បាត់ដំបង​បានទទួលស្គាល់ថា រាល់ទិន្នផលរបស់កសិករ ដូចជា ម្ទេស ត្រប់ ត្រូវបានក្រុមឈ្មួញគ្រប់គ្រងបានលើតម្លៃ ទើបចេះតែធ្វើឲ្យកសិករត្អូញត្អែររាល់រដូវកាលថា ទិន្នផលដាំបានតែចុះថោក តាមពិតនៅលើទីផ្សារគឺមានតម្លៃសមរម្យ ដែលកសិករអាចទទួលយកបាន៕

អត្ថបទ៖ សៅ សារិទ្ធ