រដ្ឋមន្ត្រីអប់រំជំរុញយុវជនចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុនខិតខំសិក្សាបំណិនរឹង និងទន់យកមកអភិវឌ្ឍន៍ប្រទេសជាតិ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡាបានលើកទឹកចិត្តនិងជំរុញដល់យុវជនដែលចូលរួមកម្មវិធីនាវាយុវជនអាស៊ីអាគ្នេយ៍និងជប៉ុនត្រូវខិតខំសិក្សាពីបំណិនរឹងនិងបំណិនទន់ដើម្បីយកមកអភិវឌ្ឍន៍ប្រទេសជាតិកាន់តែរីកចម្រើន។

ការជំរុញនេះបានធ្វើឡើងនៅរសៀលថ្ងៃទី០១វិច្ឆិកានៅទីស្តីការក្រសួងក្នុងជំនួបសម្ដែងការគួរសម និងសំណេះសំណាលជាមួយប្រតិភូយុវជននៃសមាគមនាវាយុវជនអាស៊ីអាគ្នេយ៍កម្ពុជា មុននឹងចេញដំណើរចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុន(SSEAYP) លើកទី៤៨ នៅថ្ងៃទី០៣ ខែវិច្ឆិកា ឆ្នាំ២០២៤។

លោកបណ្ឌិតសភាចារ្យ ឧបនាយករដ្ឋមន្ត្រី បានបញ្ជាក់ថា ការចូលរួមក្នុងកម្មវិធីនេះយុវជនម្នាក់ៗសុទ្ធតែមានតួនាទីជាអ្នកតំណាងឱ្យប្រទេសកម្ពុជាទាំងមូលនិងបានណែនាំដល់យុវជនគ្រប់រូប ឱ្យមានទម្លាប់ និងវិន័យច្បាស់លាស់
ចេះគោរពពេលវេលាខ្លួនឯង និងអ្នកដទៃ សិក្សាពីវប្បធម៌ និងរបៀបរបបរស់នៅរបស់ប្រទេសដទៃ សិក្សាពីបំណិនរឹង និងបំណិនទន់ជាពិសេស មានភាពធន់ក្នុងខ្លួន ពោលគឺការតស៊ូព្យាយាម ហ៊ានជំនះរាល់ឧបសគ្គចេះសម្របសម្រួលខ្លួនទៅនឹងការប្រែប្រួលនៃមជ្ឈដ្ឋានជុំវិញខ្លួនដើម្បីប្រមូលយកចំណេះដឹង និងបទពិសោធថ្មីៗ ដើម្បីកសាងសមត្ថភាពខ្លួនបន្ថែមទៀតបង្កើតទំនាក់ទំនងល្អ មានគោលដៅច្បាស់លាស់ រៀនសូត្រ និងកែលម្អខ្លួនជាប្រចាំក្លាយជាធនធានមនុស្ស
និងជួយអភិវឌ្ឍសង្គមជាតិនាពេលខាងមុខ។

កម្មវិធីនាវាយុវជនអាស៊ីអាគ្នេយ៍ និងជប៉ុននេះ ត្រូវបានបង្កើតឡើងនៅឆ្នាំ១៩៧៤ដោយរដ្ឋាភិបាលជប៉ុន និងរដ្ឋាភិបាលនៃប្រទេសសមាជិកអាស៊ានក្នុងគោលបំណងផ្តល់ឱកាសដល់យុវជនឱ្យទទួលបានការពង្រឹងនិងពង្រីកកិច្ចការទំនាក់ទំនង ការរៀនធ្វើការងារជាក្រុមការផ្លាស់ប្តូរបទពិសោធ និងចែករំលែកចំណេះដឹងផ្សេងៗ។ នៅឆ្នាំ២០២៤កម្មវិធីនេះត្រូវបានរដ្ឋាភិបាលជប៉ុន និងប្រទេសជាសមាជិកអាស៊ានសម្រេចរៀបចំអោយមានដំណើរការជាប្រក្រតី ដោយប្រតិភូយុវជនចំនួន ១៦រូបមកពីបណ្តាប្រទេសនីមួយៗក្នុងតំបន់អាស៊ាន នឹងធ្វើដំណើរទៅចូលរួមកម្មវិធីនេះដោយនាវានឹងចូលចតនៅប្រទេសចំនួនបី គឺប្រទេសឥណ្ឌូនេស៊ី ប្រទេសវៀតណាម និងប្រទេសជប៉ុន។

គួររំលឹកផងដែរថា អគ្គនាយកដ្ឋានយុវជនបានប្រកួតប្រជែងជ្រើសរើសយុវជនដែលពោរពេញទៅដោយសក្តានុពល ចំនួន១៥រូប និងប្រធានប្រតិភូចំនួន ១រូប ដើម្បីតំណាងយុវជនកម្ពុជាចូលរួមក្នុងកម្មវិធីប្រចាំតំបន់ (SSEAYP) លើកទី៤៨។ ប្រតិភូទាំងអស់បានឆ្លងកាត់វគ្គបំប៉នសមត្ថភាពទៅលើបំណិនទន់ ការងារជាក្រុម ការពិភាក្សាក្រុម
និងការសម្តែងសិល្បៈវប្បធម៌ ក្រោមកិច្ចសហការរវាង អគ្គនាយកដ្ឋានយុវជន និងសមាគមនាវាយុវជនអាស៊ីអាគ្នេយ៍កម្ពុជា៕

អត្ថបទ៖ សំអឿន