ដើម្បីពង្រឹងភាពស្អាតស្អំ នគរបាលជាតិជិត៦០០នាក់ ឈ្វេងយល់បន្ថែមពីច្បាប់ប្រឆាំងអំពើពុករលួយ  

ដើម្បីចូលរួមអនុវត្តគោលនយោបាយកំណែទម្រង់ និងលើកកម្ពស់អភិបាលកិច្ចល្អ សំដៅពង្រឹងក្រមសីលធម៌វិជ្ជាជីវៈ និងប្រសិទ្ធភាពការងាររបស់មន្រ្តីអនុវត្តច្បាប់ អង្គភាពប្រឆាំងអំពើពុករលួយ បានអញ្ជើញផ្សព្វផ្សាយ «ច្បាប់ស្តីពីការប្រឆាំងអំពើពុករលួយ» ដល់មន្រ្តីនគរបាលជាតិចំនួន ៥៩៧រូប។

ពិធីផ្សព្វផ្សាយនេះ ត្រូវបានធ្វើឡើងនាថ្ងៃទី២៦ ខែធ្នូ ឆ្នាំ២០២៤ នៅស្នងការដ្ឋាននគរបាលរាជធានីភ្នំពេញ គឺតបតាមការស្នើសុំពីអគ្គស្នងការដ្ឋាននគរបាលជាតិ ក្រោមវត្តមានលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ និងលោកនាយឧត្តមសេនីយ៍ ស ថេត អគ្គស្នងការនគរបាលជាតិ។

លោកទេសរដ្ឋមន្ត្រី ឱម យ៉ិនទៀង បានកោតសរសើរ និងវាយតម្លៃខ្ពស់ចំពោះអគ្គស្នងការដ្ឋាននគរបាលជាតិ ក្រោមការដឹកនាំរបស់នាយឧត្តមសេនីយ៍ ស ថេត ដែលបានរៀបចំកម្មវិធីបំពាក់បំប៉នស្មារតីដល់មន្រ្តីនគរបាល ដើម្បីពង្រឹងពង្រីកប្រសិទ្ធភាពការងារ ស្របតាមយុទ្ធសាស្រ្តបញ្ចកោណ របស់រាជរដ្ឋាភិបាល ក្នុងការលើកកម្ពស់ និងការពង្រឹងភាពស្អាតស្អំក្នុងរដ្ឋបាលសាធារណៈ និងបន្តជំរុញការកែទម្រង់អភិបាលកិច្ចល្អ។

ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ លើកឡើងថា «នគរបាលជាតិ នៅតែជាឆ្អឹងខ្នងមួយដ៏សំខាន់ ដែលជាទំនុកទុកចិត្តរបស់ប្រទេសជាតិ និងប្រជាជន» ពាក់ព័ន្ធនឹងកិច្ចការពារសន្តិសុខ សណ្ដាប់សាធារណៈ សុវត្ថិភាពរបស់ប្រជាជន ការប្រឆាំងភេរវកម្ម ការប្រឆាំងភាពចលាចលគ្រប់បែបយ៉ាង គឺជាការទទួលខុសត្រូវមួយដ៏ខ្ពស់ ទោះបីនៅមានបញ្ហាត្រូវដោះស្រាយច្រើនក៏ដោយ។

ក្នុងបទឧទ្ទេសនាមនេះ លោកទេសរដ្ឋមន្ត្រី ក៏បានលើកឡើងពីយុទ្ធសាស្រ្តប្រឆាំងអំពើពុករលួយដែលមានមុខព្រួញ អប់រំ បង្ការទប់ស្កាត់ និងបង្រ្កាបបទល្មើសពុករលួយបញ្ជូនទៅតុលាការ និងប្រភពព័ត៌មានដែលនាំឱ្យបើកការស្រាវជ្រាវ ដូចជា ចំហ សម្ងាត់ ទាំងក្នុង និងក្រៅប្រទេស នីតិវិធីស៊ើបអង្កេត និងកសាងសំណុំរឿងបញ្ជូនទៅតុលាការ ព្រមទាំងបានលើកសម្រង់បទល្មើសពុករលួយ និងទោសដែលមាន ៣៨បទល្មើសក្នុងក្រមព្រហ្មទណ្ឌ រួមនឹង១៩ បទល្មើសពុករលួយដែលមានក្នុងច្បាប់ផ្សេងទៀត។

ម៉្យាងវិញទៀត ការផ្សព្វផ្សាយពីច្បាប់ប្រឆាំងអំពើពុករលួតនេះ ក៏ស៊ីចង្វាក់ជាមួយអភិក្រមទាំង៥ របស់សម្តេចតេជោ ហ៊ុន សែន គឺ​ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» សំដៅជំរុញភាពស្អាតស្អំក្នុងរដ្ឋបាលសាធារណៈ ក្នុងយុទ្ធសាស្រ្តចតុកោណ បន្តដល់យុទ្ធសាស្រ្តបញ្ចកោណ និងកម្មវិធីនយោបាយរបស់រាជរដ្ឋាភិបាលកម្ពុជា អាណតិ្តទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

រាជរដ្ឋាភិបាល អាណត្តិទី៧ មានផែនការច្បាស់លាស់ក្នុងការលើកកម្ពស់ និងពង្រឹងភាពស្អាតស្អំក្នុងរដ្ឋបាលសាធារណៈ និងបន្តជំរុញការកែទម្រង់អភិបាលកិច្ចល្អ ជាពិសេសការពង្រឹងការងារប្រយុទ្ធប្រឆាំងអំពើពុករលួយ ដោយឆន្ទៈមុតស្រួច និងការប្តេជ្ញាខ្ពស់ តាមរយៈការលើកកម្ពស់ការអនុវត្តវិធានការស្នូលទាំង៣ គឺ អប់រំ ការងារបង្ការទប់ស្កាត់ និងការអនុវត្តច្បាប់ប្រឆាំងអំពើពុករលួយ ដើម្បីធានាប្រសិទ្ធភាពការអនុវត្តច្បាប់ និងលើកស្ទួយភាពស្អាតស្អំក្នុងរដ្ឋបាលសាធារណៈ៕