ពលរដ្ឋទទួចអាជ្ញាធរ ជួយជួសជុល​ផ្លូវជាច្រើន​ខ្សែ​នៅភូមិកូនសេក ខែវស្សាម្តងៗ​​​ពិបាក​ធ្វើ​ដំណើរ បង្ក​គ្រោះថ្នាក់​ជា​ញឹកញាប់

ប្រជាពលរដ្ឋនៅក្នុងភូមិព្រៃកូនសេក សង្កាត់អូរចា ក្រុងបាត់ដំបង នៅតែបន្តទទួចសំណូមពរដល់អាជ្ញាធរសង្កាត់ ក៏ដូចជា រដ្ឋបាលក្រុងបាត់ដំបង ឲ្យជួយសម្រួលផ្លូវជាច្រើនខ្សែក្នុងភូមិ ខណះផ្លូវទាំងនេះប្រឈមការធ្វើដំណើររាល់ឆ្នាំ នៅពេលមានភ្លៀងធ្លាក់ម្តងៗ ជាពិសេសក្នុងរដូវវស្សាដែលធ្វើឲ្យអ្នកធ្វើដំណើរខ្លះដួល​រងគ្រោះ​ជាញឹកញាប់។

ប្រភព​ពី​ពលរដ្ឋបានបង្ហើបថា ផ្លូវប៉ុន្មានខ្សែក្នុងភូមិព្រៃកូនសេកនេះរាល់ឆ្នាំ ខាងសង្កាត់មិនព្រមជួយ​ជួយ​សម្រួលដល់ពលរដ្ឋនោះទេ បង្កជាករណីរាំរ៉ៃដែលប្រជាពលរដ្ឋប្រឈមក្នុងការធ្វើដំណើរនៅរដូវកាលធ្លាក់ទឹកភ្លៀង បើទោះបីពលរដ្ឋ​ទទួចសំណូពរជាច្រើនលើកច្រើនសារ ក៏នៅតែគ្មានដំណោះស្រាយនោះដែរ ខណះផ្លូវមួយខ្សែៗមិនមានចម្ងាយឆ្ងាយនោះប៉ុន្មានទេ។

លោក វ៉ាន់ ថុល ប្រធានមន្ទីរអភិវឌ្ឍន៍ជនបទខេត្តបាត់ដំបង​បានប្រាប់កម្ពុជាថ្មីយ៉ាងខ្លីថា” ផ្លូវខ្លីៗនៅក្នុងភូមិ ជាគម្រោងរបស់មូលនិធិឃុំសង្កាត់ ដែលត្រូវដោះស្រាយ”។ ចំណែក មន្ត្រីសង្កាត់អូរចានៅមិនទាន់បានឆ្លើយតបលើករណីនេះ នៅឡើយទេ៕

អត្ថបទ៖ សៅ សារិទ្ធ