ព័ត៌មានជាតិ

គម្រោងសាងសង់ស្ថានីយបូមទឹកលូ ៥ សម្រេចបាន ៧៥% ហើយ គ្រោងបញ្ចប់នៅដំណាច់ខែមិថុនាខាងមុខ

បានផុស

២ សប្តាហ៍ មុន

នៅ

ថ្ងៃអង្គារ ១៨ មីនា ២០២៥

ដោយ

គិតត្រឹមថ្ងៃទី ១៧ ខែមីនា ឆ្នាំ ២០២៥ គម្រោងសាងសង់ស្ថានីយបូមទឹកលូ ៥ ដែលជាគម្រោងផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ ស្ថិតក្នុងភូមិដំណាក់ធំ ៣ សង្កាត់ស្ទឹងមានជ័យទី ៣ ខណ្ឌមានជ័យ រាជធានីភ្នំពេញ សម្រេចបាន ៧៥% នៃគម្រោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ បានឱ្យដឹងនារសៀលថ្ងៃទី ១៨ មីនា នេះថា ការសាងសង់ស្ថានីយបូមទឹកលូ ៥ ត្រូវបានបំពាក់បន្ថែមម៉ូទ័របូមទឹកខ្នាតធំ ទំហំមុខកាត់ ១.៥ ម៉ែត្រ ចំនួន ២ គ្រឿង និងទំហំមុខកាត់ ១ ម៉ែត្រ ចំនួន ១ គ្រឿង ដែលមានសមត្ថភាពបូមទឹក ១២ ម៉ែត្រគូប ក្នុង ១ វិនាទី ជាគម្រោងផែនការវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ។

លោកប្រធានមន្ទីរ បានបញ្ជាក់ថា ស្ថានីយបូមទឹកនេះ នឹងកាត់បន្ថយការជន់លិចដោយទឹកភ្លៀងនៅតំបន់ខាងត្បូង និងខាងកើតអាកាសយានដ្ឋានអន្តរជាតិភ្នំពេញ ក្នុងភូមិសាស្ត្រខណ្ឌសែនសុខ និងខណ្ឌពោធិ៍សែនជ័យ។

លោក សាំ ពិសិដ្ឋ បញ្ជាក់ទៀតថា ដោយអនុវត្តតាមការណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា គម្រោងសាងសង់ស្ថានីយបូមទឹកលូ ៥ ចាប់ផ្តើមបើកការដ្ឋានសាងសង់កាលពីថ្ងៃទី ៧ ខែឧសភា ឆ្នាំ ២០២៤ ដោយគ្រោងបញ្ចប់នៅដំណាច់ខែមិថុនា ឆ្នាំ ២០២៥ ខាងមុខ។ ចំពោះវឌ្ឍនភាព នៃការសាងសង់ស្ថានីយបូមទឹកលូ ៥ គម្រោងទាំងមូល បើគិតត្រឹមថ្ងៃទី ១៧ ខែមីនា ឆ្នាំ ២០២៥ សម្រេចបាន ៧៥% នៃគម្រោងហើយ៕

អត្ថបទ ៖ ស្រីរ័ត្ន