មាន​ដីទំហំ​ត្រឹម ៥ គុណ ១០ ម៉ែត្រ កសិករ​​ម្នាក់​ដាំដុះ​បន្លែ​ចម្រុះ បាន​​ទាំង​ចំណូល​ និង​មិនខ្វះ​ហូបក្នុង​គ្រួសារ

ក្រៅពីរបរធ្វើស្រែចម្ការ ការដាំបន្លែ ចិញ្ចឹមសត្វបែបលក្ខណៈគ្រួសារនៅផ្ទះ ក៏អាចរកប្រាក់ចំណូលប្រចាំថ្ងៃជួយដល់សេដ្ឋកិច្ចគ្រួសារឲ្យមានជីវភាពប្រសើរជាងមុន ដែលប្រជាពលរដ្ឋពុំគួរមើលរំលង។

លោក ខ្លឹម ផាត ប្រជាពលរដ្ឋរស់នៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ បានឲ្យដឹងថា ក្រៅពីរបរធ្វើស្រែចម្ការ លោកបានចាប់យកមុខរបរដាំបន្លែធម្មជាតិលក្ខណៈគ្រួសារ មានរយៈពេលជាង ១០ ឆ្នាំ មកហើយ លើផ្ទៃដីទំហំ ៥ ម៉ែត្រ គុណ ១០ ម៉ែត្រ ដោយដាំបន្លែស្ពៃគ្រប់មុខ ជីគ្រប់មុខ បន្លែផ្ទី និងស្រឡាត ជាដើម។

ជារៀងរាល់ព្រឹកលោក ខ្លឹម ផាត តែងងើបពីដំណេក នៅវេលាម៉ោង ៣ ឬ ៤ ព្រឹក ដើម្បីស្រោចដំណាំបន្លែ និងកាត់បន្លែឲ្យប្រពន្ធ យកទៅលក់នៅឯផ្សារទីរួមខេត្តក្រចេះ។ ទោះបីជាផ្ទៃដីដាំបន្លែរបស់លោកតិចតួចក្តី ប៉ុន្តែអាចរកប្រាក់ចំណូលបានប្រចាំថ្ងៃ គ្រាន់តិចនិងច្រើនតាមថ្ងៃប៉ុណ្ណោះ។

ក្រៅពីមុខរបរដាំបន្លែ លោក ខ្លឹម ផាត បាន​ចិញ្ចឹមសត្វមាន់ គោ សត្វជ្រូក ដែលអាចលក់បានតម្លៃខ្ពស់ ជាពិសេសក្នុងរដូវខែមានពិធីបុណ្យទានចូលឆ្នាំ។ បន្ថែមពីនេះ លោក​ក៏មាន​ម៉ាស៊ីនកិនស្រូវ ដែលសុទ្ធសឹងអាចរកប្រាក់ចំណូលបានជួយ​លើកកម្ពស់ជីវភាពគ្រួសារ​មិន​អោយ​ខ្វះខាត។

ជាការចែករំលែក លោកក៏បានអំពាវនាវដល់បងប្អូនប្រជាពលរដ្ឋ ដែលមានដីចូលកុំទុកចោលឲ្យនៅទំនេរ ត្រូវចេះកែច្នៃដាំដំណាំបន្លែផ្សេងៗ ទោះបីជាមិនបានដល់ថ្នាក់លក់ដូរ បានត្រឹមទុកហូបក្នុងគ្រួសារក៏បានដែរ ជួយកាត់បន្ថយការចំណាយ​ថវិកាប្រចាំថ្ងៃផងដែរ៕

អត្ថបទ៖ ប្រុញ វិធិន