រដ្ឋមន្ត្រីកិច្ច​ការនារី៖ អាកាសធាតុក្ដៅខ្លាំង អាចប៉ះពាល់ដល់កូនក្នុងផ្ទៃ ឬអាចឈានដល់រលូតកូន

រដ្ឋមន្ត្រីក្រសួងកិច្ចការនារី ដែលធ្លាប់បម្រើការជាវេជ្ជបណ្ឌិតច្រើនឆ្នាំនៅបារាំង ព្រមានថា បញ្ហាអាកាសធាតុក្ដៅខ្លាំង អាចបណ្ដាលឱ្យប៉ះពាល់ដល់កូនក្នុងផ្ទៃ ឬអាចឈានដល់រលូតកូនថែមទៀតផង។ រដ្ឋមន្ត្រីក្រសួងកិច្ចការនារី លោកស្រីបណ្ឌិត អ៊ឹង កន្ថាផាវី ព្រមានដូច្នេះ នៅក្នុងកិច្ចសន្ទនាអំពីសមភាពយេនឌ័រនៅក្នុងផែនការជាតិរួមចំណែកឆ្លើយតបនឹងបម្រែបម្រួលអាកាសធាតុដំណាក់កាលទី៣ រៀបចំឡើងនាថ្ងៃទី២៥ ខែមេសា ឆ្នាំ២០២៥។

បណ្ឌិត​ផ្នែក​វេជ្ជសាស្ត្រ​ លោកស្រី អ៊ឹង កន្ថាផាវី ព្រមានដូច្នេះ ៖«ពេលណាមានកម្ដៅកើនឡើង១ដឺក្រេ លើសពីមធ្យម កើនមួយដឺក្រ Celsius លើសពីមធ្យម វាប៉ះពាល់ទៅលើ ការសម្រាលកូន មានផ្ទៃពោះ អាចរលូតកូនថែមទៀត »។

តាមលោកស្រីរដ្ឋមន្ត្រីក្រសួងកិច្ចការនារី​ បញ្ហាកម្ដៅកើនឡើងខ្លាំង អាចធ្វើឱ្យប៉ះពាល់ដល់ការបន្តពូជ ជះផលប៉ះពាល់ធ្ងន់ធ្ងរដល់គោលនយោបាយប្រជាជន។

លោកស្រី អ៊ឹង កន្ថាផាវី អះអាងថា បញ្ហាកម្ដៅក្ដៅខ្លាំងអាចប៉ះពាល់ទារក អាចបណ្ដាលឱ្យមានពិការភាព សុខភាព ការលូតលាស់មិនល្អ ដែលជាបញ្ហាចោទមួយទាមទារឱ្យមានការដោះស្រាយរួមគ្នា ដើម្បីសង្គមកម្ពុជា។ បន្ថែមពីនេះ លោកស្រី អះអាងថា បញ្ហាកម្ដៅគឺជះឥទ្ធិពលខ្លាំងចំពោះស្រ្តី។

គួរឱ្យដឹងដែរថា មន្ត្រីជាន់ខ្ពស់ក្រសួងសុខាភិបាលកម្ពុជា លោកវេជ្ជបណ្ឌិត លី សូវ៉ាន់ ក៏បានលើកឡើងថា នៅរដូវក្តៅទាមទារឱ្យប្រជាពលរដ្ឋត្រូវមានការប្រុងប្រយ័ត្ន និងការពារសុខភាពឱ្យបានល្អ ដើម្បីចៀសវាងនូវការកើតជំងឺមួយចំនួនដូចជា ជំងឺបេះដូង ជំងឺសួត រាករូស ការដួលសន្លប់ដោយសារខ្វះជាតិទឹក ការបរិភោគចំណីអាហារមិនស្អាត និងមិនមានអនាម័យ និងជំងឺឆ្លងផ្សេងៗទៀត។

ជាមួយគ្នា លោកវេជ្ជបណ្ឌិតបានណែនាំឱ្យប្រជាពលរដ្ឋពិសារទឹកឱ្យបានច្រើនយ៉ាងហោចណាស់២លីត្រក្នុងមួយថ្ងៃ ចៀសវាងការ បរិភោគភេសជ្ជៈផ្អែមខ្លាំង កុំនៅក្រោមកំដៅថ្ងៃយូរពេក ត្រូវស្លៀកសម្លៀកបំពាក់ស្ដើង និងស្លៀកពាក់ខោអាវវែងៗការពារកំដៅថ្ងៃដើម្បីការពារសុខភាពនៅពេលអាកាសធាតុក្តៅខ្លាំង៕

ដោយ៖ ង៉ិល ណារ៉ាត់