ច្រក​តំបន់​និង​ច្រក​អន្តរជាតិ​សរុប​ចំនួន​៥ទីតាំង ក្នុងភូមិសាស្ត្រខេត្តបាត់ដំបង ត្រូវ​បិទ​ជាស្ថាពរ

ចាប់​តាំង​ពី​ភាគីថៃបានប្រកាស​ កាលពីល្ងាចមិញរួចមក គេសង្កេតឃើញថា ចាប់តាំងពីព្រឹកថ្ងៃទី ២៤ ខែមិថុនា ឆ្នាំ២០២៥ នៅគ្រប់ច្រកតំបន់ និងច្រកអន្តរជាតិ សរុបចំនួន ៥ ទីតាំង ទៅបានភាគីកម្ពុជាយើង ធ្វើការបិទទ្វារជាស្ថាពរ ដោយមិនអនុញ្ញាតឲ្យមានការធ្វើចរាចរណ៍ ឆ្លងដែនទៅវិញទៅមកឡើយ។

គួរបញ្ជាក់ដែរថា ក្នុងភូមិសាស្ត្រខេត្តបាត់ដំបង មានច្រកទ្វារចំនួន ៥ ដែលជាប់ភូមិសាស្ត្រជាមួយប្រទេសថៃ គឺមានច្រកតំបន់ចំនួន៣ គឺច្រកតំបន់ ៤០០ ស្ថិតក្នុងស្រុកសំឡូត ច្រក​តំបន់អូររំដួល ស្ថិតក្នុងស្រុកភ្នំព្រឹក និងច្រកតំបន់អូរអន្លក់ ស្ថិតក្នុងស្រុកកំរៀង ឯ​ច្រក​អន្តរជាតិគឺមានចំនួនពីរ គឺច្រកអន្តរជាតិដូង ស្ថិតក្នុងស្រុកកំរៀង និងច្រកអន្តរជាតិភ្នំដី ស្ថិតក្នុងស្រុកសំពៅលូន។

បច្ចុប្បន្ន​ចាប់​តាំង​ពី​ព្រឹក​មិញ​មក ច្រកទ្វារ​ទាំង​ប្រាំ​ត្រូវ​បាន​បិទជាស្ថាពរហើយ ទាំង​ខាង​ភាគី​ថៃ​និង​ខាងភាគី​កម្ពុជា ដោយ​ឡែក​នៅ​ច្រកអន្តរជាតិភ្នំដី ដែល​ស្ថិត​ក្នុង​ស្រុក​សំពៅ​លូន គឺ​ភាគីថៃ​បាន​មូលមតិ​គ្នា​ជា​មួយ​ភាគី​កម្ពុជា សម្រេចបើកទ្វារច្រកចាប់ពីម៉ោង ៥ ល្ងាច ដល់ម៉ោង ៨ យប់ នាថ្ងៃទី ២៤ ខែមិថុនា​នេះ ដើម្បី​ឱ្យ​ប្រជាពលរដ្ឋនិងពលករខ្មែរ ចាក​ចេញ​ពី​ប្រទេស​ថៃ​ចូល​មក​កាន់​ទឹក​ដី​កម្ពុជា​វិញ៕

អត្ថបទ ៖ សោ និយមរ័ត្ន