កម្ពុជាទទួលសំណើទីម័រក្នុងការបង្កើតឱ្យមានក្រុមមិត្តភាពសភាប្រទេសទាំងពីរ

កម្ពុជាទទួលយកសំណើរបស់សភាទីម័រ ដែលមានបំណងចង់បង្កើតឱ្យមានក្រុមមិត្តភាពអន្តរសភាកម្ពុជា-ទីម័រដើម្បីជំរុញបន្ថែមនូវការប្រាស្រ័យទាក់ទងគ្នា និងកិច្ចសហប្រតិបត្តិការនៃស្ថាប័ននីតិបញ្ញត្តិប្រទេសទាំងពីរ។

សំណើនេះ គឺត្រូវបានឆ្លើយតបដោយប្រធានព្រឹទ្ធសភានៃកម្ពុជា សម្ដេចតេជោ ហ៊ុន សែន ទៅនឹងប្រធានសភាជាតិទីម័រ លោកស្រី Maria Fernanda Lay ក្នុងការបង្កើតឱ្យមានក្រុមមិត្តភាពអន្តរសភារវាងប្រទេសកម្ពុជានិងប្រទេសទីម័រ។ ជាមួយនឹងការស្វាគមន៍ចំពោះសំណើរបស់ប្រធានសភាទីម័រតាមរយៈឯកអគ្គរដ្ឋទូតថ្មីរបស់ទីម័រ សម្ដេចតេជោ ហ៊ុន សែន បានណែនាំឱ្យអគ្គលេខាធិការ​ព្រឹទ្ធសភា រៀបចំកិច្ចការនេះ ដោយសហការជាមួយរដ្ឋសភាជាតិកម្ពុជា។

សម្ដេចតេជោ ហ៊ុន សែន ឆ្លើយតបបែបនេះក្នុងជំនួបនាព្រឹកថ្ងៃទី២៨ ខែសីហា ឆ្នាំ២០២៥ នៅពេលដែលសម្ដេច បានអនុញ្ញាតឱ្យលោក Marcos dos Reis da Costa ឯកអគ្គរដ្ឋទូតថ្មីរបស់ទីម័រប្រចាំកម្ពុជាចូលជួបសម្តែងការគួរសម នៅវិមានព្រឹទ្ធសភា រាជធានីភ្នំពេញ។

ក្នុងនាមរដ្ឋាភិបាល និងប្រជាជនទីម័រ លោកឯកអគ្គរដ្ឋទូតថ្មី បានសម្តែងនូវការដឹងគុណ និងអរគុណចំពោះការគាំទ្រជាបន្តបន្ទាប់របស់សម្តេចតេជោ ជាពិសេសក្នុងដំណើរការចូលជាសមាជិកពេញសិទ្ធិអាស៊ានរបស់ទីម័រ។ ត្រង់ចំណុចនេះ សម្តេចតេជោ ហ៊ុន សែន ប្រធានព្រឹទ្ធសភា និងជាប្រមុខរដ្ឋស្តីទីកម្ពុជា បានបញ្ជាក់ថា ទោះចាកចេញពីតំណែងនាយករដ្ឋមន្រ្តីក៏ដោយ តែសម្តេចមានមោទនភាព ដែលកម្ពុជា​បន្តខិតខំប្រឹងប្រែងចលនា​ដៃគូពាក់ព័ន្ធផ្សេងៗទៀត ដើម្បីជំរុញគាំទ្រទីម័រចូលសមាជិកពេញសិទ្ធិអាស៊ានពេលនេះ។

ចំពោះទំនាក់ទំនងទ្វេភាគី សម្ដេចតេជោប្រធានព្រឹទ្ធសភា បានលើកទឹកចិត្តឱ្យរដ្ឋាភិបាលទាំងពីរត្រូវខិតខំបន្តជំរុញបន្ថែមទៀតនូវកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគផងដែរ។ តាមរយៈបេសកកម្មរបស់លោកឯកអគ្គរដ្ឋទូតនៅកម្ពុជា សម្ដេច សង្ឃឹមថា នឹងធ្វើឱ្យទំនាក់ទំនងកម្ពុជា-ទីម័រកាន់តែស៊ីជម្រៅបន្ថែមទៀត៕