ព័ត៌មានជាតិ

អាជ្ញាធរសង្កាត់ស្ទឹងមានជ័យ ១ ដាក់លូមុខកាត់ ១ ម៉ែត្រ ដើម្បីរំដោះទឹកក្នុងរដូវវស្សា

បានផុស

៨ ខែ មុន

នៅ

ថ្ងៃពុធ ១ តុលា ២០២៥

ដោយ

ដើម្បីបញ្ចៀសការជន់លិចនៅរដូវវស្សា អាជ្ញាធរសង្កាត់ស្ទឹងមានជ័យ ១ បានប្រើប្រាស់ថវិកាអភិវឌ្ឍន៍ឆ្នាំ ២០២៥ ធ្វើការដាក់ប្រព័ន្ធលូថ្មីបន្ថែមដែលមានទំហំធំជាងមុន អាចរំដោះទឹកបានទាន់ពេលវេលា លឿនជាងមុន ពេលមានភ្លៀងធ្លាក់មកម្ដងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងទីតាំងគម្រោងកំពុងស្ថាបនាអភិវឌ្ឍន៍ដាក់ប្រព័ន្ធលូថ្មីបន្ថែមនេះ ស្ថិតនៅតាមបណ្ដោយផ្លូវបេតុង ក្នុងភូមិទ្រា ១ សង្កាត់ស្ទឹងមានជ័យទី ១ រាជធានីភ្នំពេញ។

លោក កក្កដា និង លោក ស្រេង សុភ័ក្រ ដែលជាប្រជាពលរដ្ឋរស់នៅតំបន់ខាងលើ បានលើកឡើងដូចគ្នាថា ទីតាំងផ្លូវនេះ ពេលភ្លៀងមកម្ដងៗ តែងតែមានការជន់លិច មិនអាចធ្វើដំណើរបាននោះទេ ដោយសារផ្លូវមុខកន្លែងនេះប្រព័ន្ធលូតូច។ ដូច្នេះហើយ ពេលភ្លៀងមក គឺជន់លិចខ្លាំងរហូតដល់ក្បាលជង្គង់ រីឯមធ្យោបាយធ្វើដំណើរឆ្លងកាត់តែងតែរលត់ផងដែរ។ បន្ថែមនោះ នៅពេលលិចទឹក គឺបានហូរចូលក្នុងផ្ទះប្រជាពលរដ្ឋ ធ្វើឲ្យខូចខាតសម្ភារៈខាងក្នុងផ្ទះមួយចំនួនផងដែរ។

ចំណែក អ្នកស្រី ដានី ជាអ្នកលក់ប្រហិត បានសម្ដែងក្តីសប្បាយរីករាយយ៉ាងខ្លាំង ក្រោយមានការយកចិត្តទុកដាក់ពីអាជ្ញាធរក្នុងការផ្លាស់ប្ដូរប្រព័ន្ធលូថ្មីជូនប្រជាពលរដ្ឋក្នុងមូលដ្ឋាន និងបានជួយកាត់បន្ថយការជន់លិចផងដែរ ហើយងាយស្រួលដល់អ្នកស្រីប្រកបអាជីវកម្ម លែងលំបាកពេលដែលទឹកលិចត្រូវជិះចេញមិនអាចលក់ដូរបានបន្តទៀតនោះ។

ជាមួយនេះ លោក ជា សារ៉េត ចៅសង្កាត់ស្ទឹងមានជ័យ ១ បានបញ្ជាក់ថា ដោយសារតំបន់នេះប្រព័ន្ធលូតូច មិនអាចរំដោះទឹកបានទាន់ពេល ទើបអាជ្ញាធរសង្កាត់ ប្រើប្រាស់ថវិកាអភិវឌ្ឍន៍ឆ្នាំ ២០២៥ ធ្វើការដាក់ប្រព័ន្ធលូថ្មីបន្ថែម ដែលមានទំហំមុខកាត់ ១ ម៉ែត្រ ប្រវែងជាង ៤០០ ម៉ែត្រ សម្រាប់ជួយរំដោះទឹកឲ្យបានទាន់ពេលវេលា៕

អត្ថបទ ៖ ម៉េង