នៅចំពោះមុខទូតចិន​ ឯកឧត្ដម ហ៊ុន ម៉ានី ជឿថាសហគមន៍អន្តរជាតិ ពិសេសចិន នឹងចូលរួមឱ្យថៃឈប់ធ្វើសង្គ្រាម

ឧបនាយករដ្ឋមន្ត្រី ហ៊ុន ម៉ានី បានអរគុណចិនចំពោះការគាំទ្រ និងការចូលខ្លួនសម្របសម្រួលជម្លោះព្រំដែនកម្ពុជា-ថៃ កន្លងមក ប៉ុន្តែជាអកុសលថ្មីៗនេះ ស្ថានការណ៍បានធ្លាក់ក្នុងស្ថានភាពអាក្រក់សារជាថ្មី។ ថ្លែងនៅចំពោះមុខឯកអគ្គរដ្ឋទូតចិនប្រចាំកម្ពុជា  ឯកឧត្តម ហ៊ុន ម៉ានី ជឿជាក់ថា សហគមន៍អន្តរជាតិ ជាពិសេសចិន នឹងចូលរួមឱ្យភាគីថៃងាកមកគោរពនូវកិច្ចព្រមព្រៀងបទឈប់បាញ់ និងកិច្ចសហប្រតិបត្តិការរួមស្តីពីការព្រមព្រៀងសន្តិភាព និងកាតព្វកិច្ចទាំងឡាយតាមច្បាប់អន្តរជាតិ។

ថ្លែងក្នុងពិធីបើកវេទិកាផ្លាស់ប្តូរមិត្តភាពកម្ពុជា-ចិន «ផ្លូវសូត្រផ្សារភ្ជាប់ប្រជាជននិងប្រជាជន» ឆ្នាំ២០២៥ ជាមួយឯកអគ្គរដ្ឋទូតចិនប្រចាំកម្ពុជា លោក វ៉ាង វិនពីន រៀបចំកាលពីថ្ងៃទី១៥ ខែធ្នូ ឧបនាយករដ្ឋមន្ត្រី ហ៊ុន ម៉ានី ក៏បានប្រកាសពីការបេជ្ញាចិត្តឥតងាករេ និងជំហរយ៉ាងមុតមាំប្រកបដោយភាពម្ចាស់ការ ឆន្ទៈ ការទទួលខុសត្រូវខ្ពស់របស់កម្ពុជា ពុះពាររកដំណោះស្រាយដោយពឹងផ្អែកលើមាគ៌ាសន្តិភាព។

ជម្លោះប្រដាប់អាវុធទ្រង់ទ្រាយធំនៅតាមព្រំដែនកម្ពុជា-ថៃ បានផ្ទុះឡើងនៅចុងខែកក្កដា ឆ្នាំ២០២៥ ព្រោះតែការបើកវាយប្រហារពីសំណាក់យោធាថៃមកលើកងកម្លាំងប្រដាប់អាវុធកម្ពុជា។ ឆ្លងកាត់ការប្រយុទ្ធ៥យប់៥ថ្ងៃ កម្ពុជា ថៃ បានទទួលយក និងអនុវត្តបទឈប់បាញ់នៅថ្ងៃយប់ថ្ងៃទី២៨​ ខែកក្កដា ក្រោមការសម្របសម្រួលពីសំណាក់ម៉ាឡេស៊ីដែលជាប្រធានអាស៊ាន សហរដ្ឋអាម៉េរិក និងចិន។ ផ្ដើមចេញពីកិច្ចព្រមព្រៀងបទឈប់បាញ់ ភាគីកម្ពុជា ថៃ ក៏សម្រេចបានកិច្ចព្រមព្រៀងសន្តិភាពមួយនៅចុងខែតុលា តែត្រូវថៃហែកចោលនៅដើមខែវិច្ឆិកា។

យោធាថៃបានយកករណីយោធាខ្លួនដើរចូលជាន់មីនក្នុងចម្ការមីនរបស់កម្ពុជា ដែលសេសសល់ពីសង្គ្រាមស៊ីវិល បើកការវាយប្រហារប្រដាប់ដោយអាវុធធុនធ្ងន់ យន្តហោះចម្បាំង និងយុទ្ធោបករណ៍ផ្សេងទៀតមកលើកម្ពុជា ទោះបីកម្ពុជាអត់ធ្មត់មិនតបត គោរពបទឈប់បាញ់ និងកិច្ចព្រមព្រៀងសន្តិភាពជាច្រើនថ្ងៃក៏ដោយ។ យ៉ាងណាក្រោយកម្ពុជា ក៏បានប្រើប្រាស់សិទ្ធិការពារខ្លួន ឆ្លើយតបទៅភាគីថៃវិញ។

ចាប់ពីថ្ងៃទី៧ ខែធ្នូ មកដល់បច្ចុប្បន្ន ស្ថានការន៍កាន់តែអាក្រក់ទៅៗ យោធាថៃបានបើកការវាយប្រហារ ឈ្លានពានកាន់តែជ្រៅចូលមកកម្ពុជា បាញ់ប្រហារមិនរើសគោលដៅ ទម្លាក់គ្រាប់បែកលើទីតាំងជនស៊ីវិលរស់នៅ និងហេដ្ឋារចនាសម្ព័ន្ធស៊ីវិលទោះបីកម្ពុជា ឆ្លើយតបទៅភាគីថៃត្រឹមតែទីតាំងយោធាថៃក៏ដោយ។

នៅរសៀលថ្ងៃទី១៥​ ខែធ្នូ ចិនអំពាវនាវឲ្យថៃ និងកម្ពុជា មានការអត់ធ្មត់ខ្ពស់បំផុត និងប្រើគ្រប់វិធានការដែលអាចធ្វើទៅបាន ដើម្បីនាំទៅរកបទឈប់បាញ់ និងកាត់បន្ថយភាពតានតឹងឲ្យបានឆាប់ ចំពេលមានការប៉ះទង្គិចគ្នានៅតាមព្រំដែនកម្ពុជា-ថៃដែលកំពុងបន្ត។ ចិនក៏បានប្រកាសថា «នឹងបន្តដើរតួនាទីស្ថាបនា ក្នុងការបន្ធូរបន្ថយភាពតានតឹង និងធ្វើឲ្យស្ថានការណ៍ចុះត្រជាក់តាមមធ្យោបាយផ្ទាល់ខ្លួន» ប៉ុន្តែមិនបានផ្តល់ព័ត៌មានលម្អិតពីមធ្យោបាយណានោះទេ៕

ដោយ៖ ង៉ិល ណារ៉ាត់