គ្រប់ការិយាល័យបោះឆ្នោតទាំងអស់ បានបើកដំណើរការបោះឆ្នោតព្រមគ្នា ដោយគ្មានបញ្ហាអ្វីមួយរារាំងទេ

លោក សោម សូរីដា អគ្គលេខាធិការរង និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងប្រាប់«កម្ពុជាថ្មី»នាព្រឹកនេះថា នៅថ្ងៃ អាទិត្យ ទី០៥ ខែមិថុនា ដែលជាថ្ងៃបោះឆ្នោតជ្រើសរើសក្រុមប្រឹក្សា ឃុំ សង្កាត់អាណត្តិទី៥ នេះ គឺផ្ទៃមេឃស្រឡះល្អ ហើយការិយាល័យបោះឆ្នោត ដែលមានចំនួន២៣៦០២ ការិយាល័យ ត្រូវបានបើកឲ្យដំណើរការបោះឆ្នោតស្របពេលជាមួយគ្នានៅវេលាម៉ោង៧ ព្រឹក។ 

បើតាមលោក សោម សូរីដា នៅព្រឹកនេះដែរ ការការពារសន្តិសុខតាមការិយាល័យបោះឆ្នោត ក៏ដូចជាសណ្ដាប់ធ្នាប់សាធារណៈ បានប្រព្រឹត្តទៅយ៉ាងល្អប្រសើរ ហើយការបោះឆ្នោតបានប្រព្រឹត្តិទៅដោយរលូនល្អ គ្មានការបំភិតបំភ័យគ្មានការភ័យខ្លាច ឬការរារាំងដោយប្រការណាមួយនោះទេ ប្រជាពលរដ្ឋបានធ្វើដំណើរទៅបោះឆ្នោតជាធម្មតាដោយទឹកមុខរីករាយ។ 

លោក សោម សូរីដា បានអះអាងថា ដោយផ្អែកលើទិដ្ឋភាពនេះ គ.ជ.ប អាចវាយតម្លៃបានពីកិច្ចសហការគ្នាដ៏ល្អ របស់ភ្នាក់ងារសន្តិសុខបោះឆ្នោត ជាមួយគណៈកម្មការការិយាល័យបោះឆ្នោត ក្នុងការចាត់ចែងការងារទាំងអស់ ពាក់ព័ន្ធទៅនឹងដំណើរការបោះឆ្នោតនេះ៕

ដោយ ៖ កោះកែវ