គណបក្សប្រជាជនកម្ពុជានឹងរៀបចំពិធីរំលឹកខួបបង្កើតបក្សចំថ្ងៃបើកយុទ្ធនាការឃោសនាបោះឆ្នោត

គណបក្សប្រជាជនកម្ពុជានឹងរៀបចំពិធីរំលឹកខួបនៃការបង្កើតគណបក្សនៅថ្ងៃទី១ ខែកក្កដា ឆ្នាំ២០២៣ ដែលនឹងគួបជាមួយការបើកយុទ្ធនាការឃោសនាបោះឆ្នោតជ្រើសតាំងតំណាងរាស្រ្ត នីតិកាលទី៧ ខាងមុខនេះ។

លិខិតរបស់ខុទ្ទកាល័យគណបក្សប្រជាជនកម្ពុជា ចុះថ្ងៃទី៣០ ខែឧសភា បានណែនាំដូច្នេះថា «ការរៀបចំចាត់តាំងពិធីរំលឹកខួបកំណើតគណបក្ស លើកទី៧២ នៅឆ្នាំនេះ ត្រូវធ្វើគួបជាមួយនឹងការបើកយុទ្ធនាការឃោសនាបោះឆ្នោតជ្រើសតាំងតំណាងរាស្ត នីតិកាលទី៧ ដែលត្រូវចំថ្ងៃសៅរ៍ ទី១ ខែកក្កដា ឆ្នាំ២០២៣ ដោយត្រៀមលក្ខណៈរៀបចំឲ្យបានល្អប្រសើរ»។

បើតាមប្រតិទិនរបស់គណៈកម្មាធិការជាតិរៀបចំការបោះឆ្នោត (គ.ជ.ប) យុទ្ធនាការឃោសនានៃការបោះឆ្នោតជ្រើសតាំងតំណាងរាស្ត នីតិកាលទី៧ នឹងប្រព្រឹត្តទៅនៅថ្ងៃ១ ដល់ថ្ងៃទី២១ ខែកក្កដា ឆ្នាំ២០២៣ ពោលគឺមានរយៈពេល២០ថ្ងៃ ខណៈថ្ងៃទី២២ ជាថ្ងៃសរ ដែល គ.ជ.ប ហាមឃាត់មិនមានការសកម្មភាពណាមួយឡើយមុនការបោះឆ្នោត នៅថ្ងៃទី២៣ ខែកក្កដាខាងមុខនេះ៕

ដោយ៖ ធឿន វ៉ាន់សុង