អាជ្ញាធរឃ្លាំមើល ចាប់ផាកពិន័យ អ្នកចាក់សំរាមចោលអនាធិបតេយ្យ

ចំពោះអ្នកចាក់សំរាមចោលអាណាធិបតេយ្យតាមផ្លូវសាធារណៈខុសទីតាំងកំណត់នោះ តាមគោលការណ៍របស់គណៈបញ្ជាការឯកភាពរដ្ឋបាលខេត្តកំពង់ឆ្នាំង ក្នុងពេលប្រជុំថ្មីៗនេះ បានដាក់ផែនការឱ្យអាជ្ញាធរមូលដ្ឋាននិងសមត្ថកិច្ចត្រូវតែឃ្លាំចាប់អ្នកលួចចាក់សំរាមចោលនោះ មកផាកពិន័យឲ្យបានម៉ឺងម៉ាត់ដើម្បីជាការព្រមានឲ្យរាងចាលកុំឱ្យអ្នកដទៃយកគំរូនេះតាម។

ដោយឡែក យោងតាមអនុក្រឹត្យលេខ១១៣ អនក្រ.បក ការគ្រប់គ្រងកាកសំណល់តាមទីប្រជុំជនចោលសំរាម​លើ​ទូសាធារណៈឬតាមដងផ្លូវ ត្រូវផាកពិន័យអន្តរការណ៍ជាប្រាក់ចាប់ពី ២ ម៉ឺនរៀល ដល់ ៤០ ម៉ឺនរៀល។

ទាក់ទងនិងភាពអាណាធិបតេយ្យនៃការចាក់សំរាមចោលតាមដងផ្លូវនេះ នៅព្រឹកថ្ងៃទី១៥ ខែវិច្ឆិកា ឆ្នាំ ២០២១ អ្នកយកព័ត៌មានយើងបានពិនិត្យឃើញនៅតាមដងផ្លូវលំមួយកន្លែង ស្ថិតនៅខាងកើតវត្តទួលខ្សាច់ក្នុងភូមិទួលខ្សាច់ ឃុំជ្រៃបាក់ស្រុករលាប្អៀរ ត្រូវបានគេលួចដឹកសំរាមយកមកចាក់ចោលតាមចិញ្ចើមផ្លូវលំ នៅចំណុចខាងលើនេះយ៉ាងអាណា​ធិបតេយ្យ។

តាមការពិនិត្យជាក់ស្ដែងសំរាមទាំងនោះមានទាំងដបប៊ីយែរ និងទឹកសុទ្ធនិងសំរាមផ្សេងៗទៀតជាច្រើនដែលអាចបញ្ជាក់បានថាអ្នកលួចចាក់សំរាមនេះ គឺជាអ្នកលក់ដូរហាងស៊ីផឹកណាមួយ ដែលយូរៗម្ដង គេលួចដឹកសំរាមក្នុងហាងនោះ​យក​មកចាក់ចោលទីនេះ។

ករណីនេះបើអាជ្ញាធរ និងសមត្ថកិច្ចនៅក្នុងឃុំជ្រៃបាក់ ស្រុករលាប្អៀរមិនចំណាត់ការទេនោះ ការលួចចាក់សំរាមនៅចំណុចខាងលើនេះ នឹងរាលដាលបន្តទៀតកាន់តែច្រើនមិនខានឡើយ។

ទាក់ទងនឹងករណីនេះដែរ នៅព្រឹកថ្ងៃទី១៥ ខែវិច្ឆិកា ឆ្នាំ២០២១ នេះលោក តាំង ប៊ុនទត មេឃុំជ្រៃបាក់បានឆ្លើយតបតាមកន្លងមកលោកក៏ពុំបានដឹងទេ ដោយលោកមេភូមិទួលខ្សាច់ក៏មិនបានរាយការណ៍មកសាលាឃុំទេ។

ដូច្នេះករណីនេះលោកនឹងចាត់តាំងឱ្យក្រុមប្រឹក្សាឃុំ សហការជាមួយមេភូ មិចុះទៅត្រួតពិនិត្យមើលនៅទីតាំងនោះ និងចាត់វិធានការឲ្យសមត្ថកិច្ចក៏ដូចជាប្រជាការពារឃ្លាំមើលដើម្បីចាប់អ្នកលួចចាក់សំរាមចោលអនាធិបតេយ្យនេះ យកមកពិន័យតាមផ្លូវច្បាប់ ដើម្បីជាការព្រមានកុំឲ្យគេយកគំរូដ៏អាក្រក់បែបនេះតាម៕

អត្ថបទ៖ ឈៀងថារិទ្ធ