សន្តិសុខសង្គម

ខឹងបងថ្លៃ ស៊ីលុយដាច់ ២០ ម៉ឺនរៀល គំរាមសម្លាប់ និងដុតផ្ទះ

បានផុស

១២ ខែ មុន

នៅ

ថ្ងៃពុធ ២៦ មករា ២០២២

ដោយ

ជនសង្ស័យម្នាក់ជាប្អូនថ្លៃ ត្រូវនគរបាលស្រុកកៀនស្វាយ ឃាត់ខ្លួន បន្ទាប់ពីគំរាមសម្លាប់បងថ្លៃ និងដុតផ្ទះ ដុតឡាន ដោយសារខឹង បងថ្លៃ ស៊ីលុយដាច់ ២០ ម៉ឺនរៀល ពីថៅកែការដ្ឋានដឹកដីរបស់ខ្លួន។ ហេតុការណ៍នេះ បានកើតឡើងនៅថ្ងៃទី ២៥ ខែមករា ឆ្នាំ ២០២២ វេលាម៉ោង ២០ និង២០ នាទី នៅក្នុងភូមិព្រែកតានប់ ២ ឃុំកំពង់ស្វាយ ស្រុកកៀនស្វាយ ខេត្តកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះឈ្មោះ ដាំ ជា ភេទប្រុស អាយុ ៤៦ ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតានប់ ២ ឃុំកំពង់ស្វាយ ស្រុកកៀនស្វាយ ខេត្តកណ្ដាល។ ជនសង្ស័យឈ្មោះ ឈន ប៊ុនណាក់ ភេទ ប្រុស អាយុ ២៨ ឆ្នាំ ជនជាតិខ្មែរ មុខរបរបើកឡាន មានទីលំនៅ ភូមិព្រែកតានប់ ២ ឃុំកំពង់ស្វាយ ស្រុកកៀនស្វាយ ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះកំពុងតែដេកនៅក្នុងបន្ទប់ផ្ទះរបស់ខ្លួនស្រាប់តែជនសង្ស័យឈ្មោះ ឈន ប៊ុនណាក់ ត្រូវជាប្អូនថ្លៃ បានមកធាក់ទ្វារបន្ទប់ដេករបស់ជនរងគ្រោះហើយស្រែកហៅឲ្យមកចេញខាងក្រៅ និងបានគំរាមកំហែងជនរងគ្រោះថា បើមិនចេញមកក្រៅទេ និងដុតផ្ទះ វ៉ៃកម្ទេចឡាន ហើយនឹងសម្លាប់ជនរងគ្រោះចោល។ លឺដូច្នេះជនរងគ្រោះភ័យក៏បានរត់ទៅយកឡានបើកផ្ញើផ្ទះអ្នកភូមិនៅក្បែរគ្នា នឹងបានទូរស័ព្ទប្រាប់សមត្ថកិច្ចប៉ុស្តិ៍នគរបាលរដ្ឋបាលកំពង់ស្វាយ ឲ្យចុះមកអប់រំណែនាំ ជនសង្ស័យឲ្យឈប់រករឿងខ្លួនទៀត។

លុះដល់ថ្ងៃទី២៥ ខែមករា ឆ្នាំ២០២២ វេលាម៉ោង២០ និង២០នាទី ជនសង្ស័យឈ្មោះ ឈន ប៊ុនណាក់ ភេទប្រុស បានកាន់កាំបិតផ្គាក់ផ្លែដែក ដងឬស្សីរករឿងជនរងគ្រោះដោយបានគំរាមគំហែង រកដុតផ្ទះ វ៉ៃកម្ទេចឡាន នឹងរកសម្លាប់ជនរងគ្រោះឈ្មោះ ដាំ ជា ភេទប្រុសចោលម្ដងទៀត។ ពេលនោះជនរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកំពង់ស្វាយ ក្រោយពីទទួលបានពាក្យបណ្តឹងពីជនរងគ្រោះរួចកម្លាំងប៉ុស្តិ៍នគរបាលរដ្ឋបាលកំពង់ស្វាយបានចុះទៅដល់កន្លែងហេតុរួចបាននាំខ្លួនជនសង្ស័យយកមកប៉ុស្តិ៍នគរបាលរដ្ឋបាលកំពង់ស្វាយដើម្បីធ្វើការសាកសួរ។

នៅចំពោះសមត្ថកិច្ចជនសង្ស័យបានឆ្លើយសារភាពថាៈកាលពីថ្ងៃទី ២១ ខែមករា ឆ្នាំ ២០២២ ខ្លួនបានតេទូរស័ព្ទទៅឈ្មោះទី សេងចាំង ភេទប្រុស អាយុប្រហែល ៤៧ ឆ្នាំ ជនជាតិខ្មែរ មុខរបរ ថៅកែការដ្ឋានដឹកដី មានទីលំនៅភូមិព្រែកបាឡាក់ឆឹង ឃុំត្រោយស្លា ស្រុកស្អាង ខេត្តកណ្ដាល ដើម្បីសុំចូលធ្វើការងារវិញ ហើយនឹងសុំខ្ចីប្រាក់ចំនួន២០០០០០៛(ម្ភៃម៉ឺនរៀល) រួចថៅកែការដ្ឋានដឹកដី បានប្រាប់ថា ចាំផ្ញើតាមឈ្មោះដាំ ជា ភេទប្រុស(ត្រូវជាបងថ្លៃរបស់ខ្ញុំ) ។

លុះដល់ម៉ោង២១ និង ៣០ នាទីថ្ងៃខែឆ្នាំដដែល ខ្លួនស្រវឹងស្រាបានទៅគោះទ្វារផ្ទះជនរងគ្រោះ(បងថ្លៃ)ដើម្បីសួរនាំរឿងលុយដែលខ្លួនបានខ្ចីពីថៅកែដឹកដី ពេលនោះជនរងគ្រោះ(បងថ្លៃ)បានហុចមីកញ្ចប់ពណ៌ខៀវចំនួនប្រាំកញ្ចប់មកឲ្យ ភ្លាមនោះខ្លួនបាននិយាយគំរាមកំហែងជនរងគ្រោះជាច្រើនតែភ្លេចអស់មិនចាំថា ខ្លួនបាននិយាយពាក្យសម្ដីអ្វីខ្លះ។ លុះដល់ថ្ងៃទី ២៥ ខែមករា ឆ្នាំ ២០២២ វេលាម៉ោង ២០ និង ២០ នាទី ជនសង្ស័យបានផឹកស្រាថ្នាំស្រវឹងកាន់កាំបិតផ្គាក់ដងឫស្សី ផ្លែដែកស្រែកជេរគំរាមកំហែងរកសម្លាប់ និងរកដុតផ្ទះជនរងគ្រោះចោល។

ជនសង្ស័យបានឆ្លើយសារភាពទៀតថា មូលដែលខ្លួនធ្វើសកម្មភាពបែបនេះលើជនរងគ្រោះ មកពីខ្លួនខឹងជនរងគ្រោះមិនព្រមឲ្យលុយដែលខ្លួនបានខ្ចីពីថៅកែម្ចាស់ការដ្ឋានដឹកដីរបស់ខ្លួន។ បច្ចុប្បន្នជនសង្ស័យរួមទាំងវត្ថុតាងបញ្ជូនមកកាន់អធិការដ្ឋាននគរបាលស្រុកកៀនស្វាយ ដើម្បីបន្តតាមនីតិវិធីច្បាប់៕

អត្ថបទ៖ ឆៃ យ៉ា